एजेन्सी – अमेरिका राष्ट्रिय क्रिकेट टोलीका तीव्र गतिका बलर अली खानलाई अर्को सातादेखि सुरु हुने इन्डियन प्रिमियर लिग (आइपिएल) मा कोलकाता नाइट राइडर्सले अनुबन्ध गरेको छ ।

योसँगै आइपिएलमा अनुबन्ध हुने अली खान पहिलो अमेरिकन खेलाडी बनेका छन् । २९ वर्षिय अली खानलाई कोलकाताले तीव्र गतिका बलर ह्यारी गर्नीको स्थानमा अनुबन्ध गरेको हो । इंग्ल्यान्डका गर्नीले अघिल्लो महिना काँधमा चोट लागेको कारण आइपिएल गुमाउने भएका हुन् । तर आइपिएल गभर्निंग काउन्सिलले अलीको अनुबन्धनलाई आधिकारिकता दिन भने बाँकी छ ।

क्यारेविन प्रिमियर लिग (सिपिएल) मा ट्रीनबेगो नाइट राइडर्सले अपराजित हुँदै उपाधि जित्दा अली टोलीमा सदस्य थिए । सिपिएलमा अलीले ८ विकेट लिएका थिए । अमेरिकाबाट अलीले १ ओडिआई र ९ लिष्ट ए खेल खेलेका छन् । ओडिआईमा १ र लिष्ट ए मा २३ विकेट लिएका छन् । ३६ टि२० एस खेलमा ३८ विकेट लिएका छन् ।

पाकिस्तानमा हुर्केका अली संयुक्त अरव इमिरेट्र्स (यूएई) को वातावरणसँग घुलमिल छन् । कोलकातामा कमलेश नगरकोटी, शिवम माभी, प्याट कमिन्स, लोकी फर्गुसन लगाएतका तीव्र गतिका बलर छन् । कोलकाताले आइपिएलमा सेप्टेम्बर २३ मा मुम्बई इन्डियन्सविरुद्ध खेल्दै सुरुवात गर्ने छ ।