एजेन्सी – शीर्षक्रमका ब्याट्सम्यान डेविड मलानको अर्धशतकको सहयोगमा इंग्ल्यान्डले दक्षिण अफ्रिकासँगको तीन टि२० आई सिरिज एक खेल अगावै जितेको छ ।

दोस्रो टि२० खेलमा इंग्ल्यान्डले दक्षिण अफ्रिकाले ४ विकेटले पराजित गर्दै सिरिज जितेको हो । जितका लागि १ सय ४७ रनको विजयी लक्ष्य पछ्याएको इंग्ल्यान्डले १९.५ ओभरमा ६ विकेट गुमाउँदै पूरा गर्यो । इंग्ल्यान्डका डेविड मलानले ४० बलमा ७ चौका र १ छक्का सहित ५५ रनको योगदान दिए ।

कप्तान ओईन मोर्गन १७ बलमा ३ चौका र १ छक्का सहित २६ रनमा अविजित रहे । ओपनर जेसन रोय १४, जस बटलर २२, जोनी बेयरस्टो ३ र बेन स्टोक्स १६ रनमा आउट भए । दक्षिण अफ्रिका स्पिनर तबरेज शाम्सीले ४ ओभरमा १९ रन खर्चेर ३ विकेट लिए । लुन्गी एनगिडीले ४ ओभरमा ५१ रन खर्चेर २ विकेट लिए । कागिसो रबाडाको नाममा एक विकेट लिए ।

त्यअअघि घरेलु मैदान बोल्याण्ड पार्कमा टस हारेर ब्याटिङको निम्तो पाएको दक्षिण अफ्रिकाले निर्धारित २० ओभरमा ६ विकेट गुमाउँदै १ सय ४६ रन बनाएको थियो । दक्षिण अफ्रिकाका रास्सी भान डर डुसेन २९ बलमा २५ र कागिसो रबाडा ५ रनमा अविजित रहे ।

तल्लोक्रमका युवा अलराउन्डर जर्ज लिन्डेले २० बलमा २ चौका र १ छक्का सहित २९ रनमा रन आउट भए । कप्तान तथा विकेटकिपर क्विन्टन डी ककले १८ बलमा ३ चौका र १ छक्का सहित ३० रनमा आउट भए ।

चौथो ओभर चौथो बलमा जोफ्रा आर्चरले ओपनर टेम्बा बभुमालाई १३ रनमा बोल्ड आउट गरेका थिए । छैटौं ओभरको दोस्रो बलमा क्रिस जोर्डनले कप्तान क्विन्टन डी ककलाई टम करनबाट क्याच आउट गराएपछि सुरुवातमै दबाबमा परेको थियो । नवौं ओभरको अन्तिम बलमा रिजा हेन्ड्रिक्सलाई स्पिनर आदिल राशिदले १६ रनमा बोल्ड आउट गर्दा ६५–३ को कमजोर अवस्थामा पुगेको थियो ।

राशिदको ११ औं ओभरको पहिलो बलमा फाफ डु प्लेसिसलाई विकेटकिपर जस बटलरले ११ रनमा स्टम्पिङ आउट गराए । हेनरिक्स क्लासेन खराब सट खेल्दै बेन स्टोक्सबाट ७ रनमा क्याच आउट हुँदा ९५–५ को अवस्थामा पुगेको थियो ।

छैटौं विकेटका लागि लिन्डे र डुसेनले ३२ बलमा ४२ रनको साझेदारी गरेका थिए । इंग्ल्यान्डका आदिल राशिदले ४ ओभरमा २३ रन खर्चेर २ विकेट लिए । जोफ्रा आर्चर, टम करन र क्रिस जोर्डनले एक एक विकेट लिए । पहिलो खेलमा इंग्ल्यान्ड ५ विकेटले विजयी भएको थियो । तेस्रो तथा अन्तिम टि२० आई खेल मंगलबार हुनेछ ।