सुनसरी (हाम्रो खेलकुद) – सुनसरीको इनरुवामा जारी मनमोहन मेमोरियल राष्ट्रिय एकदिवसिय क्रिकेट प्रतियोगिता अन्तर्गत समुह बी को पहिलो खेलमा बुधबार नेपाल पुलिस क्लबले कर्णाली प्रदेशलाई २ सय ६७ रनको फराकिलो अन्तरले पराजित गरेको छ । ३ सय ४७ रनको विशाल विजयी लक्ष्य पछ्याएको कर्णाली २७.१ ओभरमा अल आउट हुँदै ७९ रनमा समेटियो ।

कणौलीका लागि तल्लोक्रमका राजकुमार शाहले सर्वाधिक २३ रनको योगदान दिए । २५ औं ओभरको पहिलो बलमा सागर ढकालले बोल्ड आउट गर्नुअघि शाहले १४ बलमा ३ छक्का प्रहार गरे । कर्णालीका ७ खेलाडीका दोहोरो अंकमा रन छुन सकेनन् ।

दोस्रो ओभरको तेस्रो बलमै दीपेन्द्र सिंह ऐरीले ललित भण्डारीबाट कप्तान रविन्द्रजंग शाहीलाई ६ रनमा क्याच गराए । तेस्रो ओभरको दोस्रो बलमा बिपिन रावललाई ललित भण्डारीले बिपिन रावललाई १ रनमा बोल्ड आउट गरे । ललित भण्डारीलेनै प्रकाश जैशीलाई ४ रनमा बोल्ड आउट गरे । हेमन्त ओलीलाई पवन सरार्फले १० रनमा बोल्ड आउट गरे । उनले ३० बलमा १ चौका प्रहार गरे ।

टेक सलामी मगरले २९ बलमा २ चौका सहित १४ रन जोडे । हिमान्शु शाहीले ३१ बलमा १, ललित प्याकुरेल शून्यमा आउट भए । पुलिसका मञ्जित श्रेष्ठ, सागर ढकाल र ललित सिंह भण्डारीले २-२ विकेट लिए । दीपेन्द्र सिंह ऐरी, कुशल भुर्तेल, पवन सरार्फ र ललित नारायण राजवंशीले १-१ विकेट लिए।

त्यसअघि इनरुवा क्रिकेट मैदानमा टस हारेर ब्याटिङ थालेको पुलिस ४९.३ ओभरमा अल आउट हुँदै ३ सय ४६ रनमा समेटिएको थियो । युवा ब्याट्सम्यान कुशल भुर्तेलले तल्लोक्रममा ४९ बलमा ७ चौका र ५ छक्का सहित ७८ रनको योगदान दिए ।

४७ औं ओभरको पहिलो बलमा रविन्द्रजंग शाहीलाई ठूलो सट प्रहार गरेका कुशल हिमान्शु शाहीबाट क्याच हुन पुगे । ओपनर सुनिल धमलाले ७० रनको योगदान दिए । ३३ ओभरको पहिलो बलमा स्पिनर युनिस बिक्रम सिंहले विकेटकीपर बिपिन रावलबाट क्याच गराउनु अघि धमलाले ९५ बलमा ६ चौका र १ छक्का प्रहार गरे ।

११ औं ओभरको पहिलो बलमा ललित प्याकुरेलले ओपनर अमित श्रेष्ठलाई राज कुमार शाहबाट २९ रनमा आउट गराए । अमितले ३१ बलमा ६ चौका प्रहार गरे । राज कुमार शाहले १६ औं ओभरको अन्तिम बलमा दीपेन्द्र सिंह ऐरीलाई २५ रनमा क्याच आउट गराए । दीपेन्द्रले १९ बलमा ३ चौका र १ छक्का प्रहार गरे । २८ औं ओभरको अन्तिम बलमा अनिल कुमार शाह ३६ रनमा रन आउट भए । अनिलले ३९ बलमा ४ चौका र १ छक्का प्रहार गरे ।

कप्तान मञ्जित श्रेष्ठ १८, दिलिप नाथ १५, ललित भण्डारी २७, पवन सरार्फ १५ र सागर ढकाल शून्यमा आउट भए । कर्णालीका कप्तान रविन्द्रजंग शाहीले ८ ओभरमा ४० रन खर्चेर ३ विकेट लिए । युनिस बिक्रम सिंह र राज कुमार शाहले २-२ तथा ललित प्याकुरेलको नाममा १ विकेट रह्यो । समुह ए बाट त्रिभुवन आर्मी क्लब र समुह सी बाट प्रदेश नम्बर ३ सेमिफाइनलमा पुगि सकेका छन् । पुलिसले शुक्रबार प्रदेश २ सँग खेल्ने छ ।