ढाका (हाम्रो खेलकुद) – नेपाली राष्ट्रिय क्रिकेट टोलीले एसीसी इमर्जिङ एसिया कपमा आफ्नो पहिलो खेलमा आज भारतसँग खेल्दै छ । खेल नेपाली समय अनुसार विहान ८:४५ बाट सुरु हुनेछ ।

नेपाल ज्ञानेन्द्र मल्लको कप्तानीमा मैदान उत्रने छ । उता भारतीय टोली विकेटकीपर बि आर शरथले समाल्ने छन् । पूर्वकप्तान पारस खड्का र लेग स्पिनर सन्दीप लामिछाने टोलीमा छैनन् । त्यसैले नेपाललाई थप दबाब हुने छ । ओपनरको रुपमा ज्ञानेन्द्र र इशान पाण्डे मैदान उत्रने संभावना छ । इशानले खराब प्रर्दशन गरिरहँदा अर्का आक्रमक ब्याट्सम्यान कुशल भुर्तेल पनि ज्ञानेन्द्रको जोडीमा उत्रन सक्छन् ।

दीपेन्द्र सिंह ऐरी, शरद भेषावकर, आरिफ शेख शीर्षक्रमका ब्याट्सम्यान हुन् । पछिल्लो समय निरन्तर खराब प्रर्दशन गरि रहेका दीपेन्द्रलाई ठूलो इनिङ खेल्न दबाब छ । शरद नेपाली टोलीकै सर्वाधिक अनुभवी र भरपर्दा ब्याट्सम्यान हुन् । शरदलाई पारस टोलीमा नहुँदा ब्याटिङमा अझ बढि जिम्मेवारी थपिएको छ ।

टोलीमा विकेटकीपर विनोद भण्डारीले गर्ने छन् । उनको विकल्प पनि छैन । राहित कुमार पौडेल र सन्दीप जोरा मध्य एकले मौका पाउने छन् । जसमा रोहितको संभावना बढी छ । सन्दीप टि ट्वान्टीको लागि परिचित रहँदा रोहित ओडीआईको लागि रहेका छन् । सोमपाल कामी र करण केसि अलराउन्डरको रुपमा टोलीमा पर्ने निश्चित जस्तै छ । दुबै ठूलो इनिङ खेल्न सक्छन् । तीब्र गतिको बलिङ युनिटमा पनि करण र सोमपालको नाम नै अग्रस्थानमा आउँछ ।

स्पिनरको रुपमा ललित नारायण राजवंशी र सुसन भारी रहने छन् । तीन तीब्र गतिका बलर खेलाए अभिनास बोहाराले मौका पाउने छन् । नेपालको ब्याटिङ कमजोर भएको हुँदा चार प्रमुख बलर र ७ ब्याट्सम्यान खेलाउन सक्ने अनुमान गरिएको छ । त्यसैले तीन तीब्र गतिका बलरलाई खोलउने संभावना कम छ ।

यता भारतीय टोलीको प्रमुख हतियार शिवम माभी रहेका छन् । तीब्र गतिका बलर कमलेश नगगरकोटी चोटका कारण बाहिरिएपछि माभी आएका छन् । अघिल्लो वर्ष यू१९ विश्वकपमा उत्कृष्ट प्रर्दशन गरेका माभीले आईपीएल र प्रथम श्रेणी खेली सकेका छन् । प्रथम श्रेणीको अनुभव भएका भारतका स्पिनर सिदार्थ देसाई पनि नेपाललाई घातक बन्न सक्छन् ।

भारतीय टोली :

विनायक गुप्ता, अर्यान जुयाल, बीआर शरथ (कप्तान तथा विकेटकीपर) चिन्मय सुतार, यश राठोड, आरमान जफार, सानविर सिंह, शिवम मात्री, ह्थिक शोकिन, सिद्धार्थ देसाई, आदित्य ठाकरे, एसआर दुबे, कुमार सुरज, पी रेखाडे र कुलदीप यादव ।

नेपाली टोली :

ज्ञानेन्द्र मल्ल(कप्तान), दीपेन्द्र सिंह ऐरी, शरद भेषवकर, सोमपाल कामी, करण केसी, विनोद भण्डारी, रोहित कुमार पौडेल, ललित नारायण राजवंशी, पवन सरार्फ, सन्दीप जोरा, सुसन भारी, इशान पाण्डे, मोहम्मद आरिफ शेख, अभिनाश बोहोरा र कुशल भुर्तेल ।

यो पनि पढ्नुहोस् :

‘टोलीमा पर्न कडा प्रतिस्पर्धा छ’ – कप्तान ज्ञानेन्द्र

‘भारतलाई हराउन सकिँदैन भन्ने केहि छैन’ – शरद

‘टोलीकै लागि आक्रामक शैलीमा परिवर्तन ल्याएँ’ – विनोद

दुई शतक प्रहार गर्ने लक्ष्य छ’ – उपकप्तान दीपेन्द्र