एजेन्सी – नेपाली राष्ट्रिय क्रिकेट टोलीका अलराउन्डर सोमपाल कामी सम्मिलित मराठा अरेवियन्सले आबूधाबी टि १० लिगमा विजयी सुरुवात गरेको छ ।

बिहिबार मराठाले नर्थन वारियर्सलाई ५ विकेटले हराउँदै विजयी सुरुवात गरेको हो । जितको लागि १ सय २८ रनको विजयी लक्ष्य पछ्याएको मराठाले १० ओभरमा ५ विकेट गुमाउँदै पूरा गरेको थियो । अन्तिम बलमा मोसदेक होसेनले चौका प्रहार गर्दै जित पक्का गरेका थिए ।

मराठाको जितमा ओपनर अब्दूल सकुर २८ बलमा ७ चौका र ५ छक्का ७३ रनको रनको विष्फोटक इनिङ खेले । जावेद अमहद ६ र लाहिरु इभान्स ९ रनमा आउट भए । अब्दुल सकूरले १४ बलमै अर्धशतक प्रहार गरेका थिए । मोहम्मद हफिज १९ रनमा आउट भए । फबिएन एलेन २ विकेट लिए ।

त्यसअघि शेख जायद स्टेडियम आबूधाबीमा टस हारेर पहिला ब्याटिङ थालेको नर्दनले १० ओभरमा २ विकेट गुमाउँदै १ सय २७ रन बनाएको थियो । नर्थनका ओपनर लेन्डन सिमन्स ३१ बलमा ७ चौका र १ छक्का सहित ५४ रनमा अविजित रहे । त्यस्तै रोभमन पवेल ७ बलमा २ चौका र २ छक्का सहित २२ रनमा अविजित रहे ।

ओपनर सिमन्स र बे्रन्डन किंगले ५.१ ओभरमा ६२ रनको साझेदारी गर्दै राम्रो सुरुवात दिलाएका थिए । रन आउट हुनुअघि किंग्सले १३ बलमा ४ छक्का सहित २९ रनको योगदान दिए । निकोलस पुरन ९ बलमा २ चौका र १ छक्का १९ रनमा सोमपाल कामीबाट क्याच आउट हुन पुगे । सोमपाल कामीले २ ओभरमा २८ रन खर्चेपनि विकेट लिन सकेनन् ।

डेब्यू खेलमा सोमपलले टोलीको प्रमुख तीव्र गतिको बलरको रुपमा खेल्दै पहिलो र अन्तिम ओभर गरेका थिए ।

सोमपालको दुई ओभर

इनिङकै पहिलो ओभर बलिङ गरेका सोमपालले पहिलो बलमा ब्रेन्डन किंगलाई डट गराएका थिए । दोस्रो बलमा किंगले ठूलो सट खेल्न खोज्दा टप एज लागेपछि डिप स्क्वायर लेगमा जाभेद अहमादीले क्याच लिन नसक्दा सोमपाल विकेट लिनबाट चुके । त्यसक्रममा किंग २ रन जोड्दै खाता खोल्न सफल रहे ।

तेस्रो बलमा किंगले डिप मिड विकेटतर्फ छक्का प्रहार गरे । चौथो बलमा किंगले रन जोड्न सकेनन् । पाँचौ बलमा सोमपालले उत्कृष्ट योर्कर फ्याँक्दै रन जोड्न दिएनन् । ओभरको अन्तिम बलमा सोमपालले बाउन्सर फाल्दै किंगलाई बिट गर्न सफल रहे । पहिलो ओभरमा उनले ८ रन खर्चे ।

सोमपल १० औं ओभरमा बलिङमा आएका थिए । पहिलो बलमा डीप स्क्वायर लेगमा सिमन्सले चौका प्रहार गरे । सोमपाललाई चौका प्रहार गर्दै सिमन्सले २९ बलमा अर्धशतक प्रहार गरेका थिए । दोस्रो अफ फुलटस बलमा सिमन्सले तीन रन जोडेका थिए । तेस्रो बलमा पवेलले चौका प्रहार गरे ।

चौथो बलमा एक रन दिए । चौथो योर्कर बलमा एक रन बटुलेका थिए । पाँचौं बलमा उनले दुई रन दिएका थिए । त्यसपछि वाइड फाले । अन्तिम बलमा सोमपाललाई डिप मिडविकेटमा छक्का प्रहार गरेका थिए ।

सोमपालको टोलीले अव शनिबार दिल्ली बुल्ससँग खेल्ने छ ।