काठमाडौं (हाम्रो खेलकुद) – नेपाल क्रिकेट संघ (क्यान) का पूर्व सिओओ छुम्बी लामा र मदन भण्डारी क्रिकेट फाउन्डेसनको क्रिकेट विभागका उपाध्यक्ष धर्मराज गिरि क्यानको केन्द्रिय सदस्यमा नियुक्त भएका छन् ।

क्यानको विधान अनुसार राष्ट्रिय खेलकुद परिषद (राखेप) मार्फत दुई जना प्रतिनिधि केन्द्रीय सदस्य रहने प्रावधान छ । त्यसै प्रावधान अनुसार सदस्य सचिवको असार १० गतेको निर्णयले लामा र गिरीलाई संघमा नियुक्त गरको हो ।

लामाले यसअघि क्यानमा चिफ अपरेटिङ अफिसर (सिओओ) को भूमिकामा काम गरिसकेका छन् । पोखरा प्रिमियर लिग र वुमन्स च्याम्पियन्स लिगको आयोजक क्विन्स इभेन्ट्सका प्रबन्ध निर्देशक समेत रहेका लामा झन्डै एक दशकदेखि क्रिकेटमा रहेका छन् । उनी टंक आङबुहाङको कार्यकालमा पहिलो पटक क्यान प्रवेश गरेका थिए ।

लामाले क्यानको बोर्डमा रहेर आफूले यसअघि व्यवस्थापनमा रहँदा बोकेको अनुभव क्रिकेट विकासमा नै लगाउने बताए । ‘ मैले क्यान र त्यसबाहिर क्रिकेटकै व्यवस्थापनमा रहेर झन्डै १ दशक बिताइसकेको छु । अब बोर्डमा रहेर मैले नेपाली क्रिकेटको नीतिगत तवरबाट विकासमा सहयोग पुर्याउने छु,’ उनले भने ।

लामाले नेपाली क्रिकेटलाई व्यावसायिकतातर्फ लग्न संघको माध्यमबाट सक्दो पहल गर्ने बताए । ‘ हामीले अब क्रिकेटलाई व्यावसायिक बनाउनुपर्छ । क्यान निलम्बनमा रहँदा यसले केहि गति लिएको छ, अब यसैलाई उचित रुपमा नियमन गरेर अगाडी बढ्नुछ,’ लामाले थपे ।

उनले नेपाली क्रिकेटको विकासका लागि महिला र पुरुष दुवैतर्फ ग्रासरुट क्रिकेट पनि बलियो बनाउनुपर्ने बताए । ‘ हाम्रो अबको लक्ष्य भनेको ग्रासरुट क्रिकेट प्रवर्द्धन गर्नु हुनेछ । भविष्यका लागि अहिले देखि नै संघले सोच्नु आवश्यक छ । सबै क्षेत्र र जिल्ला समेटेर ग्रासरुट विकासको कार्ययोजना ल्याउन आवश्यक छ,’ लामाले भने ।

क्यानको निलम्बन फुकुवा भएपनि अझैपनि स्वतन्त्र रुपमा काम गर्न नपाएको कारण नतिजा आउन नसकेको लामाको बुझाइ छ । ‘क्यान निलम्बन फुकुवा भएपनि केहि गरेको नतिजा देखिन्न । त्रिकोणात्मक सिरिजमा पनि आईसीसीकै सहकार्य थियो र सागमा पनि सरकारले नै आयोजना गरेको थियो । अब चाडै क्यानले पूर्ण रुपमा काम गरेर नतिजा ल्याउन लाग्नेछौं,’ उनले थपे ।

लामाले अब व्यक्तिगत रिसराग त्यागेर सबै एकजुट भएर अगाडी बढ्नुपर्ने बताए । ‘अब हामीसँग ३ वर्ष समय छ ।  अहिलेको कठिन परिस्थितिबाट उठेर अगाडी बढ्न सबैको सहकार्य आवश्यक छ । हामीले क्रिकेटको भविष्यको लागि एक भएर अगाडी बढ्नुपर्छ,’ लामाले भने ।

महिलामा डब्लुसीएल र पुरुषमा पिपिएल आयोजना गर्दै आएका लामाले आफू बोर्डमा रहेपनि प्रतियोगिता आयोजना गर्नु सकारात्मक रुपमा लिनुपर्ने बताए । ‘ मैले प्रतियोगिता आयोजना गरेपनि बोर्डमा बसेपनि लक्ष्य क्रिकेट विकास गर्ने नै हो । यदि कसैले क्रिकेटमा लगानी गर्छ र विकासमा लाग्छ भने प्रोत्साहन गर्नुपर्छ,’ उनले थपे, ‘ कन्फ्लिक्ट अफ इन्ट्रेस्ट भन्ने हुँदैन । अहिले सदस्यसचिव ज्युको पनि फ्रेन्चाइज टिम छ । अन्य पदाधिकारीले पनि आ-आफ्नो क्षेत्रबाट योगदान दिनुभएको छ । यसलाई सकारात्मक रुपमा लिनुपर्छ ।’

गिरी भने लुम्बिनीबाट घरेलु क्रिकेट खेलेका खेलाडी हुन् । उनी नेकपा निकट मदन भण्डारी स्पोर्टस फाउन्डेसनमा समेत सक्रिय रहँदै आएका छन् । उनी फाउन्डेसनको क्रिकेट विभागको उपाध्यक्ष समेत छन् ।