काठमाडौं (हाम्रो खेलकुद) – इङ्ल्यान्ड भ्रमणमा रहेको नेपाली क्रिकेट टोलीले दोस्रो अभ्यास खेल पनि जितेको छ । नेपाली टोलीले ट्वान्टी २० क्रिकेटमा इन्डियन जिमखानालाई २० रनले हराएको छ । पहिले ब्याटिङ गरेको नेपालले २० ओभरमा ७ विकेट गुमाएर १ सय ६२ रन बनाएको थियो । जवाफमा घरेलु टोली इन्डियन जिमखानाले सबै विकेट गुमाएर १ सय ४२ रन मात्र बनाउन सक्यो । पहिलो मैत्रीपूर्ण खेलमा नेपालले फ्रि फरेस्टरलाई १ सय २९ रनले हराएको थियो ।

 

नेपाली टोलीका टेक्निकल एनलिस्ट रमन शिवाकोटीका अनुसार बिहीबार टस जितेर इन्डियन जिमखानाले नेपाललाई ब्याटिङको निम्तो दिएको थियो । इन्डियन जिमखानालाई लक्ष्यमा पुग्न नदिन विक्रम सोब, करण केसी, शक्तिप्रसाद गौचन र सागर पुनले समान २ विकेट लिए भने कप्तान पारस खड्काले १ विकेट लिएका थिए । घरेलु टोलीका लागि पुनित के मेहराले सबै भन्दा बढी ४७ रन बनाएका थिए । उनलाई पारसले एलबिडब्यू आउट गरेका थिए ।
त्यसअघि नेपालले सागर पुनको अर्धशतकको मद्दतमा ठूलो स्कोर खडा गरेको थियो । चोटमुक्त भएर फर्केका ओपनर सुवास खकुरेल ६ रन बनाएपनि उनले पहिलो विकेटका लागि उपकप्तान उपकप्तान ज्ञानेन्द्र मल्लसँग ३३ रनको साझेदारी गरे । ज्ञानेन्द्र र सागरले दोस्रो विकेटका ३६ रनको साझेदारी गरे । ज्ञानेन्द्रले २० बलमा ५ चौका साथ ३८ रन बनाएका थिए । ४८ बल खेलेका सागरले ४ चौका र १ छक्कासहित ५६ रन जोडे । सागरले दुई विकेट पनि लिएका थिए । राजु रिजालले अविजित २४ रन बनाए । उनले ११ बल खेल्दै ३ चौका र १ छक्का प्रहार गरे । पारसले ८ बलमा ३ चौका साथ १५ रन थपे । राजेश पुलामीले १३ रन बनाए ।
अर्को महिना विश्व क्रिकेट लिग च्याम्पियनसिप अन्तर्गत नेदरल्यान्ड्ससँग दुई खेल खेल्नका लागि तयारीका लागि नेपाली टोली इङ्ल्यान्ड भ्रमणमा निस्केको हो ।