काठमाडौं (हाम्रो खेलकुद) – मध्यगतिका बलर आरिफ शेखको उत्कृष्ट बलिङसँगै चौथो संस्करणको प्रधानमन्त्री कप एकदिवसिय क्रिकेट प्रतियोगिता पहिलो सेमिफाइनलमा नेपाल पुलिस क्लबले नेपाल एपिएफ क्लबविरुद्ध उत्कृष्ट सुरुवात गरेको छ ।
टियु क्रिकेट मैदानमा टस हारेर पहिला ब्याटिङ थालेको एपिएफले १८ ओभरमा ४ विकेट गुमाउँदै ५५ रन बनाएको छ । एपिएफका शंकर राना ७ र सन्दीप जोरा ८ रनमा खेलि रहेका छन् । पाँचौं ओभरको तेस्रो बलमा तीव्र गतिका राशिद खानले आशिफ शेखलाई आफैं क्याच लिँदै एक रनमा आउट गरेका थिए ।
आरिफ शेखले ओपनर अर्का ओपनर सुबास खकुरेललाई आठौं ओभरको चौथो बलमा १९ रनमा बोल्ड आउट गरे । आरिफको इनस्विङ बलमा विट भएपछि सुबास बोल्ड हुन पुगेका थिए । सुबासले ३१ बलमा २ चौका प्रहार गरे ।
१२ औं ओभरको अन्तिम बलमा आरिफले कप्तान शरद भेषावकरलाई विकेटकिपर अनिल कुमार शाहबाट १८ रनमा क्याच आउट गराए । शरदले २८ बलमा २ चौका प्रहार गरे । आरिफले १४ औं ओभरको तेस्रो बलमा फस्ट स्लिपमा रहेका पवन सरार्फबाट युवा ब्याट्सम्यान सुमित महर्जनलाई एक रनमा क्याच गराएपछि एपिएफ ४३–४ को अवस्थामा पुगेको थियो ।
आरिफले ९ ओभरमा १ मेडन सहित ३० रन खर्चेर ३ विकेट लिएका छन् ।
