काठमाडौं (हाम्रो खेलकुद) – आईसीसी विश्वकप लिग २ त्रिकोणात्मक सिरिज अन्तर्गत पाँचौ खेलमा आज ओमान र अमेरिका भिड्दै छन् । टियू क्रिकेट मैदानमा भएको टसमा अमेरिका कप्तान सौरभ नेत्रवालकारले जितेर पहिला फिल्डिङ गर्ने निर्णय लिएका छन् ।

नेपाललाई १८ र ८ विकेटले हराएको ओमानको मनोबल उच्च छ । ओमानले अमेरिकालाई पहिलो खेलमा ६ विकेटले हराएको थियो । उक्त खेलमा ओमानले अमेरिकाले प्रस्तुत गरेको २ सय १४ रनको लक्ष्य ३ बल अगाडी पुरा गरेको थियो । ओमानले नेपाललाई दोस्रो खेलमा ८ विकेटले हराउने क्रममा २ सय ५० रनको लक्ष्य ४७.२ ओभरमा २ विकेट गुमाउँदै पुरा गरेको थियो । जसक्रममा अकीब इलियासले शतकीय इनिङको साथै ४ विकेट लिएका थिए ।

अकीब आजको खेलमा पनि नायक बन्न सक्छन् । मोहम्मद नदीमले अमेरिकाविरुद्ध ३ विकेट लिनुको साथै ५५ रनमा अविजित रहेका थिए । नेपालसँग पहिलो खेलमा ६९ रनको इनिङ खेलेका नदीमले नेपालविरुद्ध दोस्रो खेलमा ३ विकेट लिएका थिए । उनी पनि आजको खेलमा अमेरिकालाई घातक बन्न सक्छन् ।

त्यस्तै नेपालविरुद्ध ७५ र ओमानसँग ६५ रनको इनिङ खेलेका अमेरिका अलराउन्डर इयान होल्यान्ड ओमानलाई घातक बन्न सक्छन् । ओमानको जारी त्रिकोणात्मक सिरिजको अन्तिम खेल हुँदा सुखद अन्त्य गर्ने सोचमा छ । सुरुवाती दुबै खेल हारेको अमेरिका पहिलो जित निकाल्ने सोचमा छ ।