काठमाडौं (हाम्रो खेलकुद) – साविक विजेता नेपाल पुलिस क्लबले चौथो संस्करणको प्रधानमन्त्री राष्ट्रिय एकदिवसिय क्रिकेट प्रतियोगिताको लागि आफ्नो १४ सदस्य टोली सार्वजनिक गरेको छ । नियमित कप्तान मन्जित श्रेष्ठको कप्तानीमा पुलिसले बलियो टोली घोषणा गरेको छ ।
गतवर्ष पुलिसले आर्मीलाई ४ विकेटले पराजित गर्दै उपाधि जितेको थियो । दीपेन्द्र सिंह ऐरी, आरिफ शेख, पवन सरार्फ, ललित नारायण राजवंशी लगायतका वर्तमान नेपाली क्रिकेट टोलीबाट खेलि रहेका खेलाडीको बाहुल्यात छ । युवा खेलाडीको जोशले भरिएको पुलिस बलियो देखिएको छ ।
ललित भण्डारी नहुँदा भने तीव्र गतिको बलिङ युनिट थोरै कमजोर देखिन्छ । तर युवा बलर राशिद खानले ललितको अभाव महसुस हुन नदिने पुलिसले आशाबादी देखिन्छ । पुलिस समूह बी मा छ । पुलिसले माघ ४ मा बागमतीविरुद्ध टियुमा खेल्दै प्रतियोगिता सुरुवात गर्ने छ ।
माघ ७ मा टियुमै पुलिसले सुदूरपश्चिमसँग माघ ८ मा लुम्बिनीसँग खेल्ने छ । समूह चरणको अन्तिम खेल भने पुलिसले माघ १२ मा प्रदेश २ सँग मुलपानीमा खेल्ने छ । पुलिस र आर्मीले पहिलो संस्करणको फाइनलमा वर्षाको कारण संयुक्त रुपमा उपाधि बाँडेका थिए ।
दोस्रो संस्करणमा पुलिस सेमिफाइनलमा एपिएफसँग ९ रनले डकवर्थ लेविस पद्धतीको आधारमा पराजित हुँदै बाहिरिएको थियो ।
पुलिसको टोली : मन्जित श्रेष्ठ (कप्तान), दीलिप नाथ (विकेटकिपर), कुशल भुर्तेल, अनिल शाह (विकेटकिपर), अमित श्रेष्ठ, दीपेन्द्र सिंह ऐरी, आरिफ शेख, सुनिल धमला, सागर ढकाल, ललित नारायण राजवंशी, राशिद खान, प्रेम तामाङ, पवन सरार्फ र योगेन्द्र कार्की
प्रशिक्षक – मनोज कटवाल
व्यवस्थापक – चित्र बहादुर विष्ट
