एजेन्सी – इन्डियन प्रिमियर लिग (आइपिएल) २०२० अन्तर्गत आइतबार एकै दिन तीन सुपर ओभर भयो । आइपिएल इतिहासमा पहिलो पटक एकै दिन दुवै खेलमा सुपर ओभर भएका हुन् । योमात्र होइन क्रिकेट इतिहासमा नै पहिलो पटक एकै खेलमा दुई पटक सुपर ओभर भयो ।

आइपिएलको ३५ औं खेलमा सनराइजर्स हैदराबाद र कोलकाता नाइट राइडर्सबीच शेख जायद स्टेडियम आबूधाबीमा प्रतिस्पर्धा भएको थियो । कोलकाताले निर्धारित २० ओभरमा पाँच विकेटको क्षतिमा १ सय ६३ रन बनाएको थियो । उक्त जवाफी लक्ष्य पछ्याउने क्रममा हैदराबादले ६ विकेटको क्षतिमा १ सय ६३ रन बनाएपछि खेल सुपर ओभरमा धकेलिएको थियो ।

हैदराबादलाई अन्तिम ओभरमा जितको लागि १८ रन चाहिँएको थियो । कप्तान डेभिड वार्नरले आन्द्रे रसेललाई दोस्रो, तेस्रो र चौथो बलमा लगातार तीन चौका प्रहार गरेपछि खेल थप रोमान्चक बनेको थियो । पाँचौं बलमा वार्नरले दुई रन लिए । अन्तिम बलमा वार्नरले लेग वाईका रुपमा एक रन बटुलेपछि सुपर ओभरमा पुगेको थियो ।

कोलकाता लोकी फर्गुसनले ४ ओभरमा १५ रन खर्चेर प्रमुख ३ विकेट लिएका थिए । सुपर ओभरमा हैदराबादका ओपनर डेभिड वार्नरलाई फर्गुसनले बोल्ड आउट गरे । अब्दुल सामदले दोस्रो बलमा दुई रन बटुले । तेस्रो बलमा सामद बोल्ड आउट भए । कोलकातालाई जितको लागि ६ बलमा तीन रन बनाउनु पर्दथियो ।

कोलकाताको सुरुवात सुपर ओभरमा ओईन मोर्गन र दिनेश कार्तिकले गरेका थिए । विश्वकप विजेता मोर्गनलाई राशिद खानले पहिलो बल डट राखे । दोस्रो बलमा मोर्गनले एक रन बटुले । तेस्रो बल कार्तिकले डट खाएपनि चौथो बलमा लेग वाईको रुपमा दुइ रन बटुल्दै जित पक्का गराए । जुन कोलकाताले सुपर ओभरमा जित निकालेको पहिलो पटक हो ।

यसअघिका तीनै सुपर ओभरमा कोलकाता पराजित भएको थियो । जारी सिजनमा पहिलो खेल खेलेका फर्गुसनले सुपर ओभर र खेल दुबैमा उच्च प्रर्दशन गर्दै प्लेयर अफ द म्याच चुनिए ।

यता सुपर ओभर चलिरहँदा दुबई इन्टरनेशल क्रिकेट स्टेडियममा मुम्बई इन्डियन्स र किंग्स इलेभेन पन्जाबबीचको खेल सुरु भई सकेको थियो । टस जितेर पहिला ब्याटिङ रोजेको मुम्बईको सुरुवात कमजोर रहेपनि काइरन पोलार्डको उत्कृष्ट अन्त्यमा २० ओभरमा ६ विकेटको क्षतिमा १ सय ७६ रन बनाएको थियो ।

उक्त विजयी लक्ष्य पछ्याउने क्रममा पन्जाब एक समय सहज जित नजिक थियो । १८ बलमा २७ रन चाहिँएको थियो । तर जस्प्रित बुमराहले १८ औं ओभरको तेस्रो बलमा कप्तान लोकेश राहुललाई ७७ रनमा बोल्ड आउट गरेपछि खेल थप रोमान्चक बनेको थियो । नाथन कुल्टर नाइलले १९ औं ओभरमा १३ रन खर्चेपछि पन्जाबलाई अन्तिम ६ बलमा ९ रन चाहिँएको थियो ।

ट्रेन्ट बोल्टको दोस्रो बलमा जोर्डनले चौका प्रहार गर्दै सहज जितको आशा दिलाएका थिए । तर अन्तिम बलमा दुइ रन लिने क्रममा जोर्डनलाई काइरन पोलार्डको उत्कृष्ट थ्रो मा डी ककले उत्कृष्ट रन आउट गराउँदै एकै दिन दुई सुपर ओभरमा पुर्याए ।

आइपिएल इतिहासमा पहिलो पटक एकै दिन दुई सुपर ओभर भएका हुन् । पन्जाब र मुम्बईको जारी सिजनमा दोस्रो सुपर ओभर हो । यस अघिका सुपर ओभर दुवै टोली पराजित भएका थिए । पन्जाब दिल्ली र मुम्बई बेंगलोरसँग सुपर ओभरमा पराजित भएका थिए ।

सुपर ओभरमा मुम्बईका बुमराहले उत्कृष्ट बलिङ गर्दै पन्जाबलाई ५ रनमा रोकेका थिए । पन्जाबले सुपर ओभरमा ओपनिङमा राहुल र निकोलस पूरन आएका थिए । पहिलो बलमा राहुलले एक रन बटुल्दा दोस्रो बलमा पूरन अनुकोल रोयबाट क्याच आउट हुन पुगे । पुरन आउट भएपछि क्रिस गेल र मयंक अग्रवाललाई छोडेर पन्जाबले दिपक हुडालाई ब्याटिङको लागि पठाएको थियो । तेस्रो र चौथो बलमा एक एक रन बटुल्दा पाँचौमा भने राहुलले २ रन जोडेका थिए । तर अन्तिम बलमा राहुल एलबिडब्लू आउट हुन पुगेका थिए ।

मुम्बईले ६ बलमा ६ रन सहजै जोड्ने अनुमान गरिएको थियो । तर मोहम्मद शामीले लगातार योर्कर फाल्दै दोस्रो सुपर ओभर बराबरीमा सकाए । डी कक र रोहितले सुरुवाती पाँच बलमा ४ रन जोडेपछि अर्को सुपर ओभरको सम्भावना बढेको थियो । अन्तिम बलमा मुम्बईलाई दुई रन चाहिँएको थियो । तर मोहम्मद शामीले बलमा डी कक दुइ रन लिनेक्रममा रबि बिश्रोईको थ्रोमा राहुलले उत्कृष्ट स्टम्पिङ आउट गरेपछि सुपर ओभर बराबर भएको थियो ।

सुपर ओभर बराबर हुँदा गत वर्षको एकदिवसिय विश्वकप फाइनलको याद दिलाएको थियो । गतवर्ष इंग्ल्यान्ड र न्युजिल्यान्डबीचको सुपर ओभर बराबर भएपछि बाउन्ड्री काउन्ट (चौका र छक्का ) बढि प्रहार गरेको आधारमा इंग्ल्यान्ड च्याम्पियन बनेको थियो । राहुलको रन आउट बटलरले विश्वकपमा मार्टिन गुप्टिललाई गराएको जस्तो थियो । उक्त सुपर ओभरमा दुई रन चाहिँएको अवस्थामा बटलरले गुप्टिललाई उत्कृष्ट रन आउट गराउँदै विश्वकप जिताएका थिए ।

आइसिसीले उक्त विश्वकप फाइनल विवादपछि नियम परिवर्तन गर्दै नतिजा नआउन सम्म सुपर ओभर हुने बनाई सकेको छ । बाउन्ड्री काउन्ट अघि सुपर ओभर बराबर भएका स्टम्प ताक्ने (बल आउट) नियम थियो । बाउन्ड्री काउन्ट नियम भएको भए यस खेलमा मुम्बई विजयी हुने थियो । मुम्बईले २४ र पन्जाबले कुल २२ बाउन्ड्री प्रहार गरेका थिए ।

दोस्रो सुपर ओभरको नियम अनुसार पहिलो सुपर ओभरमा ओपनिङ गरेका खेलाडी र बलरले पाउँदैनन् । मुम्बईले पोलार्ड र हार्दिकलाई पठाएको थियो । पन्जाबले क्रिस जोर्डनलाई गराएको थियो । मुम्बईले ६ बलमा ११ रन जोडेको थियो । जसक्रममा पोलार्डले अन्तिम बलमा लङअनमा प्रहार गरेको छक्कालाई अग्रवालले उत्कृष्ट बचाउँदै गर्दै टोलीको महत्वपूर्ण चार रन बचाएका थिए ।

उता पन्जाबले क्रिस गेल र मयंक अग्रवाललाई पठाएको थियो । बलिङ ट्रेन्ट बोल्टले गरेका थिए । पहिलो बलमा गेलले छक्का प्रहार गरेपछि पन्जाबलाई सहज बनेको थियो । दोस्रो बलमा एक रन बटुल्दा तेस्रो र चौथो बलमा अग्रवालले चौका प्रहार गर्दै जित पक्का गराए । बोल्टले गतवर्ष इंग्ल्यान्डसँगको फाइनलको सुपर ओभरमा १५ रन खर्चेका थिए ।

यसअघि पन्जाब जारी सिजनको पहिलो खेलमै दिल्लीसँग सुपर ओभरमा पराजित भएको थियो । दिल्लीले प्रस्तुत गरेको १ सय ५८ रनको लक्ष्य पछ्याउने क्रममा अन्तिम तीन बलमा एक रन जोड्न नसक्दा सुपर ओभर हुन पुगेको थियो । जसमा कागिसो रबाडाले दुई विकेट लिदै तीन बलमा दुई रन लिएका थिए । दिल्लीले दुई बलमा तीन रन जोड्दै सुपर ओभरको जितबाट सुरुवात गरेको थियो ।

आइपिएलको दशौं खेलमा मुम्बई र बेंगलोरबीचको खेल पनि सुपर ओभरबाट नतिजा निल्केको थियो । जितको लागि २ सय २ रनको लक्ष्य पछ्याउने क्रममा मुम्बईले ५ विकेटको क्षतिमा २ सय १ रन बनाएपछि सुपर ओभरमा पुगेको थियो । नवदीप सैनीले उत्कृष्ट प्रर्दशन गर्दै सुपर ओभरमा ७ रन दिएका थिए । बेंगलोरले अन्तिम बलमा सुपर ओभरमा जित निकालेको थियो ।

आइपिएलमा एकै सिजनमा लिग चरणका ३६ खेलसकिँदा पाँच सुपर ओभर भई सकेका छन् । जुन एकै सिजनमा भएको सर्वाधिक सुपर ओभर हो । यसअघि एकै सिजनमा दुई सुपर ओभर मात्र भएका थिए । आइपिएलमा पहिलो सुपर ओभर सन् २००९ मा राजस्थान रोयल्स र कोलकाताबीच कप टाउनमा भएको थियो । यसअघि सन् २०१३ र २०१९ मा दुई सुपर ओभर भएका थिए । सन् २०१०, २०१४, २०१५ र २०१७ मा एक एक सुपर ओभर भएका थिए ।