काठमाडौ (हाम्रो खेलकुद) – नेपाल क्रिकेट संघ (क्यान) ले राष्ट्रिय टोलीको प्रशिक्षण यसै महिनादेखि थाल्ने तयारी गरेको छ ।

असार तेस्रो वा चौथो साता देखि प्रशिक्षण गर्ने तयारीमा रहेको क्यानले राष्ट्रिय खेलकुद परिषद् (राखेप) लाई प्रशिक्षण सुरु गर्न अनुमति दिन पत्र पठाएको स्रोतले जनाएको छ । क्यानले राखेपबाट अनुमति प्राप्तसँगै प्रशिक्षण थाल्ने छ ।

‘राखेपलाई प्रशिक्षण अनुमतिको लागि पत्र पठाएका छौं । राखेपले निर्देशन दिने छ । हामीले यस अघिनै गरेको निर्णयलाई औपचारिक रुपमा पत्र पठाएका हौं । राखेपले जे निर्णय दिन्छ त्यसमा भर पर्छ । खेलाडीको पिसिआर परिक्षण सरकार, क्यान वा राखेप कस्ले गर्ने राखेपले प्रष्ट पार्नेमा आशावादी छौं’, स्रोतले भन्यो ।

पूर्वकप्तान पारस खड्का लगाएतका केहि खेलाडीले व्यक्तिगत रुपमा कीर्तिपुरमा रहेको इन्डोरमा प्रशिक्षण गर्न थालिसकेका छन् । खेलाडी तीन महिना देखि प्रशिक्षण गरेका छैनन् । जसले गर्दा क्यानको ध्यान प्रशिक्षण कसरी सुरु गर्नेमा रहेको छ ।

क्यानको आफ्नो एकल निर्णयमा प्रशिक्षण सुरु गर्न सक्दैन । त्यसैले सरकारको अनुमतिको पर्खाईमा छ । २०–२२ जना खेलाडीलाई समुह र समय विभाजन गरेर प्रशिक्षण सुरु गर्ने क्यानले योजना र खाका तयार पारेका छ । क्यानले इन्डोरमा कीर्तिपुरमै प्रशिक्षण गराउने जनाएको छ ।

भदौ अघि सम्म नेपालमा कुनै विदेशी प्रशिक्षक नआउने निश्चित छ । क्यानले कोरोनाको अवस्थामा हेरेर मात्र घरेलु प्रतियोगिता सुरुचारु गर्ने जनाएको छ । भदौ अघि कुनै घरेलु प्रतियोगिताको सम्भावना पनि छैन । त्यसपछि नेपालमा कोरोनाको अवस्था हेरेर सुरु गर्ने छ । नेपालले पछिल्लो पटक अन्तिम अन्तर्राष्ट्रिय प्रतियोगिता फागुन १७ देखि २३ सम्म थाईल्यान्डमा एसिसी इस्टर्न रिजन २०२० प्रतियोगिता खेलेको थियो ।

धेरै खेलाडी उपत्यका बाहिर रहेको बुझिएको छ । तीन महिना भन्दा बढी समय प्रशिक्षण बिहिन खेलाडी पनि अभ्यासमा फर्किन आतुर छन् । तर बढ्दो कोरोना संक्रमणले भने चिन्ता थप्न थालेको छ । नेपालमा बिहीबार सम्म १० हजार भन्दा बढी संक्रमित भेटिदा २४ जनाको मृत्यु भई सकेको छ ।