काठमाडौं (हाम्रो खेलकुद) – नेपालले आईसीसी विश्वकप लिग-२ ओमान र अमेरिकासँगको त्रिकोणात्मक एकदिवसिय सिरिज अन्तर्गत शनिवार अमेरिकासँग प्रतिस्पर्धा गर्दैछ । खेल विहान ९:३० बजे टीयू क्रिकेट मैदानमा सुरु हुनेछ ।

नेपाल र अमेरिका दुवै जारी सिरिजमा पहिलो जितको खोजिमा छन् । नेपाल अमेरिकाविरुद्ध स्पष्ट जित निकाल्न चाहान्छ । ओमानसँग १८ रनले पराजित भएको नेपाल उक्त खेलमा भएको कमजोरी सुधार गर्दै मैदान उत्रने छ ।

बुधबार ओमानले प्रस्तुत गरेको १ सय ९८ रनको लक्ष्य पछ्याएको नेपाल ४६.५ ओभरमा १ सय ७९ रनमा अल आउट भएको थियो । शरद भेषवाकरले सर्वाधिक ५५ रनको योगदान दिएका थिए । शरद बायाँ हिपको मांशपेशी दुखाईको कारण सिरिज गुमाउने भएका छन् । उनको स्थानमा ओपनर तथा विकेटकिपर सुवास खकुरेल आएका छन् ।

सुवासको आगमले टोलीमा ओपनिङ जोडि परिवर्तन हुने अनुमान गरिएको छ । पहिलो खेलमा पारस खड्का र ज्ञानेन्द्र मल्लले ओपनिङ गरेका थिए । तर दुवै ओपनरको प्रर्दशन सम्झन लायक थिएन । पारस ३ र ज्ञानेन्द्र १ रनमा आउट भएका थिए । ज्ञानेन्द्रलाई कप्तानी इनिङ खेल्नुपर्ने दबाब छ । सुवास र ज्ञानेन्द्रले ओपनिङ गर्ने उच्च सम्भावना छ ।

शरद टोलीमा नहुँदा मध्यक्रम केहि कमजोर बन्न सक्छ । दीपेन्द्र सिंह ऐरीले ३६ रनको इनिङ खेलेका थिए । उपकप्तान समेत रहेका दीपेन्द्रबाट ठूलो इनिङको आशा गरिएको छ । आरिफ शेख ६ र रोहित कुमार पौडेल शून्यमा आउट भएका थिए । आरिफले टोलीमा निरन्तरता पाउने छन् । रोहितको स्थानमा बायाँ हाते अलराउन्डर कुशल मल्लको सम्भावना छ ।

विकेटकिपर विनोद भण्डारीले २६ रनको इनिङ खेलेका थिए । विनोदबाट तल्लोक्रममा ठूलो इनिङको आशा गरिएको छ । सुवासको आगमनले विनोदलाई अझ बढी जिम्मेवारी बनाउने छ । यस अघि विकेटकिपरको विकल्प थिएन ।

बलिङमा नेपालले ओमानसँगका प्रमुख चार खेलाडीलाईनै निरन्तरता दिने देखिन्छ । करण केसीले ९ ओभरमा ४७ रन खर्चेर ४ विकेट लिएका थिए । उनलाई तीब्र गतिको बलिङ युनिटमा अभिनाश बोहरालेनै साथ दिने देखिन्छ । अभिनाश ओमानसँग विकेटबिहीन बनेपनि कसिलो बलिङ गरेका थिए । १० ओभरमा १४ रन खर्चेर ३ विकेट लिएका सुशन भारी र सन्दीप लामिछानेले स्पिनरमा निरन्तरता पाउने देखिन्छ ।

सन्दीपले १० ओभरमा ४५ रन खर्चे पनि विकेट लिन सकेका थिएनन् । सन्दीपलाई विकेटको दबाब हुने छ । ब्याटिङमा भने सन्दीपले २८ रन जोडेका थिए । सम्रगमा अमेरिकाविरुद्ध टोलीमा दुई परिवर्तन सम्भावना रहन्छ ।

यता अमेरिका ओमानविरुद्ध ५० ओभरमा २ सय १३ रनमा समेटिएको थियो । उक्त लक्ष्य ओमानले ३ बल अगाडी ४ विकेट गुमाउँदै पुरा गर्यो । शीर्षक्रमका ब्याट्सम्यानले कमजोर प्रर्दशन गरेपनि मध्यक्रमका इयान होल्यान्डले ७८ बलमा ७ चौका सहित ६५ रन जोड्दै बलियो योगफलमा पुर्याएका थिए । उनलाई अक्षय होमराजले ४४ रन बनाउँदै राम्रो साथ दिएका थिए ।

एक समय १५.५ ओभरमा ५४-४ को कमजोर अवस्थामा पुगेको अमेरिकालाई पाँचौ विकेटका लागि इयान होल्यान्ड र अक्षय होमराजले ८२ रनको महत्वपूर्ण साझेदारी गरेका थिए । जसले अमेरिका शीर्षक्रम ब्याट्सम्यानमा मात्रै निर्भर छैन भन्ने प्रष्टाउछ ।

ओपनर जेभियर मार्शल १३ रनमै आउट हुन पुगेका थिए । मार्शलले वेस्ट इन्डिजबाट टेष्ट, ओडीआई र टि ट्वान्टी खेलि सकेका खेलाडी हुन् । त्यसैले उनी नेपाललाई घातक बन्न सक्छन् । स्टिभ टेलर, आरोन जोन्स र मोनक पटेल अमेरिका शीर्षक्रमका प्रमुख ब्याट्सम्यान हुन् । तीब्र गतिको बलिङमा अमेरिका कप्तान सौरभ नेत्रवलकार र दक्षिण अफ्रिका पुर्व खेलाडी रस्टी थेरन रहेका छन् । स्पिनमा करिमा गोर र तिमिल पटेलको जोडी रहनेछ ।

अमेरिकाले नेपालविरुद्ध अष्ट्रेलियन मुलका अलराउन्डर क्यामरन स्टिवन्सनलाई मौका दिन सक्छ । ओमानसँगको प्रर्दशन हेर्दा अमेरिकाको मध्यक्रमको बलिङ कमजोर देखिन्छ । शीर्ष स्थानमा रहेको अमेरिकाविरुद्ध नेपाललाई सहज भने पक्कै हुने छैन । अमेरिकालाई शीर्ष स्थानमा रहँन जित्नुपर्ने दबाब पनि छ । तर नेपालले घरेलु मैदान र हजारौं समर्थकको फाइदा उठाउँदै घरेलु मैदानमा पहिलो ओडीआई खेल जित्न चाहान्छ । सम्रगमा नेपाल र अमेरिकाबीच कडा प्रतिस्पर्धाको आशा गरिएको छ ।

नेपाली टोली :

ज्ञानेन्द्र मल्ल (कप्तान) , आरिफ शेख, दीपेन्द्र सिंह ऐरी, अभिनास बोहरा, विनोद भण्डारी, करण केसी, ललित नारायण राजवंशी, पारस खड्का, कुशल मल्ल, कमलसिंह ऐरी, रोहित कुमार पौडेल, सुशन भारी, सुवास खकुरेल र सन्दीप लामिछाने

अमेरिकाको टोली :

सौरभ नेत्रवलकार (कप्तान), स्टिभ टेलर, करिमा गोर, इयान हल्योन्ड, अक्षय होमराज, एल्मोर हचिन्सन, आरोन जोन्स, नास्तुश केन्जोगे, जेभियर मार्शल, मोनक पटेल, निसारग पटेल, तिमिल पटेल, क्यामरन स्टीवन्सन र रस्टी थेरन