काठमाडौं (हाम्रो खेलकुद) – फ्रेबुअरी १४ अर्थात नेपाली क्रिकेटको एक अविस्मरणीय दिन । दुई वर्षअघि आजकै दिन नेपालले आईसीसी विश्व डिभिजन लिग २ मा नामिबियामा क्यानडालाई १ विकेटले पराजित गर्दै विश्वकप छनोटमा पुगेको थियो ।

फ्रेबुअरी १४ दिन धेरैको ध्यान प्रणय दिवसमा थियो । तर नेपाली क्रिकेट समर्थक, सुभचिन्तक र खेलाडी नामिबियामा चलि रहेको डिभिजन २ मा क्यानडासँगको नतिजाको पर्खाइमा थिए । जुन नतिजाले नेपाली क्रिकेटको भविष्य निर्धारण गर्थ्यो । जित निकाले शीर्ष स्थानमा रहँदै मार्चमा जिम्बावेमा हुने एक दिवसिय विश्वकप छनोटमा र पराजित भए अन्धकार बाटोमा जाने थियो ।

विश्वकप छनोटबाटै ओडीआई मान्यता पाउने हुँदा नेपाल शीर्ष दुईमा पर्ने लक्ष्यका साथ नामिबिया पुगेको थियो । ओडीआई खेल्ने सबै खेलाडीको मन र मस्तिष्कमा थियो । तर ओमानसँगको ६ विकेटको हारले नेपालको सपनामा ठूलो धक्का लाग्यो । अन्तिम खेलमा क्यानडालाई पराजित गर्नै पर्ने समिकरण बन्यो ।

क्यानडाले प्रस्तुत गरेको १ सय ९५ रनको लक्ष्य पछ्याएको नेपाल एक समय फराकिलो हार नजिक थियो । तर तीब्र गतिका बलिङ अलराउन्डर करण केसीले उत्कृष्ट अविश्वसनिय प्रर्दशन गर्दै अन्तिम बलमा १ विकेटको जित दिलाउँदै जिम्वावेको टिकट पक्का गरे ।

टस हारेर ब्याटिङको निम्तो पाएको क्यानडाले निर्धारित ५० ओभरमा ८ विकेट गुमाउँदै १ सय ९४ रन बनायो । जुन योगफल उक्त विन्डहोक मैदानको पिचमा पुरा गर्न सहज थिएन । अर्कोतर्फ नेपालको ब्याटिङ प्रतियोगितामा राम्रो हुन सकेको थिएन । ओपनर श्रीमन्था विजयरत्नेले १ सय ३ रनको शतकीय अविजित खेलेपछि क्यानडाले बलियो योगफल प्रस्तुत गरेको थियो ।

नेपालको सुरुवात खराब रह्यो । ज्ञानेन्द्र मल्ल ९ र पारस खड्का शुन्यमा आउट भएपछि क्यानडा सुरुवात हाबी बन्यो । दिलिप नाथ ४१, दीपेन्द्र सिंह ऐरी १८ शरद भेषवाकर १ रनमा आउट हुँदा नेपाल २५ ओभरमा ८१-५ को कमजोर अवस्थामा पुग्यो । आरिफ शेख २६, रोहित कुमार पौडेल २७, वसन्त रेग्मी शुन्य र सोमपाल कामी ७ मा आउट भएपछि नेपाल ४२.१ ओभरमा १४४-९ को दयनिय अवस्थामा पुगेको थियो ।

जितको लागि नेपाललाई ५१ रन र क्यानडालाई १ विकेट आवश्यक थियो । करण केसी र सन्दीप लामिछाने क्रिजमा थिए । करण र सन्दीप दुबै बलर हुँदा जितको आशा मारिसकेका थिए । स्वयं पेभिलियनमा बसेका खेलाडी र प्रशिक्षक जगत टमटाले पनि जितको आशा मारेको खेलपछि बताएका थिए ।

तर करणले हार मानेका थिएनन् । क्यानडाका खेलाडी बाउन्ड्री लाइन बाहिर जितको खुशी मनाउन थालि सकेका थिए । जसले करणलाई जसरी पनि जिताउँछु भन्ने इख जाग्यो । करणले ४४ औं ओभरको चौथो बलमा चौका र अन्तिम बलमा छक्का प्रहार गरे । ४५ औं ओभरमा कुनै जोखिम उठाएनन् ।

करणले ४६ औं ओभरको अन्तिम बलमा सेसिल परवेजलाई चौका प्रहार गरेपछि जितको लागि २४ बलमा ३२ रन आवश्यक थियो । करणले ४८ औं ओभरको चौथो बलमा परवेजलाईनै छक्का प्रहार गरेपछि जितको आशा बढ्यो । करण अन्तिमसम्म टिक्ने हो भने र सन्दीपले साथ दिए जितको सम्भावना देखिन्थ्यो ।

सत्सिमरनजित धिन्दसालाई करणले ४९ औं ओभरको चौथो बलमा छक्का र पाँचौ बलमा चौका प्रहार गरेपछि अन्तिम ६ बलमा जितको लागि ८ रन आवश्यक रह्यो । करणले जुन इनिङ खेलेका थिए जितको आशा बढाएको थियो । तर परवेजले अन्तिम ओभरमा सुरुवात चारै बल लगातार योर्कर फालेपछि करणले कुनै रन लिएनन् । खेल थप रोमाञ्चक बन्यो ।

तर करणले पाँचौ बलमा कडा छक्का प्रहार गर्दै जित नजिक पुर्याए । लगत्तै अर्को बल वाइड फाल्दा अन्तिम बलमा १ रन जोड्दै करणले १ विकेटको जित दिलाए । करण ३१ बलमा ४२ बलमा ३ चौका र ४ छक्का सहित ४२ रनमा अविजित रहे । करणको त्यो अद्भुत प्रर्दशनले नेपालले जिम्बावेको टिकट काट्यो ।

उता जितको खुसि मनाउन थालि सकेका क्यानडाका खेलाडीमा एक्कासी निराश बने । परवेज मैदानमै रोए । क्यानडाका खेलाडी पेभिलियनमा रुवाबासी चल्यो । पछि हात मिलाउन मैदानमा क्यानडाका केहि खेलाडीमात्रै आएका थिए । करणलाई उचालेर सबैले मैदान घुमाउँदै चुम्मन र अंगालो मारेर खुसि मनाई रहे । नेपाली खेलाडीमा खुसिको सिमना रहेन । करणको उचाई रातारात चुलियो ।

सन्दीप ३८ मिनेटमा १८ बलको सामना गर्दै ५ रनमा अविजित रहे । क्रिजमा ४२ मिनेत बिताएका करणले नेपालको भविष्यनै फेरेका थिए । करणको त्यो ४२ मिनेटको अविश्वसनिय दुर्लभ इनिङले नेपालले विश्वकप छनोट हुँदै ओडीआई टोली बनेको छ । नेपालले १० ओडीआई खेल खेलिसकेको छ । करणले त्यो इनिङ नखेलेका भए सायद नेपाल आज डिभिजन २,३ तीर अल्झेर बस्थ्यो होला ।

त्यसैले आजको दिनलाई नेपाली क्रिकेट समर्थक, सुभचिन्तक र खेलाडीले ‘करण डे‘ भन्ने गर्दछन् । ओडीआई मान्यतासँगै करणको त्यो इनिङको अविस्मरण हुन्छ । करणले आफ्नो क्रिकेट करिअरमा जतिसुकै उचाई लिएपनि त्यो इनिङ कहिल्य भुल्ने छैनन् । नेपाली क्रिकेटमा करणको त्यो इनिङ सधैं अविस्मरणीय रहिरहने छ ।