काठमाडौं (हाम्रो खेलकुद)– कोकाकोला इन्डोर कर्पोरेट कप क्रिकेटको उपाधि गोर्खा ब्रुअरीले जितेको छ । गोर्खा ब्रुअरीले आइतबार भएको फाइनलमा सिप्रदीलाई ३ विकेटले हराएको थियो । टस जितेर ब्याटिङ गरेको सिप्रदीले १२ ओभरमा ६ विकेटको गुमाएर ९१ रन बनाएको थियो । प्रतिउत्तरमा विश्वास मानन्धरको उच्च ३८ रनमा गोर्खा ब्रुअरीले १२ ओभरमा ४ विकेट गुमाउँदै आवश्यक जितका लागि आवश्यक ९२ रन जोडेको थियो ।
२६ बलमा २ चौका र १ छक्का प्रहार गरेका विश्वास प्लेयर अफ द म्याच बने । टोलीका लागि विजय रावले ३०, कृष्ण बंका र अशिम अर्यालले समान ११ रन जोडे । सिप्रदीका मुकेश सिग्देल र चिरन थापाले १/१ विकेट लिए ।
त्यसअघि सिप्रदीका लागि चिरन थापाले अविजित २६ रन बनाए । वीरेन्द्र मण्डलले १९ र शावन्त सिजापतीले १२ रन जोडे । गोर्खा ब्रुअरीका प्रशान्त ढकालले २ कृष्ण र विवेक थापाले समान १ विकेट लिए । त्यसअघि सिप्रदीले कान्तिपुर टिभिलाई ५६ रन र गोर्खा ब्रुअरीलाईले एफ वान सफ्टलाई ६ रनले हराउँदै एकअर्कासँगको भेट पक्का गरेका थिए ।
उपविजेता सिप्रदीका शावन्त सिजापतीले दोहोरो उपाधि जिते । उनी प्रतियोगिताको म्यान अफ सिरिज र उत्कृष्ट बलर घोषित भए । कान्तिपुर टिभीका रोशन श्रेष्ठ उत्कृष्ट ब्याट्सम्यान चुनिए । नेपाली क्रिकेट टोलीका कप्तान पारस खड्काले विजेता टोलीलाई पुरस्कृत गरे । नेपाल स्पोर्टस मेनेजमेन्टको आयोजनामा रातोपुलस्थित भेलोसिटी एरिनामा भदौ २४ सञ्चालित कर्पोरेट क्रिकेटमा १२ टोलीको सहभागिता थियो ।
