काठमाडौं (हाम्रो खेलकुद) – नेपाल एपिएफ क्लबले चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा लगातार दोस्रो जित हात पारेको छ ।

बिहिबार एपिएफले गण्डकीलाई ६ विकेटले हराउँदै दोस्रो जित निकालेको हो । जितको लागि १ सय ७ रनको विजयी लक्ष्य पछ्याएको एपिएफले १७.३ ओभरमा ४ विकेट गुमाउँदै पूरा गर्यो । एपिएफका ओपनर आशिफ शेखले ५६ बलमा ५ चौका र ६ छक्का सहित सर्वाधिक ७८ रनको योगदान दिए ।

सुबास खकुरेल र रित गौतम शून्यमा आउट भए । सुमित महर्जन १८ रनको योगदान दिए । गण्डकीका चन्द्रकान्त पौडेल र बिशाल पौडेलले २–२ विकेट लिए । आशिफले यसअघि पहिलो खेलमा प्रदेश एकविरुद्ध पनि अर्धशतक प्रहार गरेका थिए ।

त्यसअघि मुलपानी क्रिकेट मैदानमा टस हारेर पहिला ब्याटिङ थालेको गण्डकी ४६ ओभरमा १ सय ६ रनमा अल आउट भएको थियो । गण्डकीका समिर कंडेलले १ सय १४ बलमा २ चौका सहित सर्वाधिक ३६ रनको योगदान दिए । दीनेश बुढामगर १२, दीपेश खत्री र बिष्णु पान्डेले १५–१५ रनको योगदान दिए ।

एपिएफका तीव्र गतिका बलर कमलसिंह ऐरीले १० ओभरमा ३ मेडन सहित ११ रन खर्चेर ४ विकेट लिए । शरद भेषावकर र अभिनाश बोहराले २–२ विकेट लिए । किशोर महतोको नाममा १ विकेट रह्यो । गण्डकी समूह एबाट ४ खेलमा ३ मा हार र १ मा जित सहित चौथो स्थानमा रहँदै बाहिरिएको छ ।

एपिएफ २ खेलमा २ मा जित सहित दोस्रो स्थानमा छ । एपिएफले आफ्नो तेस्रो खेलमा माघ १० मा कर्णालीसँग खेल्ने छ । प्रदेश एक पनि एक खेल अगावै समूह ए बाट बाहिरि सकेको छ ।