एजेन्सी – कोरोना संक्रमणपछि सुरु भएको अन्तर्राष्ट्रिय क्रिकेटको पहिलो सिरिजअन्तर्गत वेस्टइन्डिजले पहिलो टेष्ट खेलमा घरेलु टोली इंग्ल्यान्डलाई ४ विकेटले हराएको छ । साउथह्याप्टनमा पाँचौ तथा अन्तिम दिन २ सय रनको लक्ष्य पछ्याएको वेस्ट इन्डिजले ६४.२ ओभरमा ६ विकेटको क्षतिमा पूरा गर्यो ।

वेस्ट इन्डिजका जेर्मेन ब्ल्याकउडले उत्कृष्ट ब्याटिङ गर्दै जित पक्का गराए । ६०.४ ओभरमा बेन स्टोक्सले जेम्स एन्डरसनबाट क्याच आउट गराएपछि आफ्नो टेष्ट करिअरको दोस्रो शतक पूरा गर्न ब्ल्याकउडमात्र पाँच रनले चुके । उनले १ सय ५४ बलमा १२ चौका सहित महत्वपूर्ण ९५ रन जोड्दै टोलीको जित सहज बनाए ।

कप्तान जेसन होल्डर १४ रनमा अविजित रहे । वेस्ट इन्डिजको सुरुवात भने राम्रो हुन सकेन । ओपनर क्रेग ब्रेथवेटलाई जोफ्रा आर्चरले ४ रनमा बोल्ड आउट गरे । शम्राह बूक्सलाई आर्चरलेनै शून्यमा एलबिडब्लू आउट गरे । जोन क्याम्पबेल १ रनमा रिटायर्ट हर्ट आउट भए । शाई होपलाई मार्क उडले ९ रनमा बोल्ड आउट गरे । रोस्टन चेस ३७ र शेन डोरीच २० रनमा आउट भए । इंग्ल्यान्डका जोफ्रा आर्चरले ३, बेन स्टोक्सले २ र मार्क उडले १ विकेट लिए ।

त्यसअघि इंग्ल्यान्ड दोस्रो इनिङमा १११.२ ओभरमा ३ सय १३ रनमा अल आउट भएको थियो । वेस्ट इन्डिजले पहिलो इनिङमा १ सय १४ रनले अग्रता लिएको हुँदा समग्रमा २ सय रनको लक्ष्य पाएको थियो । संघर्षपूर्ण सुरुवातले इंग्ल्यान्डका शीर्षक्रम समालिएपनि तल्लोक्रमका ब्याट्सम्यान भने समालिन सकेनन् । ३६.१ ओभरमा रोरी बर्न्स ४२ रनमा क्याच आउट हुनुअघि डोम सिब्लेसँग मिलेर पहिलो विकेटका लागि ७६ रनको साझेदारी गरेका थिए ।

रोरीलाई रोस्टन चेसले क्रेग क्याम्पबेलबाट स्लिपमा क्याच आउट गराउँनु अघि १ सय ४ बलमा ५ चौका प्रहार गरे । अर्का ओपनर सिब्ले १ सय ६४ बलमा ४ चौका सहित ५० रनमा आउट भए । ५२ औं ओभरको पहिलो बलमा बोल्ड आउट हुँदा नो बलको कारण जीवनदान पाएका सिब्लेले त्यो मौका सदुपयोग गर्न सकेनन् ।

उक्त जीवनदानको दुइ बलपछि लेग साइडमा सट खेल्नेक्रममा क्याच आउट हुन पुगेका थिए । जो डेनलीलाई २९ रनमा चेसलेनै होल्डरबाट क्याच आउट गराए । चौथो विकेटका लागि कप्तान बेन स्टोक्स र युवा ब्याट्सम्यान ज्याक क्रलीले ९८ रनको साझेदारी गदैं राम्रो योगफलको आशा देखाएका थिए । तर स्टोक्सलाई कप्तान जेसन होल्डरले शाई होपबाट ४६ रनमा क्याच गराएपछि इंग्ल्यान्ड समालिन सकेन । स्टोक्सले ७९ बलमा ६ चौका प्रहार गरे ।

क्रलीले १ सय २७ बलमा ८ चौका सहित सर्वाधिक ७६ रनको योगदान दिए । आफ्नो टेष्ट करिअरकै उच्च प्रर्दशन गरेका क्रलीलाई अल्जारी जोशेफले कट एण्ड बोल्ड आउट गर्दै पेभिलिएन फर्काए । जोफ्रा आर्चर २३, ओली पोप १२, जस बटलर ९, डोम बेस ३ रनमा आउट हुन पुगे । तीव्र गतिका बलर शेनन ग्याब्रियलले २१.२ ओभरमा ४ मेडन सहित ७५ रन खर्चेर ५ विकेट लिए । रोस्टन चेस र अल्जारी जोशेफले २–२ तथा जेसन होल्डरको नाममा १ विकेट लिए ।

त्यसअघि पहिलो इनिङमा वेस्ट इन्डिज १ सय २ ओभरमा ३ सय १८ रनमा अल आउट भएको थियो । ओपनर क्रेग ब्रेथवेटले १ सय २५ बलमा ६ चौका सहित सर्वाधिक ६५ रनको योगदान दिए । क्रेगलाई कप्तान बेन स्टोक्सले एलबिडब्लू आउट गरेका थिए । जेम्स एन्डरसनले एलबिडब्लू आउट गर्नुअघि अर्का ओपनर जोन क्याम्पबेलले ३६ बलमा ३ चौका सहित २८ रन जोडे । युवा स्पिनर डोम बेसले सिलिपमा स्टोक्सबाट शाई होपलाई १६ रनमा क्याच गराउँदै पेभिलिएन फर्काए । मध्यक्रमका शम्राह ब्रुक्सले ३९ र रोस्टन चेशले ४७ रन जोडे ।

विकेटकिपर शेन डोरीचले १ सय १५ बलमा ८ चौका सहित ६१ रन जोडेपछि वेस्ट इन्डिजले अग्रता कायम गरेको थियो । इंग्ल्यान्डका कप्तान बेन स्टोक्सले १४ ओभरमा ५ मेडन सहित ४९ रन खर्चेर ४ विकेट लिए । जेम्स एन्डरसन ३, डोम बेसले २ र मार्क उडले १ विकेट लिए । पहिलो इनिङमा इंग्ल्यान्ड ६७.३ ओभरमा २ सय ४ रनमा अल आउट हुन पुगेको थियो । स्टोक्सले सर्वाधिक ४३ रन बनाउँदा अन्यले राम्रो प्रर्दशन गर्न सकेका थिएनन् ।

स्टोक्सले ९७ बलमा ७ चौका प्रहार गरे । जस बटलरले ३५ रन बनाए। बटलरले ४७ बलमा ६ चौका प्रहार गरे । दोस्रो ओभरको चौथो बलमा तीव्र गतिका बलर शेनन ग्याब्रियलले ओपनर डोम सिब्लेलाई शून्यमा बोल्ड आउट गरेका थिए । अर्का ओपनर रोरी बर्न्सलाई पनि ग्याब्रियलले ८५ बलमा ४ चौका सहित ३० रनमा एलबिडब्लू आउट गरे । होल्डरले ज्याक क्रलीलाई १० रनमा एलबिडब्लू आउट गरे ।

डोम बेस ४४ बलमा ४ चौका सहित ३१ रनमा अविजित रहे । जेम्स एन्डरसनलाई ग्याब्रियलले २० बलमा १ चौका सहित १० रनमा बोल्ड आउट गरे । होल्डरले आफ्नो टेष्ट करिअरको उत्कृष्ट प्रर्दशन गर्नेक्रममा २० ओभरमा ६ मेडन सहित ४२ रन खर्चेर ६ विकेट लिए । ग्याब्रियलले १५.३ ओभरमा ३ मेडन राख्दैं ६२ रन खर्चेर ४ विकेट लिए ।

यस जितसँगै पाहुना टोली वेस्ट इन्डिजले तीन टेष्ट सिरिजमा १-० को अग्रता कायम गरेको छ । दोस्रो टेष्ट जुलाई १६ देखि २० सम्म म्यानचेस्टरमा हुने छ । दोस्रो टेष्टमा इंग्ल्यान्डका नियमित कप्तान जो रुट टोलीमा फर्किने छन् ।