एजेन्सी – यशस्वी जैसवालको उत्कृष्ट शतकमा भारत दक्षिण अफ्रिकामा जारी यू१९ विश्वकपको फाइनलमा प्रवेश गरेको छ । मंगलबार सेमिफाइनलमा पाकिस्तानलाई १० विकेटले हराउँदै भारत फाइनलमा प्रवेश गरेको हो ।

पाकिस्तानले प्रस्तुत गरेको १ सय ७३ रनको लक्ष्य भारतले ३५.२ ओभरमा कुनै विकेट नगुमाई पुरा गर्यो । भारतको जितमा ओपनर यशस्वी जैसवाल १ सय १३ बलमा ८ चौका र ४ छक्का सहित १ सय ५ रनमा अविजित रहे । जैसवालले अन्तिम बलमा आमिर अलीलाई छक्का प्रहार गर्दै आफ्नो शतक पुरा गर्नुको साथै खेल फिनिसिङ गरेका थिए । दिव्यान्शु सक्सेना ९९ बलमा ६ चौका सहित ५९ रनमा अविजित रहे ।

त्यसअघि टस जितेर ब्याटिङ थालेको पाकिस्तान ४३.१ ओभरमा अल आउट हुँदै १ सय ७२ रनमा समेटिएको थियो । उसका कप्तान रोहेल नाजिरले १ सय २ बलमा ६ चौका सहित सर्वाधिक ६२ रनको योगदान दिए । त्यस्तै अर्का ओपनर हैदर अलीले ७७ बलमा ९ चौका सहित ५६ रनमा क्याच आउट भए । मोहम्मद हरिसले २१ रन जोडे । तर पाकिस्तानका ८ खेलाडीले दोहोरो अंकमा रन छुन नसक्दा पाकिस्तान सस्तैमा समेटिएको हो ।

भारतका सुशान्त मिश्रले ८.१ ओभरमा २८ रन खर्चेर ३ विकेट लिए । त्यस्तै तीब्र गतिका बलर कात्तिक त्यागि र रवि विश्रोईले २-२ विकेट लिए । भारतले अव उपाधिको लागि बंगलादेश र न्युजिल्यान्ड मध्य एकसँग खेल्ने छ । न्युजिल्यान्ड र बंगलादेशबीच दोस्रो सेमिफाइनल विहीबार हुने छ । फाइनल आइतबार हुने छ ।