काठमाडौं (हाम्रो खेलकुद) – नेपालले आईसीसी विश्वकप लिग-२ त्रिकोणात्मक सिरिज अन्तर्गत दोस्रो खेलमा अमेरिकासँग लज्जास्पद सुरुवात गरेको छ । टीयू क्रिकेट मैदानमा टस हारेर ब्याटिङ थालेको नेपालले २१ ओभरमा ४९-५ को कमजोर अवस्थामा छ ।

नेपालले सुरुवात देखि नै खराब प्रर्दशन गरिरहेको छ । ओपनर सुवास खकुरेल रस्टी थेरनको चौथो ओभरको पहिलो बलमा सिलिपमा तिमिल पटेलबाट ३ रनमा क्याच आउट भए । सुवासले १० बलको सामना गरे ।

खराब सुरुवात गरेको नेपाललाई दोस्रो विकेटका लागि पारस खड्का र ज्ञानेन्द्र मल्लले ४० रनको साझेदारी गर्दै केहि आशा दिलाएका थिए । तर ज्ञानेन्द्र क्यामरन स्टिभेन्सनको १४ औं ओभरको पाँचौ बलमा स्टिभ टेलरबाट २१ रनमा क्याच आउट भए । ज्ञानेन्द्रले ३९ बलमा ४ चौका प्रहार गरे ।

कप्तान सौरभ नेत्रवलकारको १७ औं ओभरको पहिलो बलमा उप कप्तान दीपेन्द्रसिंह ऐरी खराब शट खेल्दै मिड अफमा रहेका जेभियर मार्शलबाट क्याच हुँदै शून्यमा पेभिलिएन फर्के । १८ ओभरको अन्तिम बलमा पारसलाई क्यामरनले विकेटकिपर अक्षय होमराजबाट १९ रनमा क्याच गराएपछि नेपाल संकटमा परेको थियो । पारसले ५२ बलमा २ चौका प्रहार गरे ।

सौरभको २१ औं ओभरको पाँचौ बलमा आरिफ शेख ठूलो सट खेल्नेक्रममा वैकल्पिक फिल्डर नास्तुष केन्ज़ीगेले उत्कृष्ट एक हातले क्याच लिदै आरिफलाई २ रनमा पेभिलिएन फर्काएका छन् । क्रिजमा विनोद भण्डारी र कुशल मल्ल रहेका छन् ।