काठमाडौं (हाम्रो खेलकुद) – विश्व लिग क्रिकेट च्याम्पियनसिपको तयारीका लागि इङ्ल्यान्ड भ्रमणमा निस्केको नेपाली क्रिकेट टोलीले मैत्रीपूर्ण खेलमा जित हासिल गरेको छ । उप कप्तान ज्ञानेन्द्र मल्ल र शदर भेषावकरको अर्धशतकसँगै नेपालले स्थानिय फ्रि फरेस्टरविरुद्ध निर्धारित ४० ओभरमा ९ विकेट गुमाएर २ सय ३५ रन बनाएको थियो । जवाफमा फ्रि फरेस्टर २९.१ ओभरमा सबै विकेट गुमाएर १ सय ६ रन मात्र बनाउन सक्यो ।
ब्याटिङका क्रममा उपकप्तान ज्ञानेन्द्र मल्ल ।
लन्डनस्थित इन्डियन जिमखाना मैदानमा ओपन अनिलकुमार मण्डल सस्तैमा आउटभएपछि अर्का ओपन ज्ञानेन्द्र र शरदले दोस्रो विकेटका लागि सय रनको साझेदारी गरेका थिए । ६६ बल खेलेका ज्ञानेन्द्रले ९ चौका साथ टोलीका लागि सबैभन्दा बढी ७४ रन बनाए । ७५ बलमा ६ चौका र १ छक्कासहित शरदले ५० रन जोडे । कप्तान पारस खड्काले २९ बलमा ५ चौका र १ छक्कासहित ४० रन थपे । सागर पुनले २१, राजेश पुलामीले ११, सोमपाल कार्मी ८, विनोद भण्डारीले ७ रन बनाए । राजु रिजाल ८ र बसन्त रेग्मी शुन्य रनमा अविजित रहे ।
जवाफमा फ्रि परेस्टर नेपालको धारिलो बलिङ सामू लामो समय टिक्न सकेन । नेपालका लागि विक्रम सोबले ४, पल्सर स्पोर्टस अवार्डको पिपल्स च्वाइस र बर्षका उत्कृष्ट खेलाडी युवाको मनोनयनमा पर्न सफल सन्दीप लामिछानेले ३, करण केसीले २ र शक्ति गौचनले १ विकेट लिए ।
विश्व क्रिकेट लिग च्याम्पियनसिप अन्तर्गत नेपाल र नेदरल्यान्ड्सबीच अगस्ट १३ र १५ मा दुई खेल हुनेछ । इङ्ल्यान्ड भ्रमणबाट स्वदेश फर्केर नेपाली टोली नेदरल्यान्ड्स जानेछ ।
