काठमाडौं (हाम्रो खेलकुद) – केही साताअघि नयाँ नेतृत्व पाएको नेपाल क्रिकेट खेलाडी संघले दुई नेपाली खेलाडीलाई विदेशी क्लबबाट क्रिकेट खेल्ने मौका जुटाएको छ । नेपाली राष्ट्रिय टोलीबाट खेलिसकेका नरेश बुढाएर र सुसन भारीलाई वैदेशिक क्लबमा खेल्ने मौका मिलेनको संघले मंगलबार विज्ञप्तीमार्फत जनाएको छ ।

संघका महासचिव पारस खड्काले जारी गरेको विज्ञप्ती अनुसार नरेशले क्यानाडाको ब्लुमफिल्ड क्रिकेट एकेडेमीबाट र सुसनले इंङल्यान्डको पलमाउथ क्रिकेट क्लबमा खेल्ने छन् । नेपाली राष्ट्रिय टोलीका पूर्व प्रशिक्षक पुबुदु दासानायके र संघको संयुक्त पहलमा नरेशले क्यानाडामा खेल्ने मौका पाएका हुन् । नरेशले ब्लुमफिल्डमा करिब चार महिना खेल्ने र प्रशिक्षण गर्नेछन् । उनी बुधबार त्यसतर्फ जाँदैछन् । नरेशको आउने जाने र त्यहाँ रहँदाको सबै खर्च क्लबले बेहोर्ने खेलाडी संघले जनाएको छ ।

संघकै पहलमा बायाँ हाते स्पिनर सुसनले फलमाउथमा तीन महिना प्रशिक्षण गर्ने र खेल्नेछन् । उनी सेप्टेम्बरको अन्त्यमा जाने र उनको पनि सबै खर्च क्लबले गर्नेछ । संघको अध्यक्षमा पूर्व कप्तान पवन अग्रवाल छन् । केही साताअघि संघको साधारण सभाले अग्रवालको नेतृत्वमा कार्यसमिति चयन गरेको थियो

अहिले राष्ट्रिय टोलीमा नपरेपछि नरेश र सुसनलाई प्रशिक्षणको मौका मिलेको छ । नेपाल विश्व क्रिकेट लिग च्याम्पियनसिपको तयारीका क्रममा अर्को साता इङ्ल्यान्ड भ्रमणमा निस्कदैछ । विश्व क्रिकेट लिग च्याम्प्यिनसिपमा केही सातापछि नेपाल र नेदरल्यान्ड्सबीच प्रतिस्पर्धा हुँदैछ ।