काठमाडौं (हाम्रो खेलकुद) – अर्को महिना नेदरल्यान्डसँग विश्व क्रिकेट लिग च्याम्पियनसिपमा दुई खेल खेल्ने तयारीमा रहेको नेपाली क्रिकेट टोली अभ्यासका लागि सोमबार इङ्ल्यान्ड प्रस्थान गरेको छ । नेपाली टोलीले लड्स क्रिकेट मैदानमा मेरिलिबोन क्रिकेट क्लब (एमसीसी) सँग साउन ४ गते अभ्यास मैत्रीपूर्ण खेल खेल्नेछ ।
पारस खड्का को नेतृत्वमा टोलीमा उपकप्तान ज्ञानेन्द्र मल्ल, वसन्त रेग्मी, शरद भेषवाकर, सोमपाल कामी, सागर पुन ,विनोद भण्डारी, शक्ति गौचन, सुवास खकुरेल, करण केसी, अनिलकुमार मण्डल, सन्दीप लामिछाने, बिक्रम सोब, राजु रिजाल र राजेश पुलामी मगर छन् । टेक्निकल एनालिस्ट रमण सिवाकोटी र फिजियो दिनेश भट्ट पनि टोलीसँगै इङ्ल्यान्ड गएका छन् ।
अभ्यास खेललाई लिएर कप्तान पारस खड्का र प्रशिक्षक जगत टमाटा उत्साहित छन् । पारसले भने, ‘ क्रिकेटको ऐतिहासिक ठाउँमा पहिलोपटक खेल्न पाउने हामी एसोसिएट राष्ट्रमध्ये पहिलो हुन सक्छौ । यो मौकालाई सक्दो उपयोग गर्नुपर्छ ।’
प्रशिक्षक टमाटाले भने, ‘लड्समा खेल्न पाउनु ठूलो अवसर हो, त्यसैले हामीले त्यहाँ राम्रो खेलेर सबैको ध्यान तान्नुपर्छ ।’
अभ्यास खेलपछि स्वदेश फर्केर मात्र नेपाली टोली नेदरल्यान्ड्स जानेछ ।
