एजेन्सी – वेस्ट इन्डिज र इंग्ल्यान्डबीचको तीन टेष्ट सिरिज अन्तर्गत दोस्रो खेल आजदेखि सुरु हुँदैछ । खेल दिउँसो ३:४५ मा ओल्ड ट्रोफोर्ड म्यानचेस्टरमा सुरु हुनेछ ।

पहिलो टेष्टमा ४ विकेटले विजयी भएको वेस्ट इन्डिज एक खेल अगावै सिरिज २–० ले जित्ने रणनितीका साथ मैदान प्रवेश गर्ने छ । तर पहिलो खेल गुमाएपनि घरेलु टोली बाँकी दुई खेलमा उत्कृष्ट पूनरागमन गर्दै सिरिज जित्न चाहन्छ । इंग्ल्यान्डलाई दोस्रो टेष्ट जित्न पर्ने दबाब छ ।

नियमित कप्तान जो रुट पारिवारिक कारण उपलब्ध हुन नसक्दा पहिलो टेष्टमा बेन स्टोक्सले नेतृत्व गरेका थिए । रुट टोलीमा फर्कि सकेका छन् । स्थायी कप्तान रुटको आगमनसँगै इंग्ल्यान्डको ब्याटिङ बलियो बन्ने देखिन्छ । पहिलो खेलमा इंग्ल्यान्डले ब्याटिङमा कमजोर प्रर्दशन गरेको थियो ।

पहिलो खेलमा तेस्रो नम्बरमा ब्याटिङ गरेका जो डेनली दोस्रो खेलमा छैनन् । डेनलीले पहिलो इनिङमा १८ र दोस्रो इनिङमा २९ रनमा आउट भएका थिए । दोस्रो इनिङमा ७६ रन जोडेका युवा ब्याट्सम्यान ज्याक क्रलीले तेस्रो नम्बरमा ब्याटिङ गर्ने छन् ।

रुट पहिलो टेष्टमा नहुँदा क्रलीले चौथो नम्बरमा ब्याटिङ गरेका थिए । रुटले चौथो नम्बरमा ब्याटिङ गर्दा पाँचौ नम्बरमा ओली पोप वा बेन स्टोक्स मध्य एकले गर्ने छन् । रुटले टेष्टमा ओल्ड ट्राफोर्डमा ८५ को औसतमा रन बनाएका छन् । रुटको लक्की घरेलु मैदानको रुपमा समेत चिचिन्छ ।

टोलीमा बायाँ हाते युवा अलराउन्डर साम करनको सम्भावना छ । करनको आगमनले इंग्ल्यान्डको तल्लोक्रम ब्याटिङ र तीव्र गतिको बलिङ मजबुत हुने छ। अनुभवी तीव्र गतिका बलर जेम्स एन्डरसन र मार्क वुडलाई आराम दिएको छ । त्यसैले स्टुअर्ट ब्रोडले टोलीमा मौका पाउँने छन् । स्टुअर्ट पहिलो खेलमा बेन्चमा बसेका थिए । तीव्र गतिमा स्टुअर्ट सहित, जोफ्रा आर्चर, स्टोक्स र करनलाई खेलाउने रणनिती देखिन्छ । स्पिनर डोम बेसलेनै मौका पाउँने छन् ।

पहिलो खेलमा उत्कृष्ट जित हात पारेको वेस्ट इन्डिज दोस्रो खेलमा टोली परिवर्तनको सम्भावना कम छ । पहिलो खेलमा कप्तान जेसन होल्डर, तीव्र गतिका बलर शेनन ग्याब्रियल र जर्मेन ब्ल्याकवुडले उत्कृष्ट प्रर्दशन गर्दै सहज जित पक्का गरेका थिए । शाई होपलाई ठूलो इनिङ खेल्न केहि दबाब छ । उनले पहिलो टेष्टमा १६ र ९ रनमा आउट भएका थिए ।

पहिलो टेष्टको दोस्रो इनिङमा ९५ रन जोडेका ब्ल्याकवुड दोस्रो खेलमा पनि नायक बन्न सक्छन् । पहिलो इनिङमा करिअरकै उत्कृष्ट बलिङ गर्दै ६ विकेट लिएका थिए । ‘म्यान अफ द म्याच’ जुनिएका ग्याब्रियलले पहिलो इनिङमा ४ र दोस्रोमा ५ विकेट लिएका थिए । ओल्ड ट्राफोर्डमा पछिल्ला १२ टेष्ट खेलमा इंग्ल्यान्डले १ खेल मात्र गुमाएको छ भने ९ खेल जितेको छ ।