काठमाडौं (हाम्रो खेलकुद) – नेपाली लेग स्पिनर सन्दीप लामिछानेले आगामी संस्करणको क्यारेबियन प्रिमियर लिग (सिपिएल) खेल्ने सम्भावना अन्यौल र कठिन बनेको छ ।

सिपिएल भदौ २ देखि २५ (अगष्ट १८– सेप्टेम्बर १०) सम्म हुँदैछ । तर नेपाल सरकारले कोरोना भाइरस महामारीको कारण भदौ १ गते सम्मलाई अन्तर्राष्ट्रिय उडानलाई रोक लगाएको छ । आइसिसीको नियम अनुसार कुनैपनि खेलाडी १४ दिन क्वारेन्टाइनमा बस्नु पर्ने हुन्छ । जसले गर्दा सन्दीपले सिपिएल खेल्ने सम्भावना कठिन बन्दै गएको छ । सन्दीपको व्यवस्थापन हेर्दै आएका नेपाली क्रिकेट टोलीका भिडियो एनलिस्ट रमन शिवाकोटीले पनि सन्दीपको यात्रा कठिन रहेको बताउँछन् ।

‘सन्दीप उता पुग्नुपर्ने साउन तेस्रो साताभित्र हो । उडान खुलेको छैन । त्यहि समस्या हो । अहिले सम्म त्यहि मिलाउन खोजिरहेका छौं । भदौ १ पछि खुलेपछि १४ दिन क्वारेन्टनइनमा बस्नुपर्ने हुन्छ । त्यसैले भदौ १ पछि जाने सम्भावना एकदमै कम छ’, रमनले हाम्रो खेलकुदसँग भने ।

‘उता गएर १४ दिन बस्नुपर्छ । त्यसले गर्दा हामीलाई समस्या भएको छ । सरकारसँग उनीहरुले उतैबाट पहल गरिरहेका छन् । यताबाट भने सरकारलाई कुनै पहल भएको छैन । एक्लै जहाज लगेर जाने पनि होइन । त्यसैले मिलाउनै समस्या परि रहेको छ’, उनले भने ।

गत असारमा भएको ड्राफ्टमा सन्दीपलाई जमैका तलावाजले एक करोड नेपाली रुपैयाँ भन्दा बढी मूल्यमा अनुबन्ध गरेको थियो । सन्दीपको टोली जमैकामा आन्द्रे रसेल, कार्लोस ब्रेथवेट, तरबेज शाम्सी, ओशन थोमस जस्ता स्टार खेलाडी रहेका छन् । सिपिएलमा दुइ सेमिफाइनल र एक फाइनल गरि कुल ३३ खेल हुने छन् । सबै खेल समर्थक विनाको रंगशालामा हुने छ ।

सन्दीप तेस्रो पटक सिपिएल खेल्ने तयारीमा छन् । यस अघि सन्दीपले सन् २०१८ मा सिपिएलमा सेन्ट किट्स एन्ड नेभिस पेट्रीयट्सबाट खेलेका थिए । पहिलो सिजन सेन्ट किट्समा अनुबन्ध हुँदा सन्दीपले ५ हजार अमेरिकी डलर प्राप्त गरेका थिए । पहिलो सिजनमा उनले ५ खेल खेल्दै ७ विकेट हात पारेका थिए ।

दोस्रो सिजनमा बार्बाडोस ट्राइडेन्ट्समा अनुबन्धित सन्दीपले ६ खेल खेलेका थिए । उनले कुल ८ विकेट लिए । सन्दीप राष्ट्रिय टोलीको खेल जुधेपछि सिजनको बीचमै छोडेर गएपनि ट्राइडेन्ट्सले उपाधि जितेको थियो । दोस्रो सिजनमा भने बार्बाडोसले उनलाई पाँचौ चरणमा छान्दै ७० हजार अमेरिकी डलर तिरेको थियो । तर सन्दीप पूरा सिजन उपलब्ध नभएका कारण उनले अनुबन्ध रकमको शत प्रतिशत भने प्राप्त गरेनन् ।