पोखरा(हाम्रो खेलकुद) – १३ औं दक्षिण एसियाली खेलकुद (साग) महिला टि ट्वान्टी क्रिकेटमा नेपालको स्वर्णको संभावना सकिएको छ । शुक्रबार श्रीलंकासँग ४१ रनले पराजित भएपछि नेपालको स्वर्णको संभावना सकिएको हो ।

श्रीलंकाले प्रस्तुत गरेको १ सय १९ रनको विजयी लक्ष्य पछ्याएको नेपाल २० ओभरमा ९ विकेट गुमाउँदै ७७ रन बनाउन सक्यो । नेपालका लागि कप्तान रुबिना क्षेत्री बेलबासेले सर्वाधिक १९ रनको योगदान दिइन् । उनले २८ बलमा २ चौका प्रहार गरिन् ।

अप्सरी बेगम ११, करुणा भण्डारी १२ र कविता कुवर १३ रनमा नट आउट रहिन् । नेपालका ७ ब्याट्सवुमेनले दोहोरो अंकमा रन छुन सकेनन् । श्रीलंकाको सचिनीले ३ र सत्या सन्दीपनीले २ विकेट लिइन् ।

त्यसअघि पोखरा रंगशालमा टस जितेर ब्याटिङ थालेको श्रीलंकाले निर्धारित २० ओभरमा ७ विकेट गुमाउँदै १ सय १८ रन बनाएको थियो । सरस्वती कुमारी चौधरीले तेस्रो ओभरको पाँचौ बलमा ओपनर उमिषा थिमाशिनीलालाई डली भट्टबाट २ रनमा क्याच आउट गराएकी थिइन् ।

नवौं ओभरको अन्तिम बलमा अञ्जली चन्दले कप्तान हर्षिता माधबीलाई सोनु खड्काबाट १६ रनमा क्याच आउट गराएपछि श्रीलंका दबाबमा परेको थियो । माधवीले १९ बलमा २ चौका प्रहार गरिन् । १२ औं ओभरको दोस्रो बलमा सोनु खड्काले जानदी आनलीलाई ३५ रनमा बोल्ड आउट गरिन् । उनले ३६ बलमा १ चौका र २ छक्का प्रहार गरिन् ।

लगतैं अर्को बलमा सोनुले काभिषा दिलहारीलाई शून्यमा एलबी डब्लू आउट गरेपछि टेष्ट टोली श्रीलंकामाथि नेपालले दबाब कायम गरेको थियो । १९ ओभरको अन्तिम बलमा लिहिनी अप्सरालाई सरस्वतीले २७ बलमा ५ चौका सहित ३७ रनमा इन्दु बर्माबाट क्याच आउट गराइन् । सत्या सन्दीपनी २२ रनमा रन आउट भइन् । नेपालको लागि सोनु खड्काले ४ ओभरमा १३ रन खर्चेर २ विकेट लिइन् ।

सरस्वती कुमारी चौधरीले ४ ओभरमा २६ रन खर्चेर २ विकेट लिइन् । अञ्जली चन्दको नाममा १ विकेट रह्यो । पहिलो खेलमा नेपालले माल्दिभ्सलाई १० विकेटले हराउँदा बंगलादेशसँग १० विकेटले पराजित भएको थियो । स्वर्णका लागि अव बंगलादेश र श्रीलंका खेल्ने छन् । नेपालले कास्यका लागि माल्दिभ्ससँग खेल्ने छ ।