एजेन्सी – भारतसँगको तीन खेलको एकदिवसिय सिरिज घरेलु टोली न्युजिल्यान्डले क्लिनस्वीप गरेको छ । मंगलबार तेस्रो तथा अन्तिम खेलमा न्युजिल्यान्डले भारतलाई ५ विकेटले पराजित गर्दै सिरिज ३-० ले जितेको हो ।

जितका लागि २ सय ९७ रनको विजयी लक्ष्य पक्ष्याएको न्युजिल्यान्डले ४७.१ ओभरमा ५ विकेट गुमाउँदै पुरा गर्यो । न्युजिल्यान्डको जितमा ओपनर हेनरी निकोलसले १ सय ३ बलमा ९ चौका सहित सर्वाधिक ८० रनको योगदान दिए । निकोलसलाई ३३ औं ओभरको पाँचौ बलमा शार्दुल ठाकुरले विकेटकिपर लोकेश राहुलबाट क्याच आउट गराएका थिए ।

अर्का ओपनर मार्टिन गुप्टिलले ४६ बलमा ६ चौका र ४ छक्का सहित ६६ रन जोड्दै राम्रो सुरुवात दिलाएका थिए । गुप्टिललाई १७ औं ओभरको तेस्रो बलमा युजभेन्द्र चहलले बोल्ड आउट गरेका थिए । कप्तान केन विलियम्सन २२, रस टेलर १२ र जेम्श निशम १९ रनमा आउट भए ।

तल्लोक्रममा कोलिन डी ग्रान्डहोमले आक्रामक ब्याटिङ गर्दै २८ बलमा ६ चौका र ३ छक्का सहित ५८ रनमा अविजित रहँदै टोलीको सहज जित पक्का गरे । विकेटकिपर टम लेथम ३४ बलमा ३ चौका प्रहार गर्दै ३२ रनमा अविजित रहे । छैटौं विकेटका लागि लेथम र ग्रान्डहोमले ८० रनको अविजित साझेदारी गर्दै सहज दिलाएका थिए । भारतका स्पिनर युजभेन्द्र चहलले १० ओभरमा १ मेडन सहित ४७ रन खर्चेर ३ विकेट लिए । शार्दुल ठाकुरले ९.१ ओभरमा ८७ रन खर्चेर १ विकेट लिए । रविन्द्र जडेजाको नाममा १ विकेट रह्यो ।

त्यसअघि टस हारेर ब्याटिङको निम्तो पाएको भारतले निर्धारित ५० ओभरमा ७ विकेट गुमाउँदै २ सय ९६ रन बनाएको थियो । विकेटकिपर लोकेश राहुलले १ सय १२ रनको शतकीय इनिङ खेलेपनि टोलीको हार टार्न सकेनन् । ४७ औं ओभरको चौथो बलमा हशिम बेनेटले काइल जामिसनबाट क्याच गराउनु अघि राहुलले १ सय १३ बलमा ९ चौका र २ छक्का प्रहार गरे ।

राहुलले १ सय ४ बलमा आफ्नो ओडीआई करिअरको चौथो शतक पुरा गरेका थिए । लगतै अर्को बलमा बेनेटले मनिष पान्डेलाई मिचेल सान्टनरबाट ४२ रनमा क्याच आउट गराए । मनिषले ४८ बलमा २ चौका प्रहार गरे । पाँचौ विकेटका लागि लोकेश राहुल र मनिष पान्डेले १ सय ७ रनको महत्वपूर्ण शतकीय साझेदारी गरेका थिए ।

काइल जामिसनले दोस्रो ओभरको अन्तिम बलमा ओपनर मयंक अग्रवाललाई १ रनमा बोल्ड आउट गर्दै भारतलाई सुरुवाती समय दबाबमा राखे । सातौं ओभरको चौथो बलमा हशिम बेनेटले कप्तान विराट कोहलीलाई ९ रनमा जामिसनबाट क्याच गराए । पृथ्वी शाले ४२ बलमा ३ चौका र २ छक्का सहित ४० रन जोड्दै इनिङ अघि बढाए । शा १३ ओभरको पहिलो बलमा रन आउट भए ।

युवा ब्याट्सम्यान श्रेयस ऐरले खराब सुरुवात गरेको भारतलाई ६३ बलमा ९ चौका सहित ६२ रन जोड्दै ठूलो योगफलको बाटो देखाए । त्यसअघि श्रेयस ऐर र राहुलले चौथो विकेटका लागि १ सय १० बलमा १ सय रनको साझेदारी गर्दै इनिङ उकासेका थिए । श्रेयरलाई ३१ औं ओभरको तेस्रो बलमा जेम्श निशमले कोलिन डी ग्रान्डहोमबाट क्याच गराए ।

शार्दुल ठाकुर ७ रनमा आउट हुँदा रविन्द्र जडेजा र नवदीप सैनी ८-८ रनमा अविजित रहे । न्युजिल्यान्डका तीब्र गतिका बलर हशिम बेनेटले १० ओभरमा १ मेडन ६४ रन खर्चेर ४ विकेट लिए । काइल जामिसन र जेम्श निशममा १-१ विकेट रह्यो । भारत पहिलो खेलमा ४ विकेट र दोस्रो खेलमा २२ रनले पराजित भएको थियो । न्युजिल्यान्डले पाँच टि ट्वान्टी सिरिज ५-० ले हारेको थियो । भारत र न्युजिल्यान्डबीच थप दुई टेष्ट हुने छ ।