एजेन्सी – इंग्ल्यान्डका कप्तान ओइन मार्गनले आयरल्यान्डविरुद्ध तेस्रो तथा अन्तिम ओडिआई खेलमा विश्फोटक ब्याटिङ गर्दै सानदार शतक प्रहार गरेका छन् ।

मोर्गनले ७८ बलमा आफ्नो ओडिआई करिअरको १४ औं शतक प्रहार गरे । आयरल्यान्ड मोर्गनको जन्मथलो हो । उनले आयरल्यान्डबाट पनि अन्तर्राष्ट्रिय क्रिकेट खेलेका छन् । साउथह्याप्टनमा टस हारेर ब्याटिङको निम्तो पाएको इंग्ल्यान्डले २७ ओभरमा ४ विकेट गुमाउँदै १ सय ९३ रन बनाएको छ ।

मोर्गन ८४ बलमा १५ चौका र ४ छक्का सहित १ सय ६ रनमा क्याच आउट हुन पुगे । मोर्गनले २५ औं ओभरको अन्तिम बलमा जोश लिटिललाई चौका प्रहार गर्दै शतक पूरा गरेका थिए । लिटिलेनै २६.३ ओभरमा मोर्गनलाई क्याच आउट गराए ।

टम ब्यान्टन ४९ बलमा ६ चौका र १ छक्का सहित ५७ रनमा खेलि रहेका छन् । ब्यान्टनको यो ओडिआई करिअरको पहिलो अर्ध शतक हो । खराब सुरुवात गरेको इंग्ल्यान्डलाई चौथो विकेटका लागि मोर्गन र ब्यान्टनले १ सय ४६ रनको उत्कृष्ट साझेदारी गर्दै बलियो योगफलको बाटो देखाए ।

ओपनर जेसन रोयलाई पहिलो ओभरको पाँचौ बलमा क्रेग यौङले कप्तान एन्डी बलर्बीनीबाट १ रनमा क्याच आउट गराए । चौथो ओभरको दोस्रो बलमा जोनी बेयरस्टोलाई मार्क आदिरले ४ रनमा बोल्ड आउट गरे । क्रेगले नवौं ओभरको पहिलो ओभरमा जेम्स भिन्सलाई १६ रनमा क्याच आउट गराएपछि इंग्ल्यान्ड ४४–३ को कमजोर अवस्थामा पुगेको थियो ।

आयरल्यान्डमा जन्मिएका मोर्गनले उमेर समूह र ओडिआई डेब्यु उतैबाट गरेका थिए । मोर्गनले सन् २००६ मा आयरल्यान्डबाट स्कटल्यान्डविरुद्ध डेब्यु गरेका थिए । उक्त डेब्यु खेलमा मोगर्न ९९ रनमा आउट हुन पुगेका थिए । सन् २००७ को एक दिवसिय विश्वकप पनि मोर्गनले आयरल्यान्डबाटै खेलेका थिए ।

आयरल्यान्डबाट मोर्गनले सन् २००९ सम्म २३ ओडिआई खेले ।
त्यसअघि आयरल्यान्डबाट मोर्गनले सन् २००४ र २००६ मा यू१९ विश्वकप खेल्दै उत्कृष्ट प्रर्दशन गरेका थिए । उत्कृष्ट क्षमताका मोर्गन आयरल्याड भन्दा ठूलो देशबाट खेल्दै स्टार खेलाडी बन्न चाहान्थे ।

मोर्गनकी आमा इंग्ल्यान्डकी थिइन् । त्यसैले सन् २००९ पछि मोर्गनले इंग्ल्यान्डबाट खेल्ने निर्णय गरे । हाल मोर्गन इंग्ल्यान्डका सर्वाधिक सफल कप्तान हुन् । उनको कप्तानीमा गत वर्ष इंग्ल्यान्डले पहिलो पटक एकदिवसिय विश्वकप जितेको थियो ।