भूपेन्द्र जिसी, काठमाडौं

अलराउन्डर आरिफ शेख प्रधानमन्त्री कपको सेमिफाइनलअन्तर्गत एपिएफविरुद्ध पहिलो इनिङमा घाइते हुन पुगे । ४६ औं ओभरमा फिल्डिङ गर्ने क्रममा एंकलमा चोट बोकेपछि उनलाई स्ट्रेचरमा राखेर मैदान बाहिर हुँदै एम्बुलेन्समा अस्पताल लगियो ।

दोस्रो इनिङको मध्यतिर मैदान फर्कंदा टोलीलाई कमजोर अवस्थामा देखेका उनी आठौं विकेट खसेपछि ब्याटिङ गर्न क्रिजमा फर्किए । उनको यो निर्णय खेल भावनाका लागि जति राम्रो थियो, व्यक्तिगत आरिफका लागि भने महँगो पर्न सक्थ्यो । बल्लतल्ल हिड्न सक्ने अवस्थामा रहेका आरिफ ब्याटिङ गर्न आउँदा पुलिस जितबाट निकै टाढा पुगिसकेको थियो । आरिफको प्रयासका बाबजुद साविक विजेता पुलिस एपिएफसँग ३० रनले पराजित हुँदै प्रधानमन्त्री कप एकदिवसिय क्रिकेट प्रतियोगिताको सेमिफाइनलबाट बाहिरिन पुग्यो ।

टियु क्रिकेट मैदानमा टस जितेर पहिला बलिङ गर्ने निर्णय लिएको पुलिसलाई मध्यगतिका बलर आरिफ शेखले उत्कृष्ट सुरुवात दिलाएका थिए । तर तीनै आरिफ फिल्डिङ गर्नेक्रममा इनिङको अन्तिम समयमा घाइते हुन पुगे । नियमित तीव्र गतिका बलर ललित भण्डारी सडक दुर्घटनाको कारण गम्भीर दुर्घटनामा परेको हुँदा यस पटक पुलिसको तीव्र गतिको बलिङ युनिटमा आरिफले साथ दिँदै आएका छन् ।

तीव्र गतिका बलर राशिद खानको बलमा कमलसिंह ऐरीले ४६ औं ओभरमा तेस्रो बलमा गल्लीमा प्रहार गरेको बल थ्रो फाल्ने क्रममा आरिफको दाँया खुट्टाको एंकलमा चोट लागेको थियो । थ्रो फाल्न टर्न गर्ने क्रममा एंकलमा चोट लागेपछि आरिफ मैदानमै लडेका थिए ।

इनिङको सुरुवाती २० ओभरमै आरिफले लगातार १० ओभर बलिङ गर्दै आफ्नो स्पेल सकाए । १० ओभरमा १ मेडन सहित ३१ रन खर्चेर ३ प्रमुख विकेट लिएका थिए । आरिफले एपिएफका प्रमुख ब्याट्सम्यान सुबास खकुरेल, कप्तान शरद भेषावकर सुमित महर्जनलाई आउट गर्दै शीर्षक्रम धरासायी बनाएका थिए ।

आरिफ घाइते भएपछि नेपाली क्रिकेट टोलीका फिजियो विक्रम न्यौपाने र ह्याम्स अस्पतालका स्वास्थ्यकर्मी मैदानभित्र पुगेका थिए । निकै पिडा महसुस गरेका आरिफ मैदानबाट हिँडेर बाहिर आउन सकेनन् । मैदानको आधा भागसम्म काँधको सहारामा आएका उनलाई बाँकी भाग स्ट्रेचरको सहयोगमा बाहिर ल्याइएको थियो । दाँया खुट्टामा एंकलमा प्राथमिक उपचार गर्नेक्रममा पट्टी बाँधिए लगत्तै एम्बुलेन्समा राखेर ह्याम्स अस्पताल पठाईएको थियो ।

निकै पिडा र दुखाई उनको अनुहारले देखाइरहेको थियो । उता आरिफलाई तुरुन्तै अस्पताल लगेको हुँदा चोट गम्भीर रहेको अनुमान गरिएको थियो । एपिएफले ५० ओभरमा ९ विकेट गुमाउँदै २ सय ३ रन बनाएको थियो । मध्यम लक्ष्य पछ्याएको पुलिसले खराब सुरुवात गर्यो । सुरुवाती १५ रन जोड्न प्रमुख तीन ब्याट्सम्यान गुमाउन पुगेपछि समस्यामा परेको थियो ।

चोट देख्दा आरिफ ब्याटिङ गर्नेमा धेरैले आशा मारिसकेका थिए । आरिफ उपचारपछि मैदान प्रवेश गर्दा टोलीले ५ विकेट गुमाएको थियो । टोलीको सातौं विकेट खसेपछि भने आरिफले ब्याटिङ गर्ने निर्णय लिँदै प्याड लगाउन थाले । यद्यपि त्यस समय खेल पुलिसको हातबाट टाढा बनिसकेको थियो ।

पुलिसलाई अन्तिम ३६ बलमा ६४ रन चाहिएको थियो । क्रिजमा राशिद खान २८ रनमा खेल्दा सागर ढकालले खाता खेल्न सकेका थिएनन् । मैदान बाहिर भने पुलिसको डग आउटमा आरिफ ब्याटिङको लागि प्याड बानेर तयार हुँदा सबै आश्चर्यमा परेका थिए । कतिपयले चोट सामान्य हुन सक्ने अनुमान पनि गरे । तर डग आउटमै दाँया खुट्टा हलचल गराउन कठिन परि रहेको थियो ।

चोटको पिडा र दुःखाई प्रष्ट देखिन्थ्यो । तर पनि उनी ब्याटिङ गर्न तयार भइरहेका थिए । ४७ औं ओभरको पहिलो बलमा स्पिनर भुवन कार्कीले राशिद खानलाई ३४ रनमा बोल्ड आउट गरेपछि आरिफ ब्याटिङका लागि मैदान छिरे । उनलाई क्रिजमानै पुग्न नै समय लागेको थियो । तर पनि टोलीलाई जितको आशा जगाउँदै मैदान छिरे । आरिफको साहसीक कदमलाई देखेर खेल हेर्न टियु मैदान पुगेका समर्थकले तालिनै बजाएका थिए ।

आरिफले दाँया खुट्टा चलाउन निकै कठिन भइरहेको थियो । राम्रोसँग टेक्न सकिरहेका थिएनन् । सुरुवाती चार बल डट खेलेका उनी अन्तिम बलमा एक रन लिँदै स्ट्राइक आफैंमा राखे । कमलको ४८ औं ओभरको सुरुवाती तीन बलमा कुनै रन जोडेनन् । बाउन्ड्री बाहेक अन्य प्रहार गर्न सक्ने अवस्थामा पनि थिएनन् । चौथो बलमा आरिफले छक्का प्रहार गर्दै पुलिसलाई आशा झिनो आशा कायमै राखे । आरिफ मैदान छिर्दा जितको लागि २३ बलमा ४७ रन आवश्यक थियो । ४९ औं ओभरको सुरुवाती दुई बलमा आरिफले दुई लगातार चौका प्रहार गरे ।

तेस्रो बलमा पनि उनले ठूलो सट खेलेपनि डीप मिडविकेटमा आफ्नै भाई आशिफ शेखबाट क्याच आउट हुन पुगे । उनको टोली प्रतिको भावना देखेर एपिएफका खेलाडीले आउट भएपछि तारिफ गरेका थिए । पुलिस ४९.२ ओभरमा १ सय ७३ रनमा अल आउट हुँदै पराजित भएको थियो ।

खेलपछि आरिफ टोलीको लागि आफूले नसकेर भएपनि खेल्नु परेको बताए । ‘अहिले पनि दुखिरहेको छ । चिकित्सकले तीन दिन विश्रामको गर्न भनेको छन् । तीन दिनपछि फलोअपको लागि बोलाएको छ । एक्सरेमा गम्भीर चोट नदेखिएको कारण अप्रेसन भने गर्नु पर्दैन’, आरिफले हाम्रो खेलकुदसँग कुरा गर्दै भने ।

‘ब्याटिङ गर्ने निर्णय मेरो नै थियो । राशिद ब्याटिङ गरिरहेको थियो । अर्को इन्डमा सागर ढकाल थियो । मैले के सोचेको थिए भने सागर आउट भयो भने म क्रिजमा उभिनमात्र सके भने राशिदले रन बनाउन सक्छ । दुर्भाग्य राशिदनै आउट भयो’, आरिफले भने ।

‘तीन ओभर तीव्र गतिका बलरको बाँकी थियो । तीन ओभरमा जे पनि हुन सक्छ । राशिद खेलमा भएको भए र नन स्ट्राइकमा भइ दिएको भए खेललाई सजिलै लान सक्थ्यो । राशिदलाई साथ दिनको लागि ब्याटिङ गर्ने निर्णय लिएको थिएँ’, आरिफले भने ।

‘त्यो बेला मैले केहि पनि सोचिन । टोलीको लागि के कस्तो गर्न सकिन्छ भन्ने मेरो मनमा थियो । दुःख त छैद छ । मैले गएर उभिँदा पनि टोलीलाई सहयोग पुग्न सक्छ की भन्ने लाग्यो । मा क्रिजमा नजाँदा टोलीको एउटा विकेट कम हुन्थ्यो’, उनले भने ।

‘धेरैनै दुखाई भई रहेको थियो । खुट्टा हल्लाउननै मिली रहेको थिएन । जितेकै खेल हामीले गुमाउन पुग्यौं’, निराश हुँदै आरिफले भने ।

आरिफले इनिङको सुरुवातमा लगातार १० ओभर बलिङ गरेका थिए । त्यसले पनि असर गरेको की भन्ने प्रश्नमा भने आरिफले त्यसो नभएको बताउँछन् । ‘१० ओभर बलिङ गरेपछि निकै फ्रेस थिएँ । थ्रो फालेर टर्न गर्दा एंकलबाट आवाज नै आएपछि दुखाइ सुरु भएको थियो,’ आरिफले सुनाए ।

खेलपछि एपिएफका कप्तान शरद भेषवाकरले आरिफको करिअर लामो हुँदा र नेपाली क्रिकेटको प्रमुख सदस्य हुँदा चोटमा ध्यानदिनुपर्ने बताए । ‘मार्चमा राष्ट्रिय टोलीले खेल्दैछ । आरिफ टोलीका महत्त्वपूर्ण सदस्य भएकाले जोखिम नलिएको भए हुने । उनको करिअर अझै लामो छ,’ शरदले त्यसमा थपे, ‘तर उनले क्रिकेटको खेल भावनाको पक्षबाट हेर्ने हो भने टोलीको लागि आफूलाई अघि बढाए । त्यसको प्रशंसा पनि गर्नुपर्छ ।’ यता खेलका म्यान अफ द म्याच भुवन कार्कीले पनि आरिफको टोलीप्रति देखाएको लगावको प्रशंसा गरे ।

आरिफको मैदानमा फर्कने निर्णयले खेलप्रतिको लगाव झल्काएपनि आरिफका लागि भने खतरले भरपूर्ण थियो । एक खुट्टा टेक्न कठिन भइरहेको अवस्थामा राष्ट्रिय टोलीका खेलाडीले बलिङ गरिरहँदा उनले क्रिजमा जाने निर्णय लिए । अझ आफैं ब्याटिङको जिम्मेवारी लिएर सट प्रहार गर्न खोज्नु ठुलै साहस हो ।

एपिएफका बलरहरुले गुड लेन्थ र फुल लेन्थमा बल फ्याँकेर उनलाई बिट गराउन मात्र खोजेका थिए । खेलमा पुलिस जितबाट टाढा रहेकाले पनि एपिएफका लागि विकेट महत्त्वपूर्ण थिएन । यदि एपिएफका बलरहरुले चाहन्थे त आरिफलाई योर्कर लेन्थको बल फ्याँकेर थप समस्या दिन सक्थे ।

तर पटक पटक कप्तान शरदले आफ्ना बलरहरुलाई दिएको निर्देशनबाट पनि यो प्रष्ट थियो, एपिएफ खेल जित्न चाहन्थ्यो, र सँगसँगै मन पनि । जति तारिफ आरिफको साहसको गरियो, उति नै तारिफ एपिएफ, कप्तान शरद र बलरहरुको गर्नुपर्छ । आरिफले आफू मैदान प्रवेश गर्नु बाध्यता सम्झिए र एपिएफले खेल भावनालाई कदर गर्दै टियु मैदानमा अर्को दुर्घटना निम्तिन दिएनन् ।