एजेन्सी – दक्षिण अफ्रिकामा जारी यू१९ विश्वकपको क्रममा अष्ट्रेलियाका ओपनर ब्याट्सम्यान ज्याक फ्रेज़र-म्याक गुर्क बादरले अनुहारमा कोपारेपछि घर फर्किएका छन् ।

गत बिहीबार अष्ट्रेलियाले इंग्ल्यान्डलाई २ विकेटले हराउँदै क्वाटरफाइनलमा स्थान पक्का गरेपछि टोलीसँगै किमबर्लीमा रहेको एक पार्कमा घुम्न गएका थिए । जसक्रममा बाँदरले उनको अनुहारमा कोपारेको थियो । परिवार र डाक्टारको सल्लाह अनुसार उनी घाइते भएको सात दिनपछि थप उपचारको लागि घर फर्केका हुन् ।

अष्ट्रेलिया जारी यू१९ विश्वकप उपाधि होडबाट बाहिरिसकेको छ । मंगलबार साविक विजेता भारतसँग क्वाटरफाइनलमा ७४ रनले पराजित हुँदै अष्ट्रेलिया उपाधि होडबाट बाहिरिन पुगेको हो । अब अष्ट्रेलियाले प्लेअफ चरणमा अफगानिस्तान र पाकिस्तान मध्य एकसँग प्रतिस्पर्धा गर्नेछ ।

घाइतेका बाबजुद भारतसँगको क्वाटरफाइनल खेल खेलेका उनी पहिलो बलमै शून्यमा रन आउट भएका थिए । ‘मलाई साथीहरुलाई छाडेर फर्किन मन छैन, यो मेरा लागि एउटा पाठ हो । आशा छ म उपचारपछि चाडैनै मैदान फर्किने छु । आफ्नो उपचारको क्रममा हेरचाह र सहयोग गर्ने सबैलाई धन्यावाद,’ अष्ट्रेलिया फर्किनुअघि उनले भने ।