काठमाडौं (हाम्रो खेलकुद) – नेपाली सिनियर टोलीका उपकप्तान दीपेन्द्र सिंह ऐरीले आगमी संस्करणको एभरेष्ट प्रिमियर लिग (इपिएल) काठमाडौं किंग्स इलाभेनबाट खेल्ने भएका छन् । तीब्र गतिका बलर सोमपाल कामी चितवन टाइगर्समा पुगेका छन् ।

पुष १७ देखी २४ सम्म खुल्ला भएको खेलाडी ट्रेडमा तीन टोलीले साटफेर गरेका छन् । जस अनुसार काठमाडौं किंग्सले कप्तान सोमपाल कामीलाई चितवन राइनोज पठाउँदै चितवन टाइगर्सका दीपेन्द्र सिंह ऐरीलाई टोलीमा भित्र्याएको छ । दीपेन्द्रले गत वर्ष चितवन टाइगर्सबाट ६ खेलमा २ सय ३१ रन बनाउँदै सर्वाधिक रन बनाउने खेलाडीमा दोस्रो स्थानमा रहेका थिए ।

काठमाडौंले नरेश बुढाएरको स्थानमा ओपनर तथा विकेटकीपर सुबास खकुरेललाई टोलीमा भित्र्याएको छ । काठमाडौंले स्पिनर सुशिल कंडेलको स्थानमा यू१९ का तीब्र गतिका बलर आकाश चन्दलाई टोलीमा भित्र्याएको छ । आकाशले तल्लोक्रममा ब्याटिङ गर्ने गर्दछन् ।

शक्ति गौचनको स्थानमा पोखरा राइनोजले युवा ब्याट्सम्यान लोकेश बमलाई टोलीमा लिएको छ । लोकेशले दुई साता अघि पोखरा प्रिमियर लिगमा विराटनगर टाइटन्सबाट खेल्दै उत्कृष्ट प्रर्दशन गरेका थिए । विराटनगर टाइटन्सबाट लोकेशले चितवन राइनोजविरुद्ध ४ खेलमा ९७ रन बनाएका थिए । उनले लिग चरणमा चितवनसँग ३६ बलमा ५ चौका र ५ छक्का सहित ६२ रन जोड्दै सबैको मन जितेका थिए । शक्तिले गत वर्षको इपिएल देखी घरेलु क्रिकेटबाट सन्न्यास लिएका थिए ।