एजेन्सी – वेस्ट इन्डिजसँगको पहिलो टेष्ट खेलमा घरेलु टोली इंग्ल्यान्ड सामान्य योगफलतर्फ अघि बढेको छ । चौथो दिनको समाप्तीमा इंग्ल्यान्डले १ सय ७० रनको अग्रता कायम गरेको छ ।

दोस्रो इनिङमा इंग्ल्यान्डले १ सय ४ ओभरमा २ सय ८४ रन जोड्न ८ विकेट गुमाएको छ । पहिलो इनिङमा १ सय १४ रनले पछि परेको इंग्ल्यान्डलाई हारबाट बच्न ड्र (बराबरी) गराउनु पर्ने हुन्छ । इंग्ल्यान्डका जोफ्रा आर्चर ५ र मार्क उड १ रनमा क्रिजमा छन् । पाँचौ तथा अन्तिम दिन यी दुई ब्याट्सम्यानको प्रर्दशनले नतिजामा प्रभाव पार्ने देखिन्छ ।

इंग्ल्यान्ड रन भन्दापनि क्रिजमा यी दुई ब्याट्सम्यानलाई टिकाउँदै ड्र गराउनतर्फ बढी केन्द्रित हुने छ । यता वेस्ट इन्डिज भने बाँकी दुई विकेट चाडैंनै लिदैं आफ्नो जित पक्का गर्ने सोचमा छ । संघर्षपूर्ण सुरुवातले इंग्ल्यान्डका शीर्षक्रम समालिएपनि तल्लोक्रमका ब्याट्सम्यान सस्तैमा आउट हुँदा कमजोर अवस्थामा पुगेको हो ।

३६.१ ओभरमा रोरी बन्र्स ४२ रनमा क्याच आउट हुनुअघि डोम सिब्लेसँग पहिलो विकेटका लागि ७६ रनको साझेदारी गरेका थिए । रोरीलाई रोस्टन चेशले क्रेग क्याम्पबेलबाट सिलिपमा क्याच आउट गराउँनु अघि १ सय ४ बलमा ५ चौका प्रहार गरे । अर्का ओपनर सिब्ले १ सय ६४ बलमा ४ चौका सहित ५० रनमा आउट भए । ५२ औं ओभरको पहिलो बलमा बोल्ड आउट हुँदा नो बल हुँदा जीवनदान पाएका सिब्लेले त्यो मौका सदुपयोग गर्न सकेनन् ।

उक्त जीवनदानको दुइ बलपछि लेग साइडमा सट खेल्नेक्रममा क्याच आउट हुन पुगेका थिए । जो डेनलीलाई २९ रनमा चेशलेनै होल्डरबाट क्याच आउट गराए । चौथो विकेटका लागि कप्तान बेन स्टोक्स र युवा ब्याट्सम्यान ज्याक क्रलीले ९८ रनको साझेदारी गदैं राम्रो योगफलको आशा देखाएका थिए । तर स्टोक्सलाई कप्तान जेसन होल्डरले शाइ होपबाट ४६ रनमा क्याच गराएपछि इंग्ल्यान्ड समालिन सकेन । स्टोक्सले ७९ बलमा ६ चौका प्रहार गरे ।

क्रलीले १ सय २७ बलमा ८ चौका सहित सर्वाधिक ७६ रनको योगदान दिए । आफ्नो टेष्ट करिअरकै उच्च प्रर्दशन गरेका क्रलीलाई अल्जारी जोशेफले कट एण्ड बोल्ड आउट गर्दै पेभिलिएन फर्काए । ओली पोप १२, जस बटलर ९, डोम बेस ३ रनमा आउट हुन पुगे । वेस्ट इन्डिजका शेनन ग्याब्रियलले सर्वाधिक ३, रोस्टन चेश र अल्जारी जोशेफले २–२ विकेट लिए । जेसन होल्डरको नाममा १ विकेट रहेको छ ।

त्यसअघि पहिलो इनिङमा वेस्ट इन्डिज १ सय २ ओभरमा ३ सय १८ रनमा अल आउट भएको थियो । ओपनर क्रेग ब्रेथवेटले १ सय २५ बलमा ६ चौका सहित सर्वाधिक ६५ रनको योगदान दिए । क्रेगलाई कप्तान बेन स्टोक्सले एलबिडब्लू आउट गरेका थिए । जेम्स एन्डरसनले एलबिडब्लू आउट गर्नुअघि अर्का ओपनर जोन क्याम्पबेलले ३६ बलमा ३ चौका सहित २८ रन जोडे । युवा स्पिनर डोम बेसले सिलिपमा स्टोक्सबाट शाई होपलाई १६ रनमा क्याच गराउँदै पेभिलिएन फर्काए । मध्यक्रमका शम्राह ब्रुक्सले ३९ र रोस्टन चेशले ४७ रन जोडे ।

विकेटकिपर शेन डोरीचले १ सय १५ बलमा ८ चौका सहित ६१ रन जोडेपछि वेस्ट इन्डिजले अग्रता कायम गरेको थियो । इंग्ल्यान्डका कप्तान बेन स्टोक्सले १४ ओभरमा ५ मेडन सहित ४९ रन खर्चेर ४ विकेट लिए । जेम्स एन्डरसन ३, डोम बेसले २ र मार्क उडले १ विकेट लिए ।

त्यसअघि पहिलो इनिङमा इंग्ल्यान्ड ६७.३ ओभरमा २ सय ४ रनमा अल आउट हुन पुगेको थियो । स्टोक्सले सर्वाधिक ४३ रन बनाउँदा अन्यले राम्रो प्रर्दशन गर्न सकेका थिएनन् । इंग्ल्यान्डलाई छैटौं विकेटका लागि कप्तान बेन स्टोक्स र उप–कप्तान जस बटलरले ६७ रनको साझेदारी गर्दै केहि आशा दिलाए ।

५३.३ ओभरमा स्टोक्सलाई होल्डरले विकेटकिपर शेन डोरीचबाट क्याच गराए । स्टोक्सले ९७ बलमा ७ चौका प्रहार गरे । होल्डरले लगत्तै ५५.४ ओभरमा बटलरलाई ३५ रनमा क्याच आउट गराउँदै आफ्नो दबाब कायम राखे । बटलरले ४७ बलमा ६ चौका प्रहार गरे । दोस्रो ओभरको चौथो बलमा तीव्र गतिका बलर शेनन ग्याब्रियलले ओपनर डोम सिब्लेलाई शून्यमा बोल्ड आउट गरेका थिए ।

अर्का ओपनर रोरी बन्र्सलाई पनि ग्याब्रियलले ८५ बलमा ४ चौका सहित ३० रनमा एलबिडब्लू आउट गरे । होल्डरले ज्याक क्रलीलाई १० रनमा एलबिडब्लू आउट गरे । होल्डरलेनै ३७.४ ओभरमा युवा ब्याट्सम्यान ओली पोपलाई १२ रनमा कट बिहान्ड आउट गरेपछि दबाबमा झनैं थपिएको थियो ।

डोम बेस ४४ बलमा ४ चौका सहित ३१ रनमा अविजित रहे । जेम्स एन्डरसनलाई ग्याब्रियलले २० बलमा १ चौका सहित १० रनमा बोल्ड आउट गरे । होल्डरले आफ्नो टेष्ट करिअरको उत्कृष्ट प्रर्दशन गर्नेक्रममा २० ओभरमा ६ मेडन सहित ४२ रन खर्चेर ६ विकेट लिए । ग्याब्रियलले १५.३ ओभरमा ३ मेडन राख्दैं ६२ रन खर्चेर ४ विकेट लिए ।