आइपिएलको मिति तय

एजेन्सी – इन्डियन प्रिमियर लिग (आइपिएल) को १३ औं संस्करण असोज पहिलो साता देखि सुरु हुने भएको छ । यस पटकको आइपिएल संयुक्त अरव इमिरेट्स (यूएई) मा हुने यस अघि नै निश्चित भएको थियो ।

आइपिएल गभर्निंग काउन्सिलका अध्यक्ष वृजेश पटेलले आइपिएल यस वर्ष असोज ३ देखि सुरु हुने बताएका छन् । पटेलका अनुसार फाइनल कात्तिक २३ वा २५ हुने छ। पटेलका अनुसार आइपिएलका खेल दुबई, आवूधावी र शारजाहमा हुनेछन् ।

आइपिएल देश बाहिर तेस्रो पटक हुन लागेको हो । यसअघि सन् २००९ मा आम निर्वाचनको कारण पूरै संस्करण दक्षिण अफ्रिकामा भएको थियो । सन् २०१४ मा आमनिर्वाचनको कारण यूएईमा आइपिएलका २० खेल भएका थिए ।

आइसिसी बैठकले विश्वभर फैलिएको कोरोना भाइरस (कोभिड१९) को महामारीको कारण आगमी अक्टोबर नोभेम्बरमा अष्ट्रेलियामा हुने टि२० विश्वकप एक वर्षको लागि सरेको जनाएको थियो । त्यस्तै यस अघिनै सेप्टेम्बरमा पाकिस्तानमा हुने तय भएको एसिया कप टि२० प्रतियोगिता पनि सरेसँगै आइपिएल गर्न बाटो खुलेको थियो ।