चितवन (हाम्रो खेलकुद) – हाँस्य कलाकार तथा सामाजिक अभियन्ता धुर्मुस–सुन्तलीको फाउन्डेसनले निर्माण थालेको अन्तर्राष्ट्रिय क्रिकेट रंगशालाको डीपीआर (विस्तृत परियोजना प्रतिवेदन) सार्वजनिक भएको छ ।

बुधबार फाउन्डेसनले भरतपुर महानगरपालिकामा एक कार्यक्रम गर्दै डीपीआर सार्वजानिक गरेको हो । रंगशाला स्वरुप कमलको फुलसँगै नेपालीपन झल्कने गरि आधुनिक तवरको हुने छ । रंगशालाको प्रवेश द्वारमा गौतम बुद्धको शालिक निर्माण गरिनेछ । भित्रि भागमा परम्परागत तथा कलात्मक शैली झल्कने गरि रंगशाला निर्माणका लागि नक्साङ्कन गरिएको छ ।

डीपीआर तयार भइसकेकोले अब कामले गति लिने फाउन्डेसनका अध्यक्ष सीताराम कट्टेल धुर्मुसले बताएका छन् । ‘अहिले समान्य काम भइरहेको छ,डीपीआर नै आइसकेपछि सबै कामहरु व्यवस्थित र दु्रत गतिमा हुने छन्’ ,धुर्मुसले भने । सरकारले कर छुट गराउन सकेमा रंगशाला तयार गर्न रु २ अर्ब ६० करोड हाराहारी खर्च हुने अनुमान गरिएको छ । अध्यक्ष कट्टेलले रंगशालाका लागि बोलकबोलको रकम रु ७ करोड मध्ये रु १ करोड र नबोलीकनै सोझै रु २ करोड संकलन भएको जानकारी दिए । डिपिआरका लागि हालसम्म रु २ करोड भूक्तानी गरेको उनले जानकारी दिए ।

सबैको सहयोगबाट यो परियोजना सम्पन्न गर्नुपर्ने बताउँदै भरतपुर महानगरपालिका प्रमुख रेणु दाहालले समयमै सम्पन्न गर्नका लागि सबै पक्षलाई सहयोगको आव्हान गरीन । डीपीआर निर्माणको काम नेपाल र भारतका दुई कन्सल्टेन्सीले संयुक्तरुपमा गरेका हुन् । नेपालमा क्रियटिभ र भारतमा हफिस नामका कन्सल्टेन्सीले यसमा कार्य गरेका हुन् ।

विगतमा रंगशाला निर्माण अवरोध हुँदा डीपीआरको काम पनि रोकिएको थियो । गत जेठमा पश्चिमतर्फको बार भत्काएपछि निर्माणकार्यमा असर पुगेको थियो । रंगशाला क्षेत्रलाई जस्ताले बार्ने काम, निर्माण गर्दा आवश्यक पर्ने मजदुर बस्ने हल, कार्यालय निर्माण, कर्मचारी आवासगृह, गोदाम घर, सुरक्षाकर्मी बस्ने घर लगायतका आवश्यक संरचना निर्माण भइसकेको छ ।

रंगशाला स्तुपा आकारको हुने छ भने क्रिकेट खेल मैदान कमलको फूल आकारको हुने छ । रंगशालामा ४ वटा द्वार हुनेछन् । जसमा २५ हजार दर्शकहरु अट्ने क्षमता हुनेछ । आउँदो २५ वर्षपछि हुने प्रविधि अहिले नै प्रयोग गरेर नक्साङ्कन गरिएको छ । चितवनको रामपुरमा रहेको २० बिघा ६ कठ्ठा जमिनमा रंगशाला निर्माण गर्न लागिएको हो । समयमा रकम जुटाउन सकेमा २२ महिना भित्रमा रंगशला तयार हुने फाउण्डेशनका अध्यक्ष सिताराम कट्टेलले बताए ।

रंगशालालाई स्पोर्ट्स हबको रुपमा विकास गरिने छ । यो रंगशालामा क्रिकेट मात्र होइन अन्य खेलका लागि उपयोग हुनेगरी बनाइने छ । फुटबल, भलिबलसहित, नेपालको मौलिक खेल डण्डिवियोसम्म खेल्न सकिने गरी बनाइने योजना रहेको छ । क्रिकेट खेलाडीहरु उत्पादन गर्न एकेडेमी पनि रंगशालाभित्र रहने जनाईएको छ ।