काठमाडौं (हाम्रो खेलकुद) – नेपालले आईसीसी विश्वकप लिग २ त्रिकोणात्मक एकदिवसिय सिरिज अन्तर्गत बुधबार अन्तिम खेलमा अमेरिकासँग खेल्दैछ । खेल विहान ९:३० बजे टीयू क्रिकेट मैदानमा सुरु हुनेछ ।

नेपालले पहिलो खेलमा अमेरिकालाई ३५ रनले हराएको थियो । ओमानसँग नेपाल १८ रन र ८ विकेटले पराजित भएको थियो । यता अमेरिका पनि ओमानसँग ६ विकेट र ९२ रनले पराजित हुन पुग्यो । अमेरिका अन्तिम खेलमा जित निकाल्दै घर फर्किन चाहन्छ । घरेलु टोली नेपाल अमेरिकामाथि लगातार दोस्रो जित निकाल्दै पहिलो घरेलु त्रिकोणात्मक सिरिज सुखद अन्त्य गर्ने प्रयासमा हुनेछ । ओमानले शत प्रतिशत जित निकाल्दै नेपाल भ्रमण अन्त्य गरेको छ ।

नेपालले ओमानसँग दोस्रो खेलमा २ सय ४९ रन बनाएपनि ८ विकेटको हार बेहोरेको थियो । उक्त प्रर्दशनले ब्याटिङमा आशा बढाएपनि बलिङ चिन्ता उत्पन्न भएको छ । नेपालविरुद्ध ओमानका कप्तान जिशान मकसुद र अकीब इलियासले १ सय ६७ रनको अविजित साझेदारी गर्दै जित पक्का गरेका थिए । प्रमुख बलरनै विकेटविहीन बन्दा नेपालले बलियो योगफल बनाएपनि पराजित हुन पुगेको थियो ।

आज नेपालले टोलीमा एक परिवर्तन गर्ने सम्भावना छ । नेपालले ओमानविरुद्ध तीब्र गतिका बलर अभिनाश बोहरालाई बेन्चमा राख्दै कमलसिंह ऐरीलाई डेब्यू गराएको थियो । तर कमलले ४ ओभरमा २९ रन खर्चिदा विकेट लिन सकेनन् । अमेरिका र ओमानसँग दुबै खेलमा शून्यमा आउट भएका उप कप्तान दीपेन्द्र सिंह ऐरीलाई ठूलो इनिङ खेल्नुपर्ने दबाब छ ।

यता अमेरिकासँग डेब्यूमा आक्रामक ५० रन जोडेका कुशल मल्लले ओमानसँग २८ रन जोड्दै सनसनी मच्चाएका थिए । कुशलले दुबै खेलमा १-१ विकेट लिएका थिए । कुशलको अलराउन्ड प्रर्दशन नेपालको लागि महत्वपूर्ण हुने छ । कुशलको आगमनले स्पिन अट्याक थप मजबुत बनेको छ ।

प्रमुख ब्याट्सम्यान पारस खड्काले ठूलो इनिङ खेल्न सकेका छैनन् । पारसबाट ठूलो इनिङको आशा गरिएको छ । अमेरिकाविरुद्ध ५९ र ओमानविरुद्ध ३५ रन जोडेका विनोद भण्डारीको प्रर्दशनले तल्लोक्रम ब्याटिङ बलियो बनेको छ । करण केसीले ओमान र अमेरिकासँग सुरुवाती खेलमा ४-४ विकेट लिएका थिए । ओमानसँग भने उनी विकेट विहीन बन्न पुगे । करणबाट सुरुवाती खेलको लयलाई निरन्तरता दिने अनुमान गरिएको छ ।

प्रमुख स्पिनर सन्दीप लामिछानेले ओमानसँग १० ओभरमा ६५ रन खर्चिदै महँगो सावित भएका थिए । त्यसैले सन्दीपबाट सुधारको अपेक्षा छ । यता अमेरिकाको टोलीमा स्पिनर अभाव देखिन्छ । प्रमुख स्पिनर करिमा गोरले विकेट लिन सकिरहेका छैनन् । अर्का स्पिनर तिमिल पटेललाई ओमानसँग अमेरिकाले बेन्चमा राखेको थियो ।

नेपालविरुद्ध निसर्ग पटेल घातक बन्न सक्छन् । स्पिनर पटेलले तल्लोक्रममा आक्रामक ब्याटिङ गर्ने गर्दछन् । उनले ओमानसँग ३६ बलमा ४ चौका र ४ छक्का सहित ५२ रनको इनिङ खेलेका थिए । शीर्षक्रमका ब्याट्सम्यान चल्न नसक्दा अमेरिकालाई ठूलो दवाव थपिएको छ ।

उसका प्रमुख ब्याट्सम्यान जेभियर मार्शल, स्टिभ टेलर र आरोन जोन्सले ठूलो इनिङ खेल्न नसक्दा उसको ब्याटिङ कमजोर मानिएको छ । बलरद्वय कप्तान सौरभ नेत्रवालकर र रस्टी थेरन राम्रो लयमा छन् । नेपालविरुद्ध ७५ र ओमानसँग ६५ रनको इनिङ खेलेका अमेरिका अलराउन्डर इयान होल्यान्ड पुन नायक बन्न सक्छन् ।

सम्भावित प्लेइङ ११ :

ज्ञानेन्द्र मल्ल (कप्तान), आरिफ शेख, दीपेन्द्र सिंह ऐरी, अभिनाश बोहरा, विनोद भण्डारी (विकेटकिपर), करण केसी, पारस खड्का, कुशल मल्ल, सुशन भारी, सुवास खकुरेल र सन्दीप लामिछाने

सम्भावित बेन्च :

रोहित कुमार पौडेल, ललित नारायण राजवंशी र कमल सिंह ऐरी