एजेन्सी – ओपनर डेविड वार्नरको शतक,ग्लेन म्याक्सवेल र आरोन फिन्चले अर्ध शतक प्रहार गरेपछि अष्ट्रेलियाले पहिलो टि ट्वान्टी खेलमा श्रीलंकालाई २ सय ३४ रनको विशाल लक्ष्य दिएको छ । टस हारेर ब्याटिङको निम्तो पाएको अष्ट्रेलियाले निर्धारित २० ओभरमा २ विकेट गुमाउँदै २ सय ३३ रन बनायो ।

अष्ट्रेलियाका लागि ओपनर डेविड वार्नरले अविजित शतकीय योगदान दिए । अन्तिम ओभरको अन्तिम बलमा १ रन बटुल्दै वार्नरले टि २० आई करिअरमा आफ्नो पहिलो शतक पुरा गरे । वार्नर ५६ बलमा १० चौका र ४ छक्का सहित एक सय रनमा अविजित रहे ।

पहिलो विकेटका लागि वार्नर र कप्तान आरोन फिन्चले १०.५ ओभरमा १ सय २२ रनको शतकीय साझेदारी गदैं उत्कृष्ट सुरुवात दिलाएका थिए । ठूलो सटको धुनमा कुशल मेन्डिसबाट क्याच आउट हुनुअघि फिन्चले ३६ बलमा ८ चौका र ३ छक्का प्रहार गर्दै ६४ रनको योगदान दिए ।

फिन्च आउट भएपछि मैदानमा आएका हिटर ग्लेन म्याक्सवेलले विश्फोटक ब्याटिङ गर्दै २८ बलमा ७ चौका र ३ छक्का सहित ६२ रनको योगदान दिए । एस्टन टर्नर १ रनमा अविजित रहे । श्रीलंकाका लागि दसुन सनका र लक्सान सनदकनको नाममा समान १ विकेट रह्यो ।