एजेन्सी — इन्डियन प्रिमियर लिग (आइपिएल) ले चिनियाँ कम्पिनको प्रायोजनबारे समिक्षा गर्ने भएको छ । सोमबार सीमाक्षेत्र लद्दाखमा भएको झडपमा चिनिया सैनिकको आक्रमणमा परि २० भारतीय सैनिकको मृत्यु भएपछि भारतमा आइपिएलले चिनिया प्रायोजन प्रयोग गर्न नहुने भन्दै आवज उठेको थियो ।

आइपिएलले एक ट्वीट गर्दै प्रायोजन बारे छलफल गर्न अर्को हप्ता बैठक बोलाएको छ । आइपिएलमा चिनियाँ कम्पिनको लगानी रहेका तीन प्रायोजन रहेका छन् । स्मार्टफोन भिभो मुख्य प्रायोजक रहेको छ । सन् २०१८ मा बिसिसीआईले भिभोसँग पाँच वर्षको लागि सम्झौता गरेको थियो । पाँच वर्षका लागि भिभोले बिसिसीआईलाई प्रायोजन वापत २,१९९ करोड भारतीय रुपैयाँमा दिने सहमत भएको थियो ।

त्यस्तै अर्को कम्पिनी अलीबाबाको लगानी रहेको पेटिएम आइपिएलमा अफिसियल अम्पायर पार्टनरको रुपमा रहेको छ । त्यस्तै चिनिया इन्टरनेटसँग जोडिएको ड्रिम११ आइपिएलमा अनलाइन फ्यान्टसी पार्टनर रहेको छ । भारतीय क्रिकेट कन्ट्रोल बोर्ड (बिसिसीआई) का कोषध्यक्ष अरुण धूमलको अनुसार कुल सम्झौताको ४२ प्रतिशत करमार्फत रकम भारतीय सरकारलाई जाने गर्दछ । लद्दाखमा भएको उक्त झडपको असर आइपिएल प्रायोजनमा पनि देखिएन गएको हो ।

यस वर्ष आइपिएल हुने वा नहुने अन्यौल छ । कोरोना भाइरसको महामारीको कारण वैशाखमा अनिश्चित समय सम्मको लागि आइपिएल सरेको थियो । अक्टोबर-नोभेम्बरमा अष्ट्रेलियामा टि२० विश्वकप नभएको खण्डमा बिसिसीआई आइपिएल गर्ने तयारीमा छ । टि२० विश्वकप तोकिएकै समयमा भएको खण्डमा भने यो वर्ष आइपिएल हुने सम्भावना न्युन छ ।

यो वर्ष आइपिएल नभएमा ४ हजार करोड भारतीय रुपैयाँ बिसिसीआईलाई घाटा लाग्ने छ । अर्कोतर्फ आइपिएल यो वर्ष भारत वाहिर हुने सम्भावना छ । आइपिएल गर्न श्रीलंका क्रिकेट बोर्ड र संयुक्त अरब इमिरेट्स क्रिकेट बोर्ड (यूएई) बिसिसीआईसँग प्रस्ताव राखिसकेका छन् ।