एजेन्सी– राष्ट्रिय टोलीलाई खेलाडी छनोटको प्रमुख आधार घरेलु प्रतियोगिता प्रर्दशन हो । विश्व क्रिकेट जगतमै उमेर समूह हुँदै घरेलु प्रतियोगितालाई मुख्य आधार मानेर खेलाडी छनोट गर्ने गरिन्छ ।

एसोसिएट टोलीमा तुलनात्मक रुपमा कम प्रतिस्पर्धा हुने हुँदा उमेर समूहको प्रर्दशनकै आधारमा सिनियर टोलीमा छिटो मौका पाउने गर्दछन् । तर टेष्ट टोलीमा खेलाडीहरुको उच्च प्रतिस्पर्धाको कारण उमेरसँगै प्रमुख घरेलु प्रतियोगितामा निरन्तर उत्कृष्ट प्रर्दशन र धैर्य रहन आवश्यक देखिन्छ ।

घरेलु प्रतियोगितामा उच्च प्रर्दशन गर्दैमा सबै खेलाडी राष्ट्रिय टोलीमा मौका पाउछ भन्ने हुँदैन ।
भारत बलियो क्रिकेट टोली बन्नुमा क्रिकेट खेलाडीबीच उच्च प्रतिस्पर्धा पनि एक हो । त्यसैले घरेलु प्रतियोगितामा नियमित उच्च प्रर्दशन गर्दापनि टोलीमा मौका नपाएका थुप्रै खेलाडी छन् । ३० वर्षिय ब्याट्सम्यान सूर्यकुमार यादव त्यसै मध्यका एक उदाहरण हुन् ।

इन्डियन प्रिमियर लिग (आइपिएल), रणजी ट्रफी, शैद मुश्ताक अली ट्रफी र विजय हजारे ट्रफी भारतका प्रमुख घरेलु प्रतियोगिता हुन् । आइपिएल विश्वकै सर्वाधिक लोकप्रिय फ्रेन्चाइज लिग हो । यसको प्रर्दशनले सबै खेलाडीलाई निकै महत्वपूर्ण हुन्छ । रणजी प्रथम श्रेणी, विजय हजारे एक दिवसिय र शैद मुश्ताक टि२० प्रतियोगिता हुन् । यी चार प्रतियोगिता खेलाडी छनोटका भारतीय क्रिकेटमा प्रमुख आधार हुन् । तर यी सबै प्रतियोगिता नियमित खेल्दै राम्रो प्रर्दशनका बाबजुद पनि सूर्यले भारतीय टोलीमा स्थान बनाउन सकेका छैनन् ।

भारतीय टोलीको जर्सी लगाउने सपना पूरा गर्न संघर्षरत छन् । सूर्यको त्यहि संघर्ष र मिहिनेतको कारण आइपिएलमा उनको प्रर्दशनमा त्यतिनै चमक देखिएको छ । जारी सिजनको आइपिएलमा राम्रो प्रर्दशन गरि रहेका सूर्य भारतीय टोलीमा स्थान बनाउनेमा आशावादी थिए । तर भारतले आगमी महिना हुने चार टेष्ट, तीन ओडिआई र तीन टि२० सिरिजलाई सोमबार अष्ट्रेलिया भ्रमणलाई टोलीको घोषणा गर्यो । तर सूर्यको सपना पूरा हुन सकेन ।

त्यसको दुई दिनपछि भारतीय छनोट कर्तालाई उनले प्रर्दशनबाटै राम्रो जवाफ र सोच्न बाध्य बनाएका छन् । मुम्बई इन्डियन्सले रोयल च्यालेन्जर्स बेंगलोरलाई ५ विकेटले पराजित गर्दै दुई खेल अगावै प्ले अफमा पुर्याउन उनी हिरो मात्र बन्न पुगेनन् आफू भारतीय क्रिकेटमा किन योग्य नरहेको भन्ने प्रश्न समेत गर्ने ठाउँ देखाए । सुर्य ४३ बलमा १० चौका र ३ छक्का सहित ७९ रनमा अविजित रहँदै प्लेयर अफ द म्याच चुनिए । प्लेयर अफ द म्याचसँगै उनले एकै खेलमा चार व्यक्तिगत अवार्ड जितेका थिए ।

सूर्यको अर्को राम्रो विशेषता सट छनोटलाई लिइन्छ । सट छनोट क्रिकेटमा निकै महत्वपूर्ण हुन्छ । उनी मैदानको चारैतर्फ रन जोड्ने क्षमता राख्ने गर्दछन् । सूर्यले १६ औं ओभरको पहिलो बलमा मोहम्मद शिराजलाई चौका प्रहार गर्दै २९ बलमा जारी आइपिएलमा ब्यक्तिगत तेस्रो अर्धशतक पूरा गरेका थिए । उनको अर्धशतकमा डग आउटमा रहेका मुम्बईका खेलाडी, प्रशिक्षक र कप्तान रोहित शर्माले तालि बजाउँदै सम्मान दिनुको साथै खुसी थिए ।

अन्तिम ओभरको पहिलो बलमा सूर्यले शिराजलाई चौका प्रहार गर्दै खेल अन्त्य गरे । त्यसपछि उनले आफ्नो हेलमेट निकालेर सेलिब्रेसन गरे । उनले आफ्नो हात उठाउँदै छातीमा दुई पटक राख्दै ‘म छु’ भन्ने संकेत दिएका थिए । अर्कोतर्फ औंलाले ठिक छ भन्ने संकेत समेत दिएका थिए । उनले आफ्नो बेन्चतर्फ इंगित गरेको उक्त सेलेब्रेसन भारतीय टोलीको छनोटकर्ता तर्फ इंगित गरेको अनुमान समेत गरिएको छ ।

भारतीय क्रिकेटका कप्तान समेत रहेका बेंगलोरका विराट कोहलीले सूर्यको प्रर्दशनलाई हेरेर मन बुझाउन बाहेक अन्य विकल्प थिएन । बेंगलोरको जितमा उनी नै बाधक बनेका थिए । सूर्यले कोहलीको टोलीविरुद्ध गरेको प्रर्दशनले अझ विशेष महत्त्व राखेको थियो । कोहलीलाई पनि सूर्यले यी खेलाडी टोलीमा किन परेनन् भन्ने सोच्ने अवस्थामा पुर्याएका थिए ।

जारी सिजनमा राजस्थानविरुद्ध पनि सूर्य ७९ रनको अविजित इनिङ खेल्दै प्लेयर अफ द म्याच चुनिएका थिए । उनले आफू म्याच फिनिसर रहेको समेत प्रमाणित गरिसकेका छन् । सूर्यले पछिल्लो तीन वर्षमा आइपिएलमा उच्च प्रर्दशन गर्दै आएका छन् । जारी सिजनमा ३ सय ६२ रन बनाई सकेका छन् । सन् २०१९ मा मुम्बई च्याम्पियन बन्दा सुर्यले कुल ४ सय २४ रन जोडेका थिए । सन् २०१८ मा सुर्यले ५ सय १५ रन बनाउँदै सर्वाधिक रन बनाउने खेलाडीको सूचिमा आठौं स्थानमा थिए ।

मुम्बईबाट घरेलु क्रिकेट खेल्ने सुर्यले अन्य घरेलु क्रिकेटमा पनि उच्च प्रर्दशन गर्दै आएका छन् । सन् २०१० देखि मुम्बईबाट घरेलु क्रिकेट खेल्दै आएका उनले प्रथम, एक दिवसिय र टि२० तीनै शैलीमा उच्च प्रर्दशन गरेका छन् । उनले ७७ प्रथम श्रेणीमा १४ शतक र २६ अर्ध शतकका साथ ५ हजार ३ सय २६ रन बनाएका छन् । उत्कृष्ट प्रर्दशन २ सय रहँदा औसत ४४ को छ ।

सुर्यले सन् २०१० मा दिल्लीविरुद्ध प्रथम श्रेणीमा यादगर डेब्यू गरेका थिए । उक्त डेब्यू खेलको पहिलो इनिङमा ७३ रनको इनिङ खेलेका थिए । जुन इनिङमा मुम्बईबाट अर्धशतक प्रहार गर्ने उनी एक्लो खेलाडी थिए ।

गुजरातविरुद्ध त्यसैवर्ष विजय हजारे प्रतियोगितामार्फत लिष्ट ए मा डेब्यु गरेका थिए । उक्त डेब्यू खेलमा ४१ रन जोडेका थिए । त्यसवर्ष शैद मुश्ताकमा टि२० क्रिकेटमा हैदराबादविरुद्ध डेब्यु गरेका थिए । सूर्यले १ सय ६१ खेलमा ३ हजार ३ सय ७४ रन बनाएका छन् । ९३ लिष्ट ए मा २ शतक र १५ अर्ध शतक सहित २ हजार ४ सय ४७ रन बनाएका छन् । सन् २०१९-२० को शैद मुश्ताकमा सूर्य सर्वाधिक रन बनाउने तेस्रो खेलाडी बनेका थिए । उनले ११ खेलमा ३ सय ९२ रन बनाएका थिए । जसमा ४ अर्ध शतक सामेल थियो ।

सूर्यलाई अक्सनमा मुम्बईले सन् २०१८ मा ३ करोड २० हजार भारतीय रुपैयाँ खर्चेको थियो । सूर्यलाई सन् २०१२ मा मुम्बईले अनुबन्ध गरेको थियो । तर त्यसबेला उनले मौका पाउन सकेनन् । सन् २०१४ मा भने सुर्य कोलकातामा पुगेका थिए । सूर्य भारतीय ए टोलीका नियमित सदस्य हुन् र नियमित उच्च प्रर्दशन गर्दै आएका छन् ।

बेंगलोरसँगको खेलपछि कप्तान काइरन पोलार्डले उनी भारतीय टोलीमा नपर्नुमा दुखी रहेको बताएका थिए । ‘हामीले केहि विकेट चाडैं गुमाएका थियौं । तर सूर्यले जित दिलाए । कुनैपनि खेलाडी विकेट गुम्दा उक्त नम्बरमा आएर उत्कृष्ट स्ट्राइक रेटका साथ ब्याटिङ गर्छन् भने पक्कै सामान्य प्रतिभा भएको खेलाडी होईनन् । सूर्य भारतीय टोलीमा नपर्दा धेरै निराश थिए,’ उनले भने ।

तीव्र गतिका बलर मिचेल म्याकलेघानले सुर्य भारतको ३ सय ६० डिग्रीका खेलाडी रहेको बताएका छन् । ‘सूर्य नमस्कार, मजबुत र धेर्य रहनुहोस्’, भारतीय प्रशिक्षक रवि शास्त्रीले ट्वीट गर्दै भनेका छन् ।

सूर्यलाई भारतीय टोलीमा मौका दिने अहिले सबैभन्दा राम्रो समय पनि देखिन्छ । चौथो र पाँचौ नम्बरको ब्याटिङ समस्या सूर्य दीर्घकालिन समधान बन्न सक्छन् । आगमी वर्ष भारतमा टि२० विश्वकप हुँदैछ । उक्त विश्वकपलाई तयार पार्न यो लयलाई समयमै सदुपयोग गर्न आवश्यक देखिन्छ ।