काठमाडौं (हाम्रो खेलकुद) – कोभिड १९ को बढ्दो संक्रमणका कारण नेपाल क्रिकेट संघ (क्यान) को वार्षिक साधरण सभा स्थगित भएको छ ।

यसै महिनाका लागि साधारण सभा गर्ने तयारीका रहेको क्यानले कोरोना महामारीका कारण अर्को सुचना नभएसम्मका लागि साधारण सभा स्थगित गरेको क्यानका सचिव अशोकनाथ प्याकुरेले मंंगलबार जारी विज्ञप्तीमा उल्लेख छ ।

गतवर्ष असोज दोस्रो साता क्यानले चतुरबहादुर चन्दको अध्यक्षतामा नयाँ कार्यसमिति निर्वाचित भएको थियो । त्यसपछि पहिलो साधारण सभा गर्ने तयारीमा रहेपनि अहिलेको परिस्थितिका कारण सम्भव भएन ।

क्यानको नयाँ कार्यसमिति आएको ११ महिना हुँदा आशा र अपेक्षा अनुसार काम गर्न नसकेको गुनासो सुनिन थालेको छ । निर्वाचनपछि २०७३ मा अन्तराष्ट्रिय क्रिकेट परिषद् (आइसिसी) ले असोज २७ मा सशर्त क्यानमाथिको प्रतिबन्ध फुकुवा गरेको थियो ।

त्यसैले क्यानले पूर्ण रुपमा काम गर्न पाउने वातावरण अझै बनाउन सकेको छैन । जसले गर्दा क्यानले कतिपय महत्वपूर्ण निर्णय लिन सकेको छैन । क्यान आन्तरिक कुरामै अलमलिएको भन्दै आलोचित हुँदै आएको छ ।

कोरोना महामारीको कारण यो वर्ष नेपाली राष्ट्रिय पुरुष र महिला टोली दुबैको अन्तर्राष्ट्रिय खेल हुनेको सम्भावना कम छ ।