एजेन्सी– कप्तान जेसन होल्डरले करिअरकै उत्कृष्ट प्रर्दशन गरेपछि पहिलो टेष्ट खेलमा घरेलु टोली इंग्ल्यान्डविरुद्ध वेस्ट इन्डिज हाबी बनेको छ ।

दोस्रो दिनको समाप्तीमा वेस्ट इन्डिज १ सय ४७ रनले पछि छ । दोस्रो दिन बिहीबार पहिलो इनिङ थालेको वेस्ट इन्डिजले १९.३ ओभरमा ५७ रन जोड्न १ विकेट गुमाएको छ । ओपनर क्रेग ब्रेथवेट ६५ बलमा २ चौका सहित २० रनमा अविजित छन् । उनलाई शाई होपले ३ रनमा साथ दिने छन् । ओपनर जोन क्याम्पबेललाई १३ औं ओभरको अन्तिम बलमा जेम्स एन्डरसनरले २८ रनमा एलबिडब्लू आउट गरे । उनले ३६ बलमा ३ चौका प्रहार गरे ।

बुधबार साउथह्याप्टनमा टस जितेर पहिला ब्याटिङ गरेको इंग्ल्यान्ड पहिलो इनिङमा विहीबार दोस्रो दिन दोस्रो सेसनमा ६७.३ ओभरमा २ सय ४ रनमा अल आउट भएको थियो । इंग्ल्यान्डका कप्तान बेन स्टोक्सले सर्वाधिक ४३ रनको योगदान दिए ।

खराब प्रर्दशन गरेको इंग्ल्यान्डलाई छैटौं विकेटका लागि कप्तान बेन स्टोक्स र उप–कप्तान जस बटलरले ६७ रनको साझेदारी गर्दै केहि आशा दिलाएपनि त्यसलाई होल्डरले लामो समय टिक्न दिएनन् । ५३.३ ओभरमा स्टोक्सलाई होल्डरले विकेटकिपर शेन डोरीचबाट क्याच गराएसँगै पहिलो इनिङमा इंग्ल्यान्डको ठूलो योगफलको आशा टाढिएको थियो ।

स्टोक्सले ९७ बलमा ७ चौका प्रहार गरे । होल्डरले लगत्तै ५५.४ ओभरमा बटलरलाई ३५ रनमा क्याच आउट गराउँदै आफ्नो दबाब कायम राखे । बटलरले ४७ बलमा ६ चौका प्रहार गरे ।

दोस्रो ओभरको चौथो बलमा तीव्र गतिका बलर शेनन ग्याब्रियलले ओपनर डोम सिब्लेलाई शून्यमा बोल्ड आउट गरेका थिए । अर्का ओपनर रोरी बन्र्सलाई पनि ग्याब्रियलले ८५ बलमा ४ चौका सहित ३० रनमा एलबिडब्लू आउट गरे । अम्पायरले ग्याब्रियलको अपिललाई अस्वीकार गरेपनि होल्डरले रिब्यू लिदैं रोरीलाई पेभिलिएन फर्काएका थिए ।

ग्याब्रियलले जो डेनलीलाई १८ रनमा बोल्ड आउट गर्दै इंग्ल्यान्डलाई दबाबमा राखेका थिए । त्यसपछि भने इग्ल्यान्डको इनिङ होल्डरले ध्वोस्त पारे । होल्डरले ज्याक क्रलीलाई १० रनमा एलबिडब्लू आउट गरे । होल्डरलेनै ३७.४ ओभरमा युवा ब्याट्सम्यान ओली पोपलाई १२ रनमा कट बिहान्ड आउट गरेपछि दबाबमा झनैं थपिएको थियो ।

होल्डरले जोफ्रा आर्चरलाई शून्यमा एलबिडब्लूको शिकार बनाउँदै आफ्नो ब्यक्तिगत पाँच विकेट पूरा गरे । इंग्ल्यान्ड विरुद्ध उनले पहिलो पटक पाँच विकेट पूरा गरेका हुन् । उनको समग्रमा टेष्ट करिअरको भने सातौं पटक पर्दछ ।

अन्तिम विकेटका लागि स्पिनर डोम बेस र तीव्र गतिका बलर जेम्स एन्डरसनले ३० रनको साझेदारी गर्दै दुई सय रन कटाएका थिए । बेस ४४ बलमा ४ चौका सहित ३१ रनमा अविजित रहे ।एन्डरसनलाई ग्याब्रियलले २० बलमा १ चौका सहित १० रनमा बोल्ड आउट गरे ।

कप्तान जेसन होल्डरले आफ्नो टेष्ट करिअरको उत्कृष्ट प्रर्दशन गर्नेक्रममा २० ओभरमा ६ मेडन सहित ४२ रन खर्चेर ६ विकेट लिए । अर्का तीव्र गतिका बलर शेनन ग्याब्रियलले १५.३ ओभरमा ३ मेडन राख्दैं ६२ रन खर्चेर ४ विकेट लिए ।