काठमाडौं (हाम्रो खेलकुद) – अन्तिम बल अनि १ रनको जित । त्यो खुसी, त्यो क्षण नेपाली क्रिकेटकै एक महत्त्वपूर्ण सफलता । अर्थात नेपालले आजकै दिन दुई वर्ष अघि नेदरल्यान्ड्सलाई १ रले हराउँदै अन्तर्राष्ट्रिय एकदिवसिय मान्यता (ओडिआई) पहिलो जित निकालेको थियो ।

डेब्यु ओडिआई सिरिजको पहिलो खेलमा नेपाल नेदरल्यान्ड्सविरुद्ध ५५ रनले पराजित भएको थियो । सिरिज बराबर गर्न पहिलो खेल हारेको नेपाललाई दोस्रोमा जित बाहेक अन्य विकल्प थिएन । टस जितेर कप्तान पारस खड्काले पहिला ब्याटिङ गर्ने निर्णय लिए ।

नेपाल पहिला ब्याटिङ गर्दै ४८.५ ओभरमा २ सय १६ रनमा अल आउट भएको थियो । कप्तान पारस खड्का ५१ र सोमपाल कामीले ६१ रनको अर्ध शतकीय इनिङ खेलेका थिए । २ सय १७ रनको विजयी लक्ष्य पछ्याएको घरेलु टोली नेदरल्यान्ड्सलाई मध्यक्रमका वस्ली बर्रेसीलेले ७१ रन जोड्दै सहज जिततर्फ लम्काए ।

खेलको ३६ औं ओभरको पाँचौ बलमा बर्रेसीलाई दीपेन्द्रसिंह ऐरीले एलविडब्लू आउट गरेपछि नेदरल्यान्ड्स १४३-६ को अवस्थामा पुगेको थियो । जुन विकेट उक्त खेलको टनिङ प्वाइन्ट बन्न पुग्यो । शन स्नेटरलाई ४३.३ ओभरमा सन्दीपले १२ रनमा बोल्ड आउट गरेपछि नेदरल्यान्ड्स १८५-९ को अवस्थामा पुगेको थियो । तर फ्रेड क्लासेन र पल भान मेकिरेनले नेदरल्यान्ड्सलाई ४९ ओभर सम्म २११-९ को अवस्थामा पुर्याएपछि खेल निकै रोमाञ्चक बन्न पुगेको थियो ।

नेदरल्याड्सलाई जित्न अन्तिम ६ बलमा ६ रन र नेपाललाई १ विकेट आवश्यक थियो । पहिलो बलमा पारसले क्लासेनलाई १ रन दिँदा दोस्रो बल डट राखे । तेस्रो बलमा १ रन दिएका पारसले चौथो बलमा फिल्डरबीच तालमेल नमिल्दा क्लासेनले २ बटुले । पारसले पाँचौ बल डट राखेपछि खेल अझ रोमाञ्चक र उत्कृष्ट बन्यो । अन्तिम बलमा क्लासेनले १ रन लिनेक्रममा पारसले रन आउट गरेपछि नेपालले पहिलो ओडिआई जित १ रनले जितेको थियो ।

नेपालका लागि यो खेलमा जितमात्रै थिएन, ऐतिहासिक पहिलो वान डे सफलता समेत थियो । जसको कारण पनि त्यो जितको महत्व र हर्ष अन्य भन्दा बेग्लै रहन पुग्यो । अझ अन्तिम बलमा १ रनको रोमान्चक जितले झनै विशेष बनायो । पहिलो ओडिआई जित १ रनको हुँदा सधै विशेष बनि रहने छ ।