काठमाडौँ (हाम्रो खेलकुद) – बसन्त रेग्मीले कप्तानी गरिरहेका कान्तिपुर गुर्खाज बिहिबार कलर्स एक्स-फ्याक्टर्ससंग १५ रनले पराजित भएपछि प्रतियोगिताको फाइनलमा नपुग्ने पक्का भएको छ।
टि.यु. मैदानमा बिहिबार भएको पहिलो खेलमा पहिलो ब्याटिङ्ग गर्दै कलर्स एक्स-फ्याक्टर्सले गुर्खाज सामु १२५ रनको सामान्य लक्ष्य प्रस्तुत गरेको थियो। एक्स-फ्याक्टर्सका लागि योगेन्द्र सिंह कार्कीले ३० रन बनाए भने कप्तान ज्ञानेन्द्र मल्लले २० रन्को योगदान दिएका थिए।
प्रतियोगिताको फाइनल पुग्ने आशा जिवितै राख्न आजको खेल जित्नै पर्ने दवाब रहेको गुर्खाजले निर्धारित २० ओभरमा मात्र १०९ रन बनाउन सक्यो। प्रदिप ऐरीले ३१, कप्तान बसन्त रेग्मीले २५ र अन्तिम थापाले ३० रन बनाउन बाहेक अन्यले ३ रन पनि जोड्न सकेनन्। एक्स-फ्याक्टर्सका हरि शंकर शाहले ४ ओभरमा एक मेडन फाल्दै एक विकेट लिन आठ रन खर्चे। अमर सिंह राउटेलाले ३ विकेट लिएका थिए।
