भूपेन्द्र जिसी, काठमाडौं

असारमा मलेसियासँग दुई खेलको टि२० आई सिरिज खेल्दै २०७६ वर्षको सुरुवात गरेको नेपाली राष्ट्रिय क्रिकेट टोलीले चैतमा थाईल्यान्डमा एसिसी इस्टर्न रिजन टि२० क्रिकेट प्रतियोगिता खेल्दै अन्त्य गर्यो । यो वर्ष नेपाली क्रिकेटले थोरै सफलता हात पार्दा धेरै असफलता बेहोर्यो ।

२०७६ मा ३१ अन्तर्राष्ट्रिय खेलमा नेपाल १४ खेलमा जित हासिल गर्दा १५ मा पराजित भयो । दुई खेलको नतिजा वर्षाको कारण रद्द भयो । राष्ट्रिय महिला टोलीले यो वर्ष ४ मात्र अन्तर्राष्ट्रिय खेल खेल्दा २ मा जित र २ हार बेहोरे । एकै वर्षमा पाँच विश्व कीर्तिमान, तीन वर्ष देखीको क्यानको निलम्बन फुकुवा, क्यानमा नयाँ नेतृत्व लगायत केहि सकारात्मक पक्ष रहेपनि प्रतियोगिता र सिरिजमा खेलाडीको गैर जिम्मेवार प्रर्दशनले आशा अनुरुप नतिजा आउन सकेन ।

असार २८ र २९ मा नेपालले मलेसियासँगको दुई टि२० सिरिजमा क्लिनस्वीप गर्दै इतिहास रचेको थियो । नेपालले २०७६ मा पहिलो सिरिजनै क्लिनस्वीप गरेपछि धेरैले यो वर्ष धेरै सफल रहने अनुमान गरेका थिए । तर साउन ६ देखि १२ सम्म सिंगापुरमा भएको आइसिसी टि२० एसिया विश्वकप छनोटमा खराब प्रर्दशन गरेपछि नेपाल आश्चर्यजनक रुपमा बाहिरिएको थियो । नेपाल तुलानात्मक रुपमा कमजोर टोली सिंगापुर र कतारसँग पराजित हुँदै टि२० विश्वकप २०२० को यात्राबाट बाहिरिएको थियो ।

नेपालले असोजमा सिंगापुर, जिम्बावेसँग त्रिकोणात्मक सिरिज खेलेको थियो । जसमा पारसले पहिलो खेलमा सिंगापुरविरुद्ध लक्ष्य पछ्याउने क्रममा शतक प्रहार गर्दै टि२० आईमा लक्ष्य पछ्याउँदा शतक प्रहार गर्ने पहिलो कप्तान बने । असोजमा नेपालले ओमानमा पाँच राष्ट्र सम्मिलित टि२० सिरिजमा औसत प्रर्दशन गरेको थियो ।

कात्तिकमा बंगलादेशमा भएको एसिसी एसिया इमर्जिङ टिम्स एसिया कपमा पनि नेपाल खराब प्रर्दशन गर्दै समुह चरणबाटै बाहिरियो । लगातार हारले निरास बनाएको नेपाली क्रिकेटलाई मंसिरमा घरेलु मैदानमा १३ औं दक्षिण एसियाली खेलकुद (साग) मा स्वर्ण जित्दै उक्त पिडा बिर्साउने राम्रो अवसर थियो ।

मंसिर १५ देखि २४ सम्म नेपालमा भएको १३ औं सागमा नेपाललाई स्वर्ण जित्ने अवसर थियो । तर सागमा पनि खराब प्रर्दशन गर्दै कास्यमा चित्त बुझायो । महिला र पुरुष दुबै टोलीले कमजोर माल्दिभ्सलाई हराउँदै कास्य जितेका थिए । जुन महिला टोलीले खेलेको यो वर्षको एक मात्र अन्तर्राष्ट्रिय प्रतियोगिता रह्यो ।

माघमा घरेलु मैदानमा भएको आइसिसी विश्वकप लिग२ अन्तर्गत त्रिकोणात्मक सिरिजमा ओमानसँग दुबै खेलमा पराजित हुँदा अमेरिकालाई दुवै  खेलमा हराएको थियो । नेपालले टि२० विश्वकपको अवसर गुमाएपनि टेष्ट टोलीसँग एसिया कप टि२० खेल्ने राम्रो अवसर थियो । तर खेलाडीको गैर जिम्मेवारी प्रर्दशनले त्यो सपना पनि पुरा हुन सकेन । चैत्रमा थाईल्यान्डमा भएको एसिसी इस्टर्न रिजन टि२० प्रतियोगितामा नेपाल हङकङ र मलेसियासँग पराजित हुँदै एसिया कप यात्रा बाहिरिदै यो वर्ष सकायो ।

यस वर्ष प्रशासन क्षेत्रमा केहि सुधार हुँदा उतारचढाव रह्यो । आइसिसीले क्यानमाथि तीन वर्ष देखी लगाएको प्रतिवन्ध असोज २७ मा सर्सत रुपमा फुकुवा गर्यो । जुन वर्ष नेपाली क्रिकेटको सर्वाधिक ठुलो उपलब्धी मान्नुपर्छ । क्यानले पनि नयाँ नेतृत्व पायो । तर एक दशकदेखि नेपाली क्रिकेटको कप्तानी सम्हाल्दै आएका पारस खड्काले निलम्बन फुकुवा भएको २४ घण्टा बित्न नपाउँदै एक्कासी राजिनामा दिदा त्यो खुसि लामो समय टिक्न पाएन ।

लगातार राम्रो प्रर्दशन गर्दै आएका पारसको एक्कासी राजिनामाले सबैलाई आश्चर्य पार्यो । यस वर्ष नेपाली क्रिकेटबाट अन्तर्राष्ट्रिय स्तरमा ५ विश्व कीर्तिमान बने । जसले अन्तर्राष्ट्रिय स्तरमा नेपाली क्रिकेटको चर्चा चलिरह्यो । सागमा स्पिनर अञ्जली चन्दले माल्दिभ्सविरुद्ध २.१ ओभरमा कुनै रन नदिई ह्याट्रिक सहित ६ विकेट लिदै टि२० इतिहासकै उत्कृष्ट प्रर्दशन गर्दै सनसनी मच्चाइन् ।

अर्कोतर्फ अमेरिकाविरुद्ध कुशल मल्लले रोहित कुमार पौडेलको कीर्तिमान तोड्दै कम उमेरमा अर्ध शतक प्रहार गर्ने खेलाडी बने । अमेरिकालाई १२ ओभरमा ३५ रनमा अल आउट गर्दै ओडिआईमा कम योगफलमा रोक्न सफल हुँदा सबैभन्दा कम बलमा अल आउट गर्ने कीर्तिमान पनि कायम गरेको थियो । नेपालले घरेलु मैदानमा आइसिसी विश्वकप लिग२ अन्तर्गत ओमान र अमेरिकासँग घरेलु मैदान टियुमा पहिलो पटक ओडिआई खेल खेल्नु यस वर्षको अर्को सफल पक्ष हो ।

नेपाली यु१९ टोली २०७५ चैत्र ३० मा मलेसियामा भएको आइसिसि यु१९ विश्वकप छनोटमा युएईसँग १ रनले पराजित हुँदै विश्वकपको अवसर गुमाउँदा नेपाली समर्थकको लागि नयाँ वर्ष निकै खल्लो र निराश बनेको थियो । कमजोर प्रतिस्पर्धीसँग पराजित हुँदै टि२० विश्वकप र एसिया कप जस्ता ठुला अवसर गुमाएको नेपाली क्रिकेटलाई अर्को चिन्ता खेलाडीको गैर जिम्मेवार प्रर्दशन पनि रह्यो । पछिल्लो समय केहि खेलाडीमा बाहेक अन्यमा जिम्मेवार देखिदैन । जुन अर्को ठुलो चिन्ताको विषय रह्यो ।

नेपालले गुमाएका एक दुई खेल बाहेक अन्य सबै सहजै हारेको छ । खेलाडी जिम्मेवार नबनेको खण्डमा आगमी दिनमा अझैं ठुला अवसर नगुमाउला भन्न सकिदैन । अर्कोतर्फ खेलाडीमा गुट रहेको विषयले पनि बेला बेलामा चर्चा पायो । तर खेलाडी भने अस्विकार गर्दै आएका छन् । कोरोना भाइरस (कोभिड १९) को कारण २०७७ नेपालले पहिलो खेल कहिले र कहाँ खेल्ने भन्न सक्ने अवस्था छनै । तर २०७६ खराब वर्षलाई बिर्संदै नेपाली क्रिकेट टोली अगाडी बढ्नुपर्छ । २०७६ को नतिजाबाट राम्रो पाठ सिके आगमी दिनमा नेपाली क्रिकेटबाट आशा एउटा र नजिता अर्को पक्कै आउने छैन ।

यो पनि पढ्नुहोस : नेपाली क्रिकेटका १० उत्कृष्ट क्षण