एजेन्सी– इन्डियन प्रिमियर लिग (आइपिएल) को ४१ औं खेलमा आज चेन्नई सुपर किंग्स र मुम्बई इन्डियन्सबीच प्रतिस्पर्धा हुँदैछ । खेल नेपाली समय अनुसार ७ : ४५ पछि शारजाह क्रिकेट स्टेडियममा सुरु हुनेछ ।

गत वर्षको विजेता मुम्बई र उप विजेता चेन्नई दुबैलाई आजको खेल महत्त्वपूर्ण छ । चेन्नईलाई अन्तिम चारमा रहेर प्ले अफ खेल्ने सम्भावना कायमै राख्न जित्नै पर्ने हुन्छ । चेन्नई आजको खेलमा पराजित भएमा प्ले अफ सम्भावना अंक गणितिय झिनो आशा मात्र बाँकी रहने छ । मुम्बई चेन्नईलाई हराउँदै शीर्षस्थानमा उक्लिन चाहन्छ ।

मुम्बई १० खेलमा ६ मा जित र ३ मा हार सहित १२ अंकका साथ तेस्रो स्थानमा छ । दिल्ली १० खेलमा ७ मा जित र ३ मा हार सहित १४ अंक जोड्दै शीर्षस्थानमा छ । चेन्नई १० खेलमा ७ मा हार र ३ मा जित सहित पुछारमा छ ।

दुबै टोली पछिल्ला खेलमा हार बेहोरेका छन् । मुम्बई किंग्स इलेभेन पन्जाबसँग दोहोरो सुपर ओभर र चेन्नई राजस्थान रोयल्ससँग ७ विकेटले पराजित भएका थिए । यस अघि पहिलो खेलमा चेन्नईले मुम्बईलाई ५ विकेटले हराएको थियो । कागजी रुपमा चेन्नई भन्दा मुम्बई बलिायो छ । मुम्बईमा विश्वस्तरिय म्याच विनर खेलाडीको बाहुल्यता छ । चेन्नईमा सीमित खेलाडीमा बढी निर्भर छ ।

यस खेललाई आइपिएलका दुई सर्वाधिक सफल कप्तानबीचको भिडन्तको रुपमा हेरिएको छ । रोहितले चार र धोनीले तीन पटक आइपिएलको उपाधि जितेका छन् । रोहित र धोनी दुबै टोलीका प्रमुख हतियार हुन् । यी दुई कप्तानले खेलाडीको क्षमता मात्र होईन आफ्नो उत्कृष्ट कप्तानीमा पनि जित दिलाउन सक्ने क्षमता राख्ने गर्दछन् ।

पछिल्ला तीन खेलमा लगातार अर्ध शतक प्रहार गरेका मुम्बईका ओपनर क्विन्टन डी कक उत्कृष्ट लयमा छन् । उनको लयलाई रोक्न चेन्नईका बलरलाई सहज हुने छैन । शारजाहको छोटो बाउन्ड्रीमा रोहित शर्मा छक्का र चौकाको बर्षा बनाउन सक्छन् । सूर्यकुमार यादव पनि लयमा हुँदा मुम्बईको शीर्षक्रम मजबुत छ ।

तल्लोक्रममा काइरन पोलार्डको आक्रामक प्रर्दशन गर्दै आएका छन् । पोलार्डले ७ इनिङमा २ सयको स्ट्राइक रेटमा २ सय ८ रन बनाएका छन् । जसमा १७ छक्का सामेल छ । हार्दिक पान्ड्या पनि शारजाहमा नायक बन्न सक्छन् । बलिङमा जस्प्रित बुमराह र ट्रेन्ट बोल्टको जोडीले उच्च प्रर्दशन गर्दै आएका छन् । बुमराहले १५ र बोल्टले १२ विकेट लिएका छन् ।

यता चेन्नई इतिहासकै कमजोर अवस्थामा छ । चेन्नईको ओपनिङ साम करन र फाफ डु प्लेसिसले गर्ने छन् । डु प्लेसिस राम्रो लयमा छन् । डु प्लेसिसले १० खेलमा ४ मा अर्ध शतक सहित ३ सय ७५ रनका साथ चौथो स्थानमा छन् । डु प्लेसिसले आफ्नो लयलाई निरन्तरता दिन आवश्यक देखिन्छ । साम करनले आक्रामक सुरुवातका साथ ठूलो इनिङ खेल्न आवश्यक देखिन्छ । अम्बाती रायुडु, शेन वाटसन र महेन्द्रसिंह धोनीलाई उत्कृष्ट प्रर्दशन गर्न आवश्यक देखिन्छ । अन्यथा मुम्बईमाथि जित निकाल्न चेन्नईलाई सहज देखिदैन ।

रविन्द्र जडेजालाई आफ्नो लयलाई निरन्तरता दिन आवश्यक छ । चेन्नईले आज केदार जाधवलाई बेन्चमा राख्न सक्छ । केदारको स्थानमा रितुराज गायकवाडलाई मौका दिन सक्छ । तीव्र गतिका बलर जोश हेजलवुड र दीपक चहरलाई उत्कृष्ट प्रर्दशन गर्न आवश्यक देखिन्छ । आइपिएलमा मुम्बई र चेन्नईबीच कुल २९ खेल भएको छ । जसमा मुम्बई १७ खेलमा विजयी हुँदा १२ खेलमा पराजित भएको छ ।