भुपेन्द्र जिसी, काठमाडौं

कोरोना भाईरस (कोभिड१९) को कारण २०२० मा इतिहासकै सबैभन्दा बढी समयसम्म क्रिकेट गतिविधी शून्य हुन पुग्यो । मार्च १३ देखि जुलाई पहिलो साता सम्म अन्तर्राष्ट्रिय क्रिकेट नहुने निश्चित छ ।

पछिल्लो समय अन्तिम पटक मार्च १३ मा न्युजिल्यान्ड र अष्ट्रेलिया दर्शक विनाको रंगशालामा एकदिवसिय खेल खेलेका थिए । जुलाई ८ मा वेस्टइन्डिज र इंग्ल्यान्डबीच पहिलो टेष्टसँगै अन्तर्राष्ट्रिय क्रिकेट फर्कने छ । उक्त तीन टेष्ट सिरिजको लागि वेस्ट इन्डिजको टोली एक महिना अघिनै इंग्ल्यान्डमा आइपुगेको छ ।

अन्तर्राष्ट्रिय क्रिकेट टोली अभ्यासमा फर्किन थालेका छन् । इंग्ल्यान्ड, वेस्टइन्डिज, श्रीलंका, जिम्बावे लगायतका देश अभ्यास व्यस्त हुँदा अन्य टेष्ट टोली पनि त्यसको तयारीमा छन् । यसवर्ष सबैभन्दा ठूलो प्रतियोगिता टि२० विश्वकप हो । अक्टोबर–नोभेम्बरमा अष्ट्रेलियामा हुने उक्त टि२० विश्वकप समयमै हुने वा नहुने भने अनिश्चित छ । आइसिसी र क्रिकेट अष्ट्रेलिया सकभर समयमै विश्वकप गर्न चाहान्छन् ।

धेरै खेलाडी यसैवर्ष हुने टि२० विश्वकप खेल्दै सन्न्यास लिन चाहान्छन् । डेढ दशक देखि अन्तर्राष्ट्रिय क्रिकेटमा उत्कृष्ट प्रर्दशन गरि रहेका पाँच महान खेलाडी ढल्कँदो उमेरको कारण क्रिकेट करिअरमा पूर्णविराम लागाउनुपर्ने अवस्थामा पुगेका छन् । अर्थात २०२० मा अन्तर्राष्ट्रिय क्रिकेटबाट सन्न्यास लिन सक्ने उच्च सम्भावना भएका पाँच महान खेलाडी ।

५. इमरान ताहिर (दक्षिण अफ्रिका, ४१ वर्ष)

दक्षिण अफ्रिका ४१ वर्षिय स्पिनर इमरान ताहिरले यस अघिनै टेष्ट र ओडिआईबाट सन्न्यास लिइसकेका छन् । अघिल्लो वर्ष इंग्ल्यान्डमा भएको विश्वकपबाट ओडिआईदेखि सन्न्यास लिएका ताहिर टि२० विश्वकप खेल्ने आशामा छन् । तर दक्षिण अफ्रिका विश्वकप टोलीमा स्थान बनाउन भने उनलाई सहज देखिदैन ।

ताहिरले दक्षिण अफ्रिकाबाट २० टेष्ट, १ सय ७ ओडिआई र ३८ टि२० आई खेलेका छन् । ताहिरले ५७ टेष्ट, १ सय ७३ ओडिआई र ६३ टि२० आई विकेट लिएका छन् । ताहिरले अन्तर्राष्ट्रिय खेल सुरु गर्न ढिला गरेका थिए । सन् २०११ मा अष्ट्रेलियाविरुद्ध टेष्ट, वेस्ट इन्डिजविरुद्ध ओडिआई र सन् २०१३ मा श्रीलंकाविरुद्ध टि२० आईमा डेब्यु गरेका थिए ।

४. शोएब मलिक (पाकिस्तान, ३८ वर्ष)

पाकिस्तानका एक सफल अलराउन्डर तथा पूर्वकप्तान शोएब मलिक सन् १९९९ देखि अन्तर्राष्ट्रिय क्रिकेट खेल्दै आएका छन् । दुई दशक भन्दा बढी अन्तर्राष्ट्रिय क्रिकेट खेलिसकेका मलिकले टेष्टबाट सन् २०१५ मै सन्न्यास लिएका थिए । मलिकले पाकिस्तानबाट ३५ टेष्ट, २ सय ८७ ओडिआई र १ सय १३ टि२० आई खेलेका छन् । मलिकले १९९९ मा वेस्ट इन्डिजविरुद्ध ओडिआईमा डेब्यु गरेका थिए ।

सन् २००१ मा टेष्टमा बंगलादेशविरुद्ध र २००६ मा इंग्ल्यान्डविरुद्ध टि२० आईमा डेब्यु गरेका थिए । मलिक टि२० आई सर्वाधिक खेल खेल्ने खेलाडी पर्दछन् । अगामी सेप्टेम्बर–अगष्टमा पाकिस्तानले इंग्ल्यान्डमा समान तीन टेष्ट र टि२० आई सिरिज खेल्दै छ । त्यसको लागि मलिक पनि उक्त टोलीमा छन् । उक्त इंग्ल्यान्ड भ्रमणमा मलिक भन्दापछि पाकिस्तानको क्रिकेट टोलीबाट खेल्न सुरु गरेका पूर्व कप्तान मिस्बाह उल हक प्रमुख प्रशिक्षक तथा छनोट कर्ता हुँदा युनिस खान ब्याटिङ प्रशिक्षक छन् ।

मलिकले यो वर्ष हुने टि२० विश्वकप खेल्दै अन्तर्राष्ट्रिय क्रिकेटमा पूर्णविराम लगाउन चाहान्छन् । पछिल्लो समय मलिकले पाकिस्तानको टोलीमा नियमित स्थान बनाउन सकि रहेका छैनन् । त्यसैले यो वर्ष टि२० विश्वकप नभएपनि मलिकले ढल्किँदो उमेरको कारण २०२१ म पाकिस्तानको टोलीमा मौका पाउने सम्भावना न्युन रहन्छ ।

३. क्रिस गेल (वेस्ट इन्डिज, ४० वर्ष)

वेस्ट इन्डिजका विष्फोटक ब्याट्सम्यान क्रिस गेल पनि अन्तर्राष्ट्रिय क्रिकेटमा पूर्णविरामको संघारमा छन् । वेस्ट इन्डिजका एक सफल ब्याट्सम्यान गेलले १ सय ३ टेष्ट, ३ सय १ ओडिआई र ५८ टि२० आई खेलेका छन् । विष्फोटक ब्याट्सम्यान क्रिस गेलपनि यसवर्ष हुने टि२० विश्वकप खेल्दै सन्न्यास लिन चाहान्छन् । गेलले सन् १९९९ मा भारतविरुद्ध ओडिआईमा डेब्यु गरेका थिए ।

ओडिआईमा २५ शतक, ५४ अर्ध शतक सहित कुल १० हजार ४ सय ८० रन बनाउनुको साथै १ सय ६७ विकेट लिएका छन् । ढल्कँदो उमेरको कारण गेलले पछिल्लो एक वर्षमा वेस्ट इन्डिजको टोलीमा नियमित स्थान बनाउन संघर्ष गर्नुपरेको छ । गेल २०१९ अगष्ट ओडिआई तथा टि२० आईमा मार्चदेखि वेस्ट इन्डिजको टोलीमा छैनन् । गेलले यस वर्ष हुने टि२० विश्वकपपछि भने अन्तर्राष्ट्रिय क्रिकेटबाट सन्न्यास लिने बलियो सम्भावना देखिन्छ ।

२. लासिथ मलिङ्गा (श्रीलंका, ३६ वर्ष)

श्रीलंका टि२० क्रिकेट टोलीका कप्तान तथा तीव्र गतिका बलर लासिथ मलिङ्गाले अघिल्लो वर्ष बंगलादेशविरुद्ध खेल्दै ओडिआईबाट सन्न्यास लिएका थिए । मलिङ्गा टि२० आईमा एक सय विकेट लिने पहिलो बलर हुन् । मलिङ्गाले आफ्नो कप्तानीमा श्रीलंकालाई सन् २०१४ मा टि२० विश्वकप जिताएका थिए ।

मलिङ्गाले ३० टेष्टमा १ सय १, २ सय २६ ओडिआईमा ३ सय ३८ र ८४ टि२० आईमा १ सय ७ विकेट लिएका छन् । सन् २०१० मानै टेष्ट खेल्न छोडेका योर्कर किंग मलिङ्गा यसैवर्ष हुने टि२० विश्वकपपछि अन्तर्राष्ट्रिय क्रिकेटमा पूर्णविराम लगाउन चाहान्छन् ।

१. महेन्द्र सिंह धोनी (भारत, ३८ वर्ष)

भारतीय क्रिकेट टोलीका ब्याट्सम्यान महेन्द्र सिंह धोनी विश्व क्रिकेटकै एक सफल कप्तान तथा सर्वोत्कृष्ट विकेटकिपर फिनिसर हुन् । धोनीले गतवर्ष एकदिवसिय विश्वकपमा सेमिफाइनलमा न्युजिल्यान्डविरुद्ध अन्तिम खेल खेलेका थिए । धोनी टि२० आई, एक दिवसिय र च्याम्पियन्स ट्रफी जित्ने एक्लो कप्तान हुन् । धोनीले ९० टेष्ट, ३ सय ५० ओडिआई र ९८ टि२० आई खेल खेलेका छन् ।

धोनीले यसवर्ष टि२० विश्वकप खेल्दै अन्तर्राष्ट्रिय क्रिकेटबाट सन्न्यास लिन चाहान्छन् । ऋषभ पन्त, लोकेश (केएल) राहुल, सञ्जु स्यामसन लगायतका युवा विकेटकिपर हुँदा यो वर्ष टि२० विश्वकप नभएको खण्डमा भारतीय टोलीमा ढल्किँदो उमेरको कारण धोनीको सम्भावना निकै न्यून देखिन्छ । यस वर्ष टि२० विश्वकप तोकिएकै समयमा भएमा धोनीले टि२० विश्वकप खेल्दै सन्न्यास लिने लक्ष्य राखेका छन् ।