काठमाडौं (हाम्रो खेलकुद) – हरेक खेलाडीको पहिलो सपना आफ्नो राष्ट्रबाट खेल्ने हुन्छ । देशबाट खेलेपछि हरेक खेलाडीले निरन्तर राम्रो प्रर्दशनका साथ नियमित टोलीमा पर्ने लक्ष्य बोकेको हुन्छ ।

विशेषगरि खेलाडीले डेब्यु खेलमा उच्च प्रर्दशन गर्दै आफ्नो क्षमता देखाउन चाहन्छन् । तर सबैको उक्त सपना पूरा हुँदैन । प्रतिभा भएका सबै खेलाडीले डेब्यु खेलमा उत्कृष्ट प्रर्दशन गर्न सक्छन् भन्ने हुँदैन । थुप्रै महान क्रिकेटर मध्य कसैले डेब्यु खेलमा शतक प्रहार गरेका छन् भने कुनै शून्यमा पनि आउट भएका छन् ।

भारतीय क्रिकेट टोलीका सर्वाधिक सफल कप्तान महेन्द्र सिंह धोनी सन् २००४ मा ओडिआईमा बंगलादेशविरुद्ध डेब्यु खेलमा शुन्यमा आउट भएका थिए । विश्व क्रिकेटकै सर्वाधिक सफल ब्याट्सम्यान मानिने सचिन तेन्दुलकर पनि ओडिआई डेब्यु खेलमा शुन्यमा आउट भएका थिए । सचिन सन् १९८९ मा पाकिस्तानविरुद्ध ओडिआईमा शुन्यमा आउट भएका थिए । यसले क्षमतावान् खेलाडीले डेब्यु खेलमै उत्कृष्ट प्रर्दशन गर्छनै भन्ने हुँदैन भन्ने राम्रो उदाहरण दिन्छ ।

डेब्यु खेलको केहि दबाब पनि हुने हुँदा सबै खेलाडीले सोचे अनुसार प्रर्दशन गर्न सक्दैनन् । नेपाली क्रिकेट टोलीका ६ खेलाडी जो टि२० आई र ओडिआई डेब्यु खेलमा शुन्यमा आउट भएका थिए ।

६. नरेश बुढाएर (ब्याट्सम्यान)

राष्ट्रिय क्रिकेट टोलीका ब्याट्सम्यान नरेश बुढाएर सन् २०१४ मा बंगलादेशमा भएको टि२० विश्वकप खेलमा हङकङरुद्ध टि२० आईमा डेब्यु खेलमा शून्यमा आउट हुन पुगेका थिए । १९ औं ओभरको पाँचौ बलमा नरेशलाई हङकङका हसीब अमजदले बोल्ड आउट गरेपछि डेब्यु विश्वकप र टि२० आई खेलमा खाता नखोली पेभिलिएन फर्किनुपरेको थियो । २८ वर्षीय नरेश पछिल्लो समय क्यानडामा छन् ।

५. शक्ति गौचन (स्पिनर)

नेपाली क्रिकेट टोलीका पूर्व खेलाडी शक्ति गौचन पनि टि२० विश्वकप २०१४ मा हङकङविरुद्ध टि२० आई खेलमा शुन्यमा आउट भएका थिए । शक्ति अन्तिम बलमा रन आउट हुन पुगेका थिए । अन्तिम बलमा मौका पाएका शक्तिलाई हसीब अमजदले रन आउट गराएपछि शुन्यमा पेभिलिएन फर्किनु परेको थियो । सन् २०१८ मा नेदरल्यान्डविरुद्ध पहिलो ओडिआई खेलमा डेब्यु गर्दै शक्तिले अन्तर्राष्ट्रिय क्रिकेटबाट सन्न्यास लिएका थिए ।

४. आरिफ शेख (ब्याट्सम्यान)

युवा ब्याट्सम्यान आरिफ शेख सन् २०१८ मा नेदरल्याड्सविरुद्ध ओडिआई डेब्यु खेलमा शुन्यमा आउट भएका थिए । आरिफलाई नेदरल्यान्डका मिचेल रिपनले २० औं ओभरको चौथो बलमा वेस्ले ब्यारेसीबाट क्याच गराउँदै शुन्यमा पेभिलिएन फर्काएका थिए । २२ वर्षिय आरिफ नेपाली क्रिकेट टोलीका ठूलो सम्भावना बोकेका युवा ब्याट्सम्यान हुन् । आरिफ हाल मध्यक्रमका प्रमुख ब्याट्सम्यान मानिन्छन् ।

३. वसन्त रेग्मी (स्पिनर)

अनुभवी स्पिनर वसन्त रेग्मी ओडिआई डेब्यु खेलमा शुन्यमा आउट हुन पुगेका थिए । नेदरल्यान्ड्सविरुद्धको पहिलो ओडिआई खेलमा वसन्त शुन्यमा आउट भएका थिए । सीलारको बलमा सट खेल्ने क्रममा शेन सेन्टरबाट क्याच हुँदै ९ बलमा शुन्यमा पेभिलिएन फर्केका थिए । ढल्किँदो उमेरको कारण पछिल्लो समय टोली बाहिर रहेका वसन्त सन्न्यासको संघारमा छन् ।

२. करण केसी (तीव्र गतिका बलर)

तीव्र गतिका बलर करण केसी पनि नेदरल्यान्ड्सविरुद्धको ओडिआई खेलमा शुन्यमा आउट भएका थिए । करणलाई ३६ औं ओभरको तेस्रो बलमा फ्रड क्लासेनले विकेटकिपर स्कर्ट एड्वार्ड्सबाट क्याच गराएपछि शुन्यमा आउट भएका थिए । करणले सोमपाल कामीको जोडीको रुपमा टोलीमा निरन्तर स्थान बनाउँदै उच्च प्रर्दशन गर्दै आएका छन् । करण तल्लोक्रममा आक्रामक ब्याटिङका लागि माहिर छन् ।

१. सोमपाल कामी (अलराउन्डर)

तीव्र गतिका बलिङ अलराउन्डर सोमपाल कामी नेदरल्यान्ड्ससँगको पहिलो ओडिआई खेलमा शुन्यमा आउट भएका थिए । सोमपाललाई २३ औं ओभरको तेस्रो बलमा सीलारले एलविडब्लू आउट गरेपछि ९ बलमा शुन्यमा पेभिलिएन फर्किनु परेको थियो । उक्त खेल नेपालले ५५ रनले पराजित भएको थियो । तर नेदरल्यान्ड्ससँगको दोस्रो खेलमा भने सोमपालले ४६ बलमा ३ छक्का र ५ चौका सहित ६१ रनको उत्कृष्ट इनिङ खेल्दै नेपाललाई १ रनको रोमाञ्चक जित दिलाउन महत्वपूर्ण योगदान दिएका थिए ।