एजेन्सी – ओपनर शान मसूदको उत्कृष्ट शतक र तीव्र गतिका बलरको सुरुवाती उच्च प्रर्दशनमा इंग्ल्यान्डविरुद्ध पहिलो टेष्ट खेलमा पाकिस्तानले विशाल अग्रता कायम गरेको छ ।

दोस्रो दिनको समाप्तीमा पाकिस्तानले २ सय ३४ रनको अग्रता लिएको छ । इंग्ल्यान्ड पहिलो इनिङमा संकटमा छ । इंग्ल्यान्डले २८ ओभरमा ४ विकेट गुमाउँदै ९२ रन बनाएको छ । युवा ब्याट्सम्यान ओली पोप ६७ बलमा ६ चौका सहित ४६ र विकेटकिपर जस बटलर १५ रनमा अविजित छन् ।

पहिलो ओभरको चौथो बलमै तीव्र गतिका युवा बलर शाहिन अफ्रिदीले ओपनर रोरी बन्र्सलाई ४ रनमा एलबिडब्लू आउट गरे । अर्का ओपनर डोम सिब्लेलाई मोहम्मद अब्बासले चौथो ओभरको दोस्रो बलमा ८ रनमा एलबिडब्लू आउट गर्दै पेभिलिएन फर्काए । अब्बासले बेन स्टोक्सलाई शून्यमा बोल्ड आउट गरेपछि घरेलु टोली इंग्ल्यान्ड सुरुवातमै दबाबमा परेको थियो । कप्तान जो रुटलाई स्पिनर यासिर शाहले १४ रनमा पेभिलिएन फर्काए ।

त्यसअघि पाकिस्तान पहिलो इनिङमा १०९.३ ओभरमा ३ सय २६ रनमा अल आउट थियो । मसूदले ३ सय १९ बलमा १८ चौका र २ छक्का सहित १ सय ५६ रनको उत्कृष्ट इनिङ खेले । उनको यो टेष्ट इनिङको लगातार तेस्रो शतक हो । टेष्ट करिअरको चौथो शतक पर्दछ । सन् १९९६ पछि इंग्ल्यान्डमा शतक प्रहार गर्ने मसूद पहिलो पाकिस्तानी ओपनर हुन् ।

शान मसूदले दुई पटक सम्म ब्यक्तिगत ४५ रनमा जीवनदान पाएका थिए । जुन जीवनदान इंग्ल्यान्डलाई ठूलो भारी पर्यो । स्पिनर डोम बेसको ३९ औं ओभरको अन्तिम बलमा विकेटकिपर जस बटलरले क्याच छोडेका थिए । ४६.४ ओभरमा बटलर स्टम्पिङ गर्न चुकेका थिए ।

१६ औं ओभरको पहिलो बलमा ओपनर आबिद अलीलाई जोफ्रा आर्चरले १६ रनमा बोल्ड आउट गरे । १९ औं ओभरको पहिलो बलमा कप्तान अजहर अलीलाई क्रिस वोक्सलाई शून्यमा एलबिडब्लू आउट गरे । ५० औं ओभरको अन्तिम बलमा जेम्स एन्डरसनले बाबर आजमलाई सिलिपमा कप्तान जो रुटबाट ६९ रनमा क्याच आउट गराए ।

बाबरले १ सय ६ बलमा ११ चौका प्रहार गरे । तेस्रो विकेटका लागि बाबर र मसूदले ९६ रनको साझेदारी गरेका थिए । स्टुअर्ट ब्रोडले बेन स्टोक्सबाट असाद शफीकलाई ७ रनमा क्याच गराए । विकेटकिपर मोहम्मद रिजवनलाई वोक्सले बटलरबाट ९ रनमा क्याच गराए ।

छैटौं विकेटका लागि मसूदले शादब खानसँग १ सय ५ रनको शतकीय साझेदारी गरेपछि पाकिस्तान बलियो अवस्थामा पुगेको हो । स्पिनर डोम बेसले रुटबाट खानलाई ४५ रनमा क्याच गराउँदै साझेदारी तोडे । शादबले ७६ बलमा ३ चौका प्रहार गरे । जोफ्रा आर्चरले यासिर शाहलाई ५ रन र मोहम्मद अब्बासलाई शून्यमा आउट गरे ।

इंग्ल्यान्डका स्टुअर्ट ब्रोड र जोफ्रा आर्चरले ३–३ विकेट लिए । क्रिस वोक्सले २, जेम्स एन्डरसन र डोम बेसले १–१ विकेट लिए ।