ढाका (हाम्रो खेलकुद) – नेपाली राष्ट्रिय क्रिकेट टोलीले एसीसी इमर्जिङ एसिया कपमा भारतसँग प्रतिस्पर्धा गरि रहेको छ । टस हारेर ब्याटिङ थालेको नेपालले २५ ओभरमा ३ विकेट गुमाउँदै ८८ रन बनाएको छ ।
नेपालका सर्वाधिक अनुभवी खेलाडी शरद भेषवकर ६३ बलमा समान १ चौका र छक्का सहित ३५ रनमा खेलि रहेका छन् । उनलाई दीपेन्द्र सिंह ऐरीले २१ बलमा २ चौका सहित १७ रनमा साथ दिएका छन् । शरदले आठौं ओभरमा जीवनदान पाएका थिए । आदित्यको बलमा प्वाइन्टमा पार्थले उत्कृष्ट डाइभ दिँदै प्रयास गरेपनि शरदको क्याच छुटेको हो ।
नेपालले पहिलो ओभरको दोस्रो बलमा कप्तान ज्ञानेन्द्र मल्ललाई शून्यमा गुमाएको थियो । सौरभ दुबेले पहिलो बलमै एलबी डब्लूको अपिल गरेका थिए । दोस्रो बलमा दुबेले मल्ललाई बोल्ड आउट गर्दै शून्यमा पेभिलिएनको बाटो देखाए । दोस्रो विकेटका लागि शरद र कुशल भुर्तेलले १ सय ४ बलमा ५४ रनको साझेदारी गर्दै नेपाललाई सरुवाती संकट टारेका थिए ।
१८ ओभरको चौथो बलमा पार्थ रेखाडेले बोल्ड आउट गर्नुअघि यसै खेलबाट नेपाली टोलीमा डेब्यू गरेका कुशलले ६० बलमा ४ चौका सहित २८ रन जोडे । पार्थलेनै २० ओभरको पहिलो बलमा आरिफ शेखलाई २ रनमा क्याच आउट गराए ।
