बेलायत भ्रमणमा रहेको नेपाली राष्ट्रिय क्रिकेट टोलीले शुक्रबार भएको अभ्यास खेलमा जित हात पार्दै लगातार तेश्रो विजय हासिल गरेको छ ।
क्लब क्रिकेट कन्फ्रेन्स (सिसिसी) लाई ४ विकेटले हराउँदै नेपाली टोलीले तेश्रो जित आत्मसात हो। नेपालले पहिलो खेलमा फ्री फरेस्टर क्लबलाई ४० ओभरको खेलमा १ सय २० रनले हराएको थियो भने बिहीबारको ट्वान्टी–२० खेलमा इन्डियन जिमखानामाथि २० रनको जित दर्ता गरेको थियो ।
आज बिहान भएको खेलमा नेपालले २ सय २७ रनको लक्ष्य पाएको थियो। कप्तान पारस खड्काको अर्धशतकको मद्दतले नेपाली टोलीले ४६.१ ओभरमा ६ विकेट गुमाएर २ सय ३० रन बनाउदैं लक्ष्य पुरा गरेको थियो । ६६ बल खेलेका कप्तान पारसले ८ चौका र १ छक्का प्रहार गर्दै ६७ रन बनाए । पहिलो विकेटका लागि अनिल कुमार मण्डल (४३) र उपकप्तान ज्ञानेन्द्र मल्लको (३६) जोडीले ६७ रनको साझेदारी गरे । उनले ६४ बलमा ४ चौका प्रहार गरेका थिए । अन्य खेलाडीमा सगर पुन (४), राजेश पुलामी (१६), विनोद भण्डारी (६), शरद भेषावकरले (१९) र राजु रिजाल (१७*) रनमा अविजित रहे। सिसिसीका लागि लुक च्यापम्यानले ३ तथा रिर्चड हिन्ड्ले, अहमद इल्च र जेमी साउथगेटले समान १ विकेट लिए ।
खेलमा टस जितेर पहिले ब्याटिङ गरेको सिसिसीले निर्धारित ५० ओभरमा सात विकेट गुमाऊँदै २ सय २६ रन बनाएको थियो । ओपनर सागर पटेलले (६५) र अर्का ब्याट्सम्यान स्टिभ सिलउडले (६७) रन बनाऊँदै टोलीलाई मजबुत बनाएका थिए । युवा बलर सन्दीप लामिछानेले यी दुबैको विकेट लिदैं नेपालको लागि राम्रो प्रदर्शन गरेका थिए । उनले १० ओभरमा ३६ रन खर्चे । सिसिसीका लागि दोहोरो स्कोरमा निक एस स्टेभेन्सले ३१ र साउथगेटले १७ रन रहे । नेपालका लागि सन्दिप्सहित ज्ञानेन्द्र मल्ल र सोमपाल कामीले समान २ विकेट तथा पारस र करन केसीले १-१ विकेट लिएका थिए ।
अर्को महिना विश्व क्रिकेट लिग च्याम्पियनसिपमा नेपालले नेदरल्यान्ड्सको सामना गर्ने भएकाले मेरिलेबोन क्रिकेट क्लबको निम्तोमा नेपाली टोली बेलायत पुगेको हो । नेदरल्यान्ड्ससंगको खेल अगस्ट १३ र १५ मा नेदरल्याण्डस्मै हुनेछ ।
