एजेन्सी – आयरल्यान्डविरुद्ध तीन ओडिआई सिरिज घरेलु टोली इंग्ल्यान्डले एक खेल अगावै २–० ले जितेको छ ।
इंग्ल्यान्डले दोस्रो खेलमा आयरल्यान्डलाई ४ विकेटले पराजित गर्दै सिरिज जितेको हो । आयरल्यान्डले प्रस्तुत गरेको २ सय १३ रनको लक्ष्य इंग्ल्यान्डले ३२.३ ओभरमा पूरा गरेको हो । इंग्ल्यान्डका ओपनर जोनी बयरस्टोले सर्वाधिक ८२ रनको योगदान दिए । जोश लिटिलले १६ औं ओभरको अन्तिम बलमा क्याच आउट गराउनु अघि बेयरस्टोले ४१ बलमा १४ चौका र २ छक्का प्रहार गरे । योसँगै बेयरस्टोले ओडिआई करिअरमा ३ हजार रन पनि पूरा गरेका छन् ।
ओपनर जेसन रोयलाई क्रेग यौङले पहिलो ओभरको तेस्रो बलमा ग्यारेथ डेलानीबाट शून्यमा आउट गराए । जेम्स भिन्सलाई कर्टिस क्याम्फरले १६ रनमा बोल्ड आउट गरे । कर्टिसलेनै टम ब्यान्टनलाई १५ रनमा एलबिडब्लू आउट गरे । लिटिलले कप्तान ओइन मोर्गन र मोइन अलीलाई शून्यमा पेभिलिएन फर्काए ।
तल्लोक्रममा साम बिलिंग्स ६१ बलमा ६ चौका सहित ४६ रनमा अविजित रहे । डेभिड विल्ली ४६ बलमा ५ चौका र २ छक्का सहित ४७ रन बनाउँदै सहज जित पक्का गराए । आयरल्यान्डका जोश लिटिलले ३, कर्टिस क्याम्फरले २ र क्रेग यौङले १ विकेट लिए ।
त्यसअघि साउथह्याप्टनमा टस जितेर पहिला ब्याटिङ रोजेको आयरल्यान्डले ५० ओभरमा ९ विकेटको क्षतिमा २ सय १२ रन बनाएको थियो । आयरल्यान्डका युवा खेलाडी कर्टिस क्याम्फरले ८७ बलमा ८ चौका सहित सर्वाधिक ६८ रनको योगदान दिए । डेब्यु सिरिज खेलि रहेका कर्टिसको यो लगातार दोस्रो अर्ध शतक हो ।
ओपनर पल स्टर्लिङलाई १२ र ग्यारेथ डेलानीलाई शून्यमा डेभिड विल्लीले पेभिलिएन फर्काए । कप्तान एन्डी बलर्बीनीलाई १४.२ औं ओभरमा जेम्स भिन्सले बेयरस्टोबाट क्याच गराए । भिन्सको यो पहिलो अन्तर्राष्ट्रिय विकेट समेत हो । स्पिनर आदिल राशिदले ह्यारी टेक्टर २८, केभिन आ’ ब्रायन ३ र लोर्कान टकरलाई २१ रनमा आउट गर्दै आफ्नो ओडिआई करिअरको १ सय ५० विकेट पूरा गरे । इंग्ल्यान्डबाट ओडिआईमा १ सय ५० विकेट लिने उनी पहिलो स्पिनर हुन् ।
सिमी सिंह २५, एन्डी म्याकब्रिन २४ र क्रेग यौङले २ रन जोडे । इंग्ल्यान्डका आदिल राशिदलेले १० ओभरमा ३४ रन खर्चेर ३ विकेट लिए । डेभिड विल्ली र सकीब महमुदले २-२ विकेट लिए । जेम्स भिन्स र रोसी टोपलीको नाममा १–१ विकेट रह्यो । पहिलो खेलमा इंग्ल्यान्ड ६ विकेटले विजयी भएको थियो । तेस्रो तथा अन्तिम खेल मंगलबार हुँने छ ।
