काठमाडौं (हाम्रो खेलकुद) – भारतको टिकमगढमा जारी अंमर सहिद अन्तराष्ट्रिय महिला टि ट्वान्टी क्रिकेट प्रतियोगितामा नेपाली राइजिङ क्रिकेट फर वुमेन (आरसीडब्लू) क्लव सेमिफाइनलमा पुगेको छ ।

बुधबार राजस्थानलाई ४४ रनले हराउँदै समुह विजेता बन्दै सेमिफाइनलमा प्रवेश गरेको छ । आरसीडब्लूले सेमिफाइनमा विहीबार दिल्लीसँग खेल्ने छ । टस हारेर ब्याटिङ थालेका आरसीडब्लूले निर्धारित २० ओभरमा ९ विकेट गुमाउँदै १ सय ५० रन बनाएका थिए ।

आरसीडब्लूको लागि सिनियर टोलीकी अलराउन्डर आरती विडारीले सर्वाधिक ३८ रनको योगदान दिइन् । लक्ष्मी साउदले २७, रुबि पद्दोर २०, कञ्चन श्रेष्ठ र सुमन खतिवडाले समान १७ रनको योगदान दिइन् । आरसीडब्लूले प्रस्तुत गरेको १ सय ५१ रनको विजयी लक्ष्य पछ्याएको राजिस्थानले पुरै २० ओभर खेलेपनि ८ विकेट गुमाउँदै १ सय ६ रन मात्रै बनाउन सक्यो ।

राजिस्थानलाई सस्तैमा रोक्न युवा स्पिनर खुसि डंगोलले ४ ओभरमा १२ रन खर्चेर २ विकेट लिइन् । डली भट्ट र कृष्मा गुरुङले १-१विकेट लिए । आरसीडब्लूले पहिलो खेलमा टीकमगढलाई ४ विकेट र दोस्रो खेलमा पञ्जावलाई १ सय ६३ रनले हराएको थियो । समुह बी मा दिल्ली, उत्तर प्रदेश, एमी र विदर्भ छन् । दोस्रो सेमिफाइनलमा टिकमगढ र विदर्भ भिड्ने छन् । फाइनल शुक्रबार हुने छ ।